វិស័យទេសចរណ៍របស់ព្រះរាជាណាចក្រកម្ពុជា នៅតែបន្តបង្ហាញភាពលេចធ្លោ និងភាពទាក់ទាញខ្លាំងនៅលើឆាកអន្តរជាតិ។ ជាថ្មីម្ដងទៀត ទីក្រុងសៀមរាប ដែលជាដែនដីអច្ឆរិយៈ និងជាបេះដូងនៃវប្បធម៌ខ្មែរ បានជាប់ឈ្មោះជាទីក្រុងទេសចរណ៍វប្បធម៌ដ៏ល្អបំផុតមួយក្នុងចំណោមទីក្រុងល្បីៗទាំង ២៥ នៅលើពិភពលោក សម្រាប់ឆ្នាំ២០២៦ (World's Best Cultural Destinations 2026) ក្នុងពានរង្វាន់ជម្រើសអ្នកធ្វើដំណើរ (Travelers' Choice Awards) របស់គេហទំព័រទេសចរណ៍ដ៏ល្បីល្បាញ Tripadvisor។

ការទទួលបានចំណាត់ថ្នាក់នេះ មិនមែនជារឿងចៃដន្យនោះទេ ប៉ុន្តែវាគឺជាការឆ្លុះបញ្ចាំងពីការវាយតម្លៃដោយផ្ទាល់ពីសំណាក់ភ្ញៀវទេសចររាប់លាននាក់ជុំវិញពិភពលោក ដែលបានមកកម្សាន្ត និងបន្សល់ទុកនូវមតិយោបល់វិជ្ជមានទៅលើបទពិសោធន៍វប្បធម៌ដ៏សម្បូរបែបនៅទីក្រុងសៀមរាប។ សៀមរាបបានឈរនៅ ចំណាត់ថ្នាក់លេខ ១៣ ក្នុងចំណោមទីក្រុងធំៗដទៃទៀតដូចជា សិង្ហបុរី ឡុងដ៍ ប៉ារីស និងរ៉ូម ជាដើម។

ហេតុអ្វីបានជាសៀមរាបជាប់ជាទីក្រុងវប្បធម៌ដ៏ឆ្នើម?

សៀមរាប មិនមែនគ្រាន់តែជាទីក្រុងដែលមានប្រាសាទបុរាណនោះទេ ប៉ុន្តែវាគឺជាសមុច្ច័យនៃវប្បធម៌រស់នៅដ៏អស្ចារ្យ រួមមាន៖

• បេតិកភណ្ឌរូបិយដ៏មហិមា៖ វត្តមាននៃប្រាសាទអង្គរវត្ត និងប្រាសាទបុរាណរាប់រយផ្សេងទៀត ដែលជាស្នាដៃឯកផ្នែកស្ថាបត្យកម្ម។
• សិល្បៈ និងប្រពៃណី៖ របាំព្រះរាជទ្រព្យ ល្ខោនស្បែកធំ និងសិល្បៈសូនរូបដែលនៅតែបន្តអភិរក្សយ៉ាងខ្ជាប់ខ្ជួន។
• បដិសណ្ឋារកិច្ចដ៏កក់ក្ដៅ៖ ភាពញញឹម និងភាពរួសរាយរាក់ទាក់របស់ប្រជាជនក្នុងតំបន់ ដែលផ្ដល់នូវអារម្មណ៍កក់ក្ដៅដល់អ្នកទេសចរគ្រប់រូប។
• ការអភិវឌ្ឍន៍ហេដ្ឋារចនាសម្ព័ន្ធ៖ ការកែលម្អសោភ័ណភាពក្រុង ផ្លូវថ្នល់ និងការរៀបចំសណ្ដាប់ធ្នាប់ កាន់តែធ្វើឱ្យទីក្រុងនេះមានភាពទាក់ទាញខ្លាំងសម្រាប់ទេសចរវប្បធម៌។

យោងតាមការចុះផ្សាយរបស់ Tripadvisor ចំណាត់ថ្នាក់ទាំង ២៥ រួមមាន៖ ១. សិង្ហបុរី  ២. ឡុងដ៍ ៣. ក្រាកូវ  ៤. ប៉ារីស  ៥. រ៉ូម  ៦. អេឌីនបឺរ៉ា  ៧. ហាណូយ  ៨. ប៊ូដាប៉េស  ៩. ក្យូតូ  ១០. បាលី  ១១. ប្រាក  ១២. ដាប់លិន  ១៣. សៀមរាប (កម្ពុជា)  ១៤. អ៉ីស្តង់ប៊ុល  ១៥. ញូវយ៉ក  ១៦. សេអ៊ូល  ១៧. ប៉េកាំង  ១៨. ហ្វ្លូរ៉ង់ស៍  ១៩. លីសបោន  ២០. បាសេឡូណា  ២១. ម៉ារ៉ាគេក  ២២. អាថែន  ២៣. លីម៉ា  ២៤. លុចស័រ  ២៥. រីយ៉ូ ដឺ ហ្សាណេរ៉ូ។

សមិទ្ធផលនេះគឺជាសារយ៉ាងសំខាន់ក្នុងការជំរុញយុទ្ធនាការ ឱ្យកាន់តែមានឥទ្ធិពលខ្លាំងឡើង។ វានឹងជួយទាក់ទាញលំហូរភ្ញៀវទេសចរអន្តរជាតិឱ្យមកកាន់កម្ពុជាកាន់តែច្រើន ដែលនាំមកនូវចំណូលសេដ្ឋកិច្ច ការបង្កើតការងារ និងការលើកតម្កើងតម្លៃវប្បធម៌ខ្មែរនៅលើវេទិកាអន្តរជាតិ៕