លោក ម៉ម ប៊ុនហេង បន្តអំពាវនាវឱ្យការពារខ្លួន ទោះជំងឺអុតស្វាមិនទាន់មានវត្តមាននៅកម្ពុជា
រដ្ឋមន្ត្រីក្រសួងសុខាភិបាលរូបនេះ បានលើកយកសេចក្ដីរាយការណ៍ដែលអង្គការសុខភាពពិភពលោកទទួលបាននាពេលថ្មីនេះ មកបង្ហាញថា ការផ្ទុះឡើងជាបន្តបន្ទាប់នូវជំងឺអុតស្វា ឬ Monkeypox ដោយបានបញ្ជាក់កាលពីថ្ងៃទី៦ ខែឧសភា ឆ្នាំ២០២២ លើបុគ្គលម្នាក់នៅចក្រភពអង់គ្លេស ដែលបានធ្វើដំណើរមកពីប្រទេសនីហ្សេរីយ៉ា ដែលមានកន្លែងជំងឺនេះ បានកើតមានបែបអង់ដេមី (Endemic area)។
ករណីជំងឺអុតស្វានេះ ត្រូវបានរកឃើញជាបន្តបន្ទាប់ នៅបណ្តាប្រទេសប្រមាណជា ១៩ប្រទេស នៅលើសកលលោក ដែលមិនមែនជាប្រទេសអង់ដេមី នៃជំងឺនេះ ដោយគិតត្រឹមថ្ងៃទី២៣ ខែឧសភា ឆ្នាំ២០២២ ករណីជំងឺអុតស្វា ដែលបានរាយការណ៍ ជូនអង្គការសុខភាពពិភពលោក មានចំនួនសរុប ១៥៨នាក់ មានអ្នកសង្ស័យសរុបចំនួន ១១៧នាក់ ដែលកំពុងតធ្វើការអង្កេតបញ្ជាក់ និងមិនទាន់មានករណីស្លាប់នៅឡើយ។ គួរកត់សម្គាល់ថា នៅតំបន់ប៉ាស៊ីហ្វិកខាងលិច មានការរាយការណ៍ពីករណីជំងឺអុតស្វានេះ ចំនួន ២ករណីហើយ។
គិតត្រឹមថ្ងៃទី២៤ ខែឧសភា ឆ្នាំ២០២២ កម្ពុជាមិនទាន់មានករណីជំងឺអុតស្វាបែបនេះនៅឡើយទេ តែទោះជាយ៉ាងណាក៏ដោយ ក្រសួងសុខាភិបាល សូមធ្វើការអំពាវនាវដល់បងប្អូនប្រជាពលរដ្ឋដែលរស់នៅក្នុងប្រទេសកម្ពុជាទាំងអស់ ត្រូវមានការប្រុងប្រយ័ត្នជាប់ជានិច្ច ដោយបុគ្គល គ្រួសារនិងសហគមន៍យើង ត្រូវយកចិត្តទុកដាក់អនុវត្តវិធានការ បង្ការការចម្លងជំងឺផ្ទាល់ខ្លួន និងទៅអ្នកដទដែលអាចកើតមានឡើងជាយថាហេតុ។
បើតាមលោកស្រី ឱ វណ្ណឌីន បានបញ្ជាក់ថា រហូតមកដល់ពេលនេះ មិនទាន់មានករណីសង្ស័យ ឬករណីវិជ្ជមានជំងឺអុតស្វានេះ នៅកម្ពុជានៅឡើយទេ។ ទោះបីជាជំងឺស្វាមិនទាន់មានករណីនៅក្នុងប្រទេសក៏ដោយ ប៉ុន្តែលោកស្រីអំពាវនាវដល់ពលរដ្ឋដែលរស់នៅក្នុងប្រទេស ត្រូវមានការប្រុងប្រយ័ត្នខ្ពស់ជាប់ជានិច្ច ពោលគឺទាំងបុគ្គល គ្រួសារ និងសហគមន៍ត្រូវតែបន្តអនុវត្តវិធានការបង្ការជំងឺផ្ទាល់ខ្លួន។
លោកស្រី ក៏បានស្នើដល់គ្រប់មន្ទីរពេទ្យ និងមណ្ឌលសុខភាពត្រូវតាមដាន និងរាយការណ៍ករណីសង្ស័យណាមួយ ដែលកើតមានឡើងដើម្បីបន្តការស៊ើបអង្កេត ដ្បិតការពង្រឹងប្រព័ន្ធតាមដានជំងឺនៅតាមមន្ទីរពេទ្យនានា ពិតជាមានសារៈសំខាន់ជាទីបំផុត។
ជុំវិញបញ្ហានេះ លោកវេជ្ជបណ្ឌិត គួច ម៉េងលី ដែលមានឯកទេសផ្នែកសុខភាពសាធារណៈ បានមានប្រសាសន៍ថា «ជំងឺនេះ គឺឆ្លងពីសត្វទៅមនុស្ស និងឆ្លងពីមនុស្សទៅមនុស្ស តាមរយៈក្អក តាមរយៈទឹករងៃ តាមបំពង់ខ្យល់ តាមភ្នែក ច្រមុះ មាត់ និងតាមយៈកោសិការស្ដើងដែលងាយជ្រាបចូល»។
លោកសង្កត់ធ្ងន់ថា បើនិយាយជារួម ជំងឺអុតស្វានេះ គឺស្រដៀងនឹងជំងឺអុតស្វាយដែរ តែមានសភាពស្រាលជាងជំងឺអុតស្វាយ ប៉ុន្តែបើមិនថែទាំសុខភាពឱ្យបានហ្មត់ចត់ទេ វាក៏អាចបណ្តាលឱ្យមានគ្រោះថ្នាក់ដល់ជីវិតដែរ។
បើតាមលោក ម៉ម ប៊ុនហេង បានអះអាងថា មិនទាន់មានការហាមឃាត់អ្នកដំណើរមកពីប្រទេសណាមួយចូលមកកម្ពុជានោះទេ គ្រាន់តែមានការប្រុងប្រយ័ត្ន និងតាមដានស្ថានភាពអ្នកដំណើរចូលមកកម្ពុជាក្នុងករណីសង្ស័យណាមួយ។
ជាមួយនឹងគ្នានេះ ក្រសួងសុខាភិបាល ប្តេជ្ញាពង្រឹងតាមដានជំងឺនៅតាមមន្ទីរពេទ្យនានា បើទោះជាមិនទាន់មានការរាតត្បាតជំងឺនៅក្នុងប្រទេសឡើយក្តី ដើម្បីអាចរកករណីសង្ស័យ ឬករណីឆ្លងលឿន ដែលអាចចាត់វិធានការសុខាភិបាលបានទាន់ពេលវេលា ចៀសវាងការឆ្លងក្នុងគ្រួសារ និងសហគមន៍៕
អត្ថបទទាក់ទង
.jpg)
