មជ្ឈមណ្ឌលភាសា Aii របស់ឧកញ៉ា គួច ម៉េងលី ពីរទៀតត្រៀមបើកទ្វារឱ្យសិស្សរៀន ឆាប់ៗនេះ
Admin
មជ្ឈមណ្ឌលភាសា អេ អាយ អាយ របស់ឧកញ៉ា វេជ្ជបណ្ឌិត គួច ម៉េងលី ដ៏ថ្មីសន្លាងពីរទៀត នៅសាខាផ្សារថ្មី និងសាខាចោមចៅកំពុងត្រៀមបើកទ្វារទទួលសិស្សចូលរៀន នៅកំលុងខែមករា ឆ្នាំ២០១៩ ខាងមុខនេះ។ វត្តមានសាខាថ្មីទាំងពីរនេះ លេចឡើងជារូបរាងបន្ទាប់ពីមជ្ឈមណ្ឌលបណ្ដុះបណ្ដាលភាសាបរទេសមួយនេះ ទទួលបានជោគជ័យខ្លាំង នៅក្នុងវិស័យអប់រំរហូតខ្វះកន្លែងឱ្យសិស្សរៀន ទើបមជ្ឈមណ្ឌលភាសា Aii ព្យាយាមពង្រីកសាខារបស់ខ្លួន ដើម្បីស្របទៅនឹងសំណូមពរពីអ្នកណាព្យាបាលសិស្ស។
ក្នុងបទសម្ភាស ជាមួយ គេហទំព័រ ឌិ អ៊ីនធ័រខន រ៉ូស្ទ័រ លោក ឡាយ សុភា (Sophea M. Lay) ប្រធានមជ្ឈមណ្ឌលភាសា អេ អាយ អាយ (Aii Language Center) ឱ្យដឹងថា ដោយសារវិសាលភាព សាលា រៀនពោរពេញដោយថាមពល មានភាពរីកចម្រើន និងវិវឌ្ឍឥតឈប់ឈរនូវកំណើនសិស្សចេះតែកើនឡើងជាលំដាប់ពីមួយឆ្នាំទៅមួយឆ្នាំ ដោយទទួលបានទំនុកចិត្តពីសិស្សានុសិស្ស អ្នក អាណាព្យាបាល និងមាតាបិតាសិស្ស ជាហេតុជំរុញមជ្ឈមណ្ឌលភាសា អេ អាយ អាយ ឱ្យបន្ថែមសាខាតាមសំណូមពររបស់សាធារណជន។
លោក សុភា បន្តថា «បើតាមគម្រោងចក្ខុវិស័យក្រុមហ៊ុន ម៉េងលី ជេ. គួច អេឌ្យូខេសិន យើងមានគម្រោងពង្រីកសាខាចំនួនប្រាំបួនទៀត ក្នុងរយៈពេល៧ឆ្នាំខាងមុខ តែបច្ចុប្បន្នយើងមានទីតាំង៤សាខារួចហើយ គឺផ្សារថ្មី ចោមចៅ សែនសុខ និងទួលសង្កែ។ ចំពោះសាខាផ្សារថ្មី និងសាខាចោមចៅ នឹងចាប់ផ្ដើមទទួលចុះឈ្មោះសិស្សចូលរៀន នៅខែមករា ឆ្នាំ២០១៩ ខាងមុខនេះ។ ចំណែកសាខាពីរទៀត ដែលមានទីតាំងនៅសែនសុខ និងទួលសង្កែ គឺកំពុងតែញាប់ដៃញាប់ជើងសាងសង់»។
គិតមកដល់បច្ចុប្បន្ននេះ លោក ឡាយ សុភា បញ្ជាក់ថា បរិមាណសិស្សានុសិស្សដែលកំពុងទទួលសេវាកម្មអប់រំ នៅមជ្ឈមណ្ឌលភាសា អេ អាយ អាយ ទាំង៣សាខាមានចំនួនជាង៦០០០នាក់ ហើយតួលេខនេះនឹងកើនឡើងបន្ថែមទៀត នៅពេលសាខាថ្មីបើកវគ្គសិក្សាទទួលសិស្ស នាពេលខាងមុខ។
បើតាមលោក ឡាយ សុភា ដដែល មជ្ឈមណ្ឌលភាសា អេ អាយ អាយ គឺជាសាលាដែលមានគុណភាពអប់រំប្រហាក់ប្រហែលនឹងសាលានៅតាមបណ្តាប្រទេសជឿនលឿនដែរ ដូចជាបន្ទប់សិក្សាមានបំពាក់ដោយគ្រឿងសម្ភារត្រឹមត្រូវតាមស្តង់ដារសាលាអាមេរិក មានឯកសារសម្បូរបែប លោកគ្រូ អ្នកគ្រូ មិនត្រឹមតែមានសញ្ជាតិជាអ្នកប្រើប្រាស់ភាសាអង់គ្លេស និងចិនពីកំណើតនោះទេ តែពួកគាត់ក៏មានគរុកោសល្យផ្នែកអប់រំត្រឹមត្រូវ និងបច្ចេកទេសបង្រៀនល្អសមស្របទៅតាមលក្ខខណ្ឌពហុវប្បធម៌ទៀតផង។ នេះជាមូលហេតុមួយដែលបានផ្ដល់ទំនុកចិត្តដល់អ្នកអាណាព្យាបាលសិស្ស។
លោកបានឱ្យដឹងទៀតថា ភាពលេចធ្លោនៅក្នុងការសិក្សារបស់សិស្សានុសិស្ស នៃមជ្ឈមណ្ឌលភាសា អេ អាយ អាយ ទទួលបានគុណភាពអប់រំពិតប្រាកដ តាមរយៈបង្ហាត់បង្រៀនស្របទៅតាមកម្មវិធីអប់រំដ៏ទំនើបរបស់សាលា ដែលមានកិច្ចសហការរួមគ្នា រាប់ទាំងគណៈគ្រប់គ្រង បុគ្គលិកសិក្សា លោកគ្រូអ្នកគ្រូ សិស្សានុសិស្ស និងជាពិសេសគឺការគាំទ្រពីអ្នកអាណាព្យាបាលទៀតផង។
ទាក់ទងនឹងកម្មវិធីសិក្សាវិញ មហាជនទូទៅអាចនឹងបានជ្រាបខ្លះៗហើយថា ជារៀងរាល់ឆ្នាំ មជ្ឈមណ្ឌលមានក្លឹបសិក្សាបន្ថែមសម្រាប់សិស្សានុសិស្សចូលរួមការប្រកួតប្រជែងលើប្រធានបទផ្សេងៗគ្នា នៅក្នុងតំបន់ និងនៅលើឆាកអន្តរជាតិ ដើម្បីពង្រឹងគុណភាពសិក្សារបស់ខ្លួន។ ទាំងនេះជាកម្មវិធីពិសេសសម្រាប់អ្នកទទួលសេវាអប់រំពីមជ្ឈមណ្ឌលបណ្ដុះបណ្ដាលភាសាបរទេសនេះ។
ក្រៅពីបណ្ដុះបណ្ដាលភាសាអង់គ្លេស និងភាសាចិន ប្រកបដោយគុណភាពខ្ពស់ មជ្ឈមណ្ឌលភាសា អេ អាយ អាយ បានផ្តល់ឱកាសឱ្យសិស្សយល់ដឹងពីសណ្ដាប់ធ្នាប់នៃការរស់នៅក្នុងសង្គមផងដែរ។ ក្នុងនោះសិស្សបានបង្ហាញពីភាពសកម្មភាពរស់រវើកនៅក្នុងកិច្ចការសង្គមជាច្រើនដូចជា ការធ្វើសកម្មភាពដើម្បីស្វែងរកថវិកាជួយដល់មន្ទីរពេទ្យគន្ធបុប្ផា ជនចាស់ជរា ជនអនាថា និងសម្ដារៈសិក្សាដល់កុមារកំព្រាជាដើម។
ដោយសម្លឹងឃើញពីគុណភាព វិន័យ និងសេវាកម្ម នៃមជ្ឈមណ្ឌលភាសា អេ អាយ អាយ មានភាពល្អប្រសើរ និងខុសប្លែកពីសាលារៀនដទៃ មានមាតាបិតាសិស្សនៅរាជធានីភ្នំពេញ ភាគច្រើនបានបញ្ជូនកូនៗរបស់គាត់ឱ្យទៅសិក្សានៅស្ថាប័នបណ្ដុះបណ្ដាលភាសាចិន និងភាសាអង់គ្លេសមួយនេះ។
តំណាងថ្នាក់គ្រប់គ្រង លោក ឡាយ សុភាព ប្រធានមជ្ឈមណ្ឌលភាសា អេ អាយ អាយ សូមថ្លែងអំណរគុណយ៉ាងជ្រាលជ្រៅបំផុតទៅដល់មាតាបិតា អ្នកអាណាព្យាបាល និងសិស្សានុសិស្សទាំងអស់ ដែលតែងតែគាំទ្រ និងផ្តល់ទំនុកចិត្តលើគុណភាពអប់រំរបស់ មជ្ឈមណ្ឌលភាសា អេ អាយ អាយ ដែលនេះ គឺជាការចូលរួមចំណែកកសាងអនាគតកូនៗរបស់លោកអ្នក។
មជ្ឈមណ្ឌលភាសា អេ អាយ អាយ ពិតជាមានសេចក្តីសោមនស្សរីករាយរង់ចាំស្វាគមន៍ចំពោះការអញ្ជើញមកចុះឈ្មោះចូលរៀនរបស់មាតាបិតា អ្នកអាណាព្យាបាល និងប្អូនៗសិស្សានុសិស្ស សម្រាប់សាខាថ្មីទាំងពីររបស់យើងចាប់ពីខែមករា ឆ្នាំ២០១៩ នាពេលខាងមុខនេះតទៅ៕
.jpg)
