ការបញ្ជូនកូនតូចចូលរៀនថ្នាក់មត្តេយ្យ គឺជារឿងដ៏សំខាន់មួយសម្រាប់កូននិងលោកប៉ាអ្នកម៉ាក់គ្រប់រូប ដូចនេះដើម្បីឱ្យមានភាពរលូន ប៉ាម៉ាក់គួរត្រៀមខ្លួនឱ្យកូនតូចៗតាមរយៈចំណុចសំខាន់ៗដូចខាងក្រោម ៖ 

១. ការត្រៀមលក្ខណៈផ្លូវចិត្ត និងអារម្មណ៍

• និយាយរឿងវិជ្ជមានពីសាលា: ចាប់ផ្តើមនិយាយជាមួយកូនអំពីសាលារៀន ដោយប្រើពាក្យដែលរំភើប និងវិជ្ជមានដូចជា "កន្លែងដែលសប្បាយ មានមិត្តភក្តិច្រើន និងមានហ្គេមថ្មីៗ"។ កុំប្រើសាលាដើម្បីគំរាមកំហែងកូន។
• បង្រៀនឱ្យស្គាល់ការបែកគ្នាខ្លី: ហ្វឹកហាត់ឱ្យកូននៅជាមួយអ្នកដទៃ (ដូចជាសាច់ញាតិ ឬមិត្តភក្តិ) ក្នុងរយៈពេលខ្លីៗ ដើម្បីឱ្យពួកគេយល់ថា ប៉ាម៉ាក់តែងតែត្រឡប់មកវិញ។
• បង្កើតទម្លាប់លាគ្នាខ្លី: នៅថ្ងៃចូលរៀន ចូរលាកូនដោយក្តីស្រឡាញ់ តែត្រូវធ្វើឱ្យវាខ្លី និងម៉ឺងម៉ាត់។ ជៀសវាងការអូសបន្លាយពេល ឬបង្ហាញការថប់បារម្ភច្រើនពេកនៅចំពោះមុខកូន ព្រោះវាអាចបង្កើនភាពភ័យខ្លាចដល់ពួកគេ។

២. ការត្រៀមលក្ខណៈជំនាញមូលដ្ឋាន 

• ជំនាញថែទាំខ្លួនឯងបឋម: ហ្វឹកហាត់កូនឱ្យចេះធ្វើរឿងងាយៗដោយខ្លួនឯង មុនចូលរៀន។
• ការប្រើប្រាស់បន្ទប់ទឹក: ហ្វឹកហាត់ឱ្យចេះនិយាយនៅពេលពួកគេត្រូវការបន្ទោរបង់ ឬបត់ជើងតូច។ 
• ការស្លៀកពាក់ងាយៗ: ហាត់ឱ្យចេះពាក់អាវ ឬស្បែកជើងដោយខ្លួនឯង (បើអាច)។
• ការស្តាប់ និងការឆ្លើយតប: ហ្វឹកហាត់កូនឱ្យចេះស្តាប់ការណែនាំសាមញ្ញៗពីមនុស្សពេញវ័យផ្សេងទៀត ក្រៅពីប៉ាម៉ាក់។

៣. ការត្រៀមលក្ខណៈជាក់ស្តែង និងសម្ភារៈ

• កំណត់ទម្លាប់គេង/ភ្ញាក់: ប្រហែលពីរសប្តាហ៍មុនចូលរៀន គួរកំណត់ទម្លាប់គេង និងភ្ញាក់ឱ្យត្រូវតាមម៉ោងរបស់សាលា ដើម្បីចៀសវាងភាពងងុយគេងនៅម៉ោងសិក្សា។
• ទម្លាប់ញ៉ាំអាហារពេលព្រឹក: ធានាថាកូនមានទម្លាប់ញ៉ាំអាហារពេលព្រឹកមុនទៅសាលា។
• សម្គាល់សម្ភារៈ: ត្រូវដាក់ឈ្មោះ ឬសម្គាល់នៅលើកាបូប ឯកសណ្ឋាន ប្រអប់អាហារ និងសម្ភារៈផ្ទាល់ខ្លួនផ្សេងទៀត ដើម្បីងាយស្រួលរក។

៤. ការសហការជាមួយសាលា

• ទៅលេងសាលា: តាមដែលអាចធ្វើបាន គួរនាំកូនទៅលេងបរិវេណសាលាមុនថ្ងៃចូលរៀនផ្លូវការ ដើម្បីឱ្យពួកគេស្គាល់កន្លែងលេង និងថ្នាក់រៀន។

ដូចនេះ មុនពេលបញ្ចូនអូនតូចចូលរៀនមតេ្តយ្យ ប៉ាម៉ាក់គួរបង្រៀនអូនតូច​ពីចំណុច ដូច​ដែរបានរៀបរាប់​ខាង​លើយ៉ាងហោចណាស់ ១ ខែមុន និងត្រូវអនុវត្ត​ជារៀងរាល់ថ្ងៃដើម្បីអូនតូចសុំា ដូច្នេះអូនតូចនឹង​មិន​ខ្លាច​ការចូលរៀនដំបូង៕