បទយកការណ៍៖ អ្នកថតរូបក្នុងរាជធានីភ្នំពេញ ត្អូញត្អែរពិបាករកប្រាក់ ខណៈអ្នកដើរកម្សាន្តប្រើទូរសព្ទ
Admin
ខណៈកំពុងរង់ចាំភ្ញៀវកម្សាន្តនៅមុខព្រះបរមរាជវាំង នៃដងទន្លេចតុមុខ ក្នុងរាជធានីភ្នំពេញ លោក ប៊ន បានប្រាប់សារព័ត៌មាន The Intercon Rooster ថា កាលពីមុនសម្បូរភ្ញៀវមកលេងហើយថតរូបយ៉ាងហោចណាសក៏ម្នាក់មួយសន្លឹកដែរ។ តែដោយសារបញ្ហាកូវីដ ហើយមនុស្សមិនសូវដើរផង ម្យ៉ាងអ្នកទេសចរមិនសូវហ៊ានប្រាស្រ័យជាមួយយើង ដើម្បីថតរូបឱ្យទៀត។
ដោយដាក់កាបូបពីក្រោយ អមជាមួយខ្សែកាមេរ៉ានៅជាប់នឹងក ដោយមានស្រុកកំណើតនៅខេត្តព្រៃវែង អ្នកអាជីពថតរូបរូបនេះបាននិយាយថា៖ «ខ្ញុំចាប់អាជីពថតនេះជិត២០ឆ្នាំមក តែឥឡូវនេះពិបាកណាស់ យ៉ាប់រកចំណូលមិនសូវបានដូចមុន ម៉ាព្រឹកទើបបានពីរសន្លឹក ហើយរូបមួយសន្លឹកតម្លៃចន្លោះពី៥ពាន់ទៅមួយម៉ឺនរៀល បើភ្ញៀវត្រូវការស៊ុមអាចមួយប៉ុស្តិ៍បាន១ម៉ឺន៥ពាន់រៀលអ៊ីចឹងទៅ វាខុសគ្នាឆ្ងាយដែលកាលមុន ក្នុងមួយថ្ងៃថតឱ្យភ្ញៀវចន្លោះពី៣០ ទៅ៤០សន្លឹកឯណោះ»។
ដោយកំពុងឈរផ្តិតរូបពីរសន្លឹក លោក ប៊ន បានបន្ថែមថា «ដោយសារកូវីដ ដូច្នេះជាងថតរូបលោកក៏ដូចជាអ្នកផ្សេងៗទៀត រកចំណូលមិនសូវបានទេ បើមានរោងការទៅចេះតែទៅថតទៅ តែការហ្នឹងក៏ខ្សត់ទៅទៀត មួយខែបានពីរទៅបីរោងហ្នឹង»។
មិនខុសគ្នាប៉ុន្មាន អ្នកប្រកបរបរជាជាងថតរូបនៅមុខព្រះបរមរាជវាំងដូចគ្នា លោក មៃ ធែល ស្ថិតក្នុងវ័យ៦០ឆ្នាំ បានឱ្យដឹងថា ភាគច្រើនភ្ញៀវមកពីជនបទចូលចិត្តថតរូបច្រើនជាងអ្នកនៅទីក្រុងភ្នំពេញ។ លោកបញ្ជាក់ដូច្នេះថា ប្រាក់ចំណូលបានពីការថតរូប ចំណេញតិចតូចប៉ុណ្ណោះ ព្រោះត្រូវចំណាយទៅលើទឹកថ្នាំ និងម៉ាស៊ីនព្រីន បើប៉ះចំភ្ញៀវសាញថ្លៃទៀត គឺសឹងតែមិនចំណេញសោះតែម្តង ខណៈរូបសន្លឹកធំត្រូវលក់ខ្ទង់១ម៉ឺនរៀល អតិថិជនសុំចុះត្រឹម៥ពាន់រៀល។
ស្ថិតក្នុងវ័យចំណាស់ លោក មៃ ធែល អះអាងថា មិនទាន់មានបំណងបោះបង់អាជីពនេះឡើយ ដោយសារក្តីស្រឡាញ់ជ្រាលជ្រៅលើវិស័យថតរូប ដោយលោកថា នឹងចិញ្ចឹមចិត្តស្រឡាញ់អាជីពជាជាងថតរូបជារៀងរហូត។ «ខ្ញុំចាប់យកអាជីពជាអ្នកថតរូបនេះចូល៣០ឆ្នាំមកហើយ តាំងពីស្តេចចូលស្រុកឆ្នាំ៩៣ (១៩៩៣) នៅទីនេះរហូតមិនទៅណាតាំងពីមាត់ទន្លេមានព្រៃក្រាស់ និងសម្បូរទៅដោយខ្សាច់។ ខ្ញុំស្រឡាញ់អាជីពនេះណាស់ ហើយខ្ញុំនឹងបន្តអាជីពមួយនេះរហូតមិនបោះបង់ទេ ម្យ៉ាងយើងវ័យកាន់តែចាស់ទៅហើយ ទៅធ្វើការផ្សេងក៏គេមិនយក ចំណាស់ខ្ញុំបើជាមន្ត្រីរាជការ គឺជិតរ៉ឺត្រែតទៅទៀត»។
ក្នុងសម្លៀកបំពាក់អាវកាម៉ែលពណ៌ទឹកប៊ិកក្រម៉ៅដៃវែង ដែលកំពុងឈររង់ចាំភ្ញៀវមកថតរូប អមជាមួយនឹងការឱបកាម៉េពីមុខផងនោះ អ្នកជំនាញថតរូបចាស់វស្សារូបនេះ បានរំលឹកឡើងថា «កាលពីជំនាន់១០-២០ឆ្នាំមុន ខ្ញុំថតបានច្រើនណាស់ ដល់មកសម័យគេជឿនលឿននេះ យើងថតអត់បានទេ ដោយសារអី ដោយសារគេមានទូរសព្ទទំនើបៗថតខ្លួនឯង អ៊ីចឹងគេមិនសូវថតទេសព្វថ្ងៃហ្នឹង។ រាល់ថ្ងៃនេះ មានអាកូវីដទៀត លែងមានអ្នកមកដើរលេងចប់បណ្តោយគ្មានបានអីទេ បានតែមួយថ្ងៃ១ម៉ឺន២ម៉ឺនហ្នឹងឯងវាមិនអត់សោះទេ ព្រោះគេសុទ្ធតែទូរសព្ទទំនើបគ្រប់ដៃអស់ហើយ»។
ស្របពេលដែលកម្ពុជាកំពុងតែមានការអភិវឌ្ឍ សម្ភារៈបរិក្ខារទំនើបៗជាច្រើនប្រភេទត្រូវបាននាំចូលពីបរទេស ក្នុងនោះទូរសព្ទស្មាតហ្វូនទំនើបៗ និងមានតម្លៃធូរថ្លៃជាទីចាប់អារម្មណ៍ពីសំណាក់យុវជននិងអ្នកប្រើប្រាស់គ្រប់ស្រទាប់វណ្ណៈ ដែលនាំឱ្យអ្នកប្រកបមុខរបរថតរូបជាច្រើន ជួបការលំបាកក្នុងការរកចំណូល ក៏ដូចជាទាក់ទាញភ្ញៀវឱ្យថតរូប។
ស្ថិតនៅក្នុងថ្ងៃដដែលនេះ លោក មៃ ធែល បានបន្តលើកឡើងប្រាប់ពីដូច្នេះថា៖ «នៅពេលដែលអ្នកមកដើរលេងគេបាចចំណីឱ្យព្រាបអីចឹង ខ្ញុំសួរថា ក្មួយ ប្អូន ឬអ៊ំ បើគេបងខ្ញុំថា ត្រូវការថតរូបជុំគ្នាម៉ាប៉ុស្តិ៍ទៅទុកជាអនុស្សាវរីយ ហើយខ្លះគេថា ទូរសព្ទខ្ញុំទំនើបណាស់អ៊ំ ថតច្បាស់ល្អជាងម៉ាស៊ីនអ៊ំឯងផង មានចឹងអីទៅ ខ្លះគេអាណិតក៏គេថតទៅ»។
ពាក់ព័ន្ធបញ្ហានេះ យុវតី អឿន រីណា និងមិត្តភក្តិផ្សេងទៀតដែលបានមកលេងកម្សាន្តនៅមុខព្រះបរមរាជវាំង បានលើកឡើងស្រដៀងគ្នាថា ជាទូទៅពួកគេចូលចិត្តថតរូបក្នុងទូរសព្ទដៃច្រើនជាង ព្រោះអាចផ្ញើរូបទៅក្រុមគ្រួសារ ឬមិត្តភក្តិបានភ្លាមៗ ម្យ៉ាងក្នុងទូរសព្ទដៃអាចកែរូបភាព ថែមថយពណ៌បានតាមចិត្តមុននឹងបង្ហោះលើបណ្តាញសង្គម ចំពោះរូបសន្លឹកមិនដឹងថាយកធ្វើអ្វី ឬយកទៅណានោះទេ។
តែទោះជាយ៉ាងណា អ្នកថតរូបនៅមុខព្រះបរមរាជវាំងបានស្នើអ្នកដើរកម្សាន្ត និងស្ថាប័នពាក់ព័ន្ធបន្តចូលរួមលើកស្ទួយវិស័យថតរូបបែបប្រពៃណី ដើម្បីកុំឱ្យវិស័យនេះបាត់បង់នាថ្ងៃអនាគត៕
.jpg)
