នូវ ប៊ុណ្ណារក្សសត្យា ៖ ប្ដូរទម្លាប់ពីសរសេរអក្សរមិនស្អាត ទៅជាអក្សរស្អាត
Admin
អ្នកសិក្សាភាគច្រើន មិនមែនសុទ្ធតែអក្សរស្អាតៗនោះទេ តែបើសរសេរអក្សរឱ្យស្អាតវិញ ក៏មិនមែនងាយស្រួលប៉ុន្មានឡើយ គឺត្រូវការផ្ចត់ផ្ចង់ យកចិត្តទុកដាក់ និងដឹងគន្លឹះខ្លះៗពីអ្នកអក្សរស្អាតផងដែរ ទើបអាចកែទម្លាប់ពីសរសេរអក្សរមិនស្អាត ទៅជាអក្សរស្អាតបាន។
ថ្ងៃនេះ នូវ ប៊ុណ្ណារក្សសត្យា បានចែករំលែកបទពិសោធស្ដីពី ប្ដូរទម្លាប់សរសេរអក្សរមិនស្អាត ទៅជាអក្សរស្អាត ដោយចំណាយពេលម្ដងបន្ដិចៗពី២ ទៅ៣ខែ យ៉ាងច្រើនបំផុត។ ក្នុងនេះ បណ្ណារក្សសត្យា បានឱ្យដឹងថា ពីមុនៗមកឱ្យតែសរសេរអក្សរម្ដងៗ ត្រូវមិត្តភក្ដិមួយចំនួន នាំគ្នាសើចចំអក និងបង្អាប់ជាញយៗ ដោយសារតែសរសេរអក្សរអាក្រក់ មិនស្អាតដូចគេ។ តែចាប់ផ្ដើមដើមឆ្នាំសិក្សានៃថ្នាក់ទី១២ ខ្លួនបានប្ដេជ្ញាថា នឹងកែទម្លាប់ពីអក្សរអាក្រក់ ទៅជាអក្សរស្អាតឱ្យទាល់តែបាន។
យុវសិស្សរូបនេះបញ្ជាក់ថា ថ្ងៃដំបូង គឺចាប់ផ្ដើមសរសេរអក្សរមួយៗ ហើយយឺតៗបំផុត តែសរសេរបែបនេះបានត្រឹមតែ២ខែ ចាប់ផ្ដើមប្លែកខ្លាំងទើបដឹងថា អក្សរខ្លួនបានវិវត្តន៍ខុសឆ្ងាយពីមុនខ្លាំងណាស់ អក្សរក៏ចាប់ផ្ដើមរីកចម្រើនខ្លាំង ហើយមិត្តភក្ដិធ្លាប់តែនិយាយថា ពិបាកអាន និងធ្លាប់តែបង្អាប់នោះ បែរជាភ្ញាក់ផ្អើល ហើយពោលពាក្យសរសើរសឹងគ្រប់ៗគ្នាថា អក្សរស្អាត។
ទឹកមុខញញិម អមដោយកាយវិការមួយៗ យុវសិស្សវ័យ១៨ឆ្នាំ រូបនេះបន្តថា “ទាំងនេះជាបទពិសោធផ្ទាល់របស់ខ្ញុំ ព្រោះតាំងពីក្រោមថ្នាក់ទី១១ អក្សរខ្ញុំពិតជាពិបាកអានមែន តែនៅពេលចាប់ផ្ដើមកែទម្លាប់សរសេរ ពីមួយថ្ងៃទៅមួយថ្ងៃនោះ អក្សរចាប់រីកចម្រើនខ្លាំង ហើយលោកគ្រូ អ្នកគ្រូ នៅពេលឃើញអក្សរប្រែប្រួលបែបនេះ គាត់តែងលើកទឹកចិត្តខ្ញុំជានិច្ច”។
យុវសិស្សរូបនេះបន្ថែមថា ការប្ដូរទម្លាប់សរសេរបែបនេះ ប្រៀបបានដូចយើងរៀនសរសេរអក្សរ ក ខ គ ឃ រហូតដល់ អ មួយៗឡើងវិញជាដើមអ៊ីចឹង។ តែនៅពេលរៀនសរសេរយឺតម្ដងបន្តិចៗ ដោយអត់ធ្មត់ ហ្មត់ចត់ និងផ្ចត់ផ្ចង់នោះ ច្បាស់ណាស់នឹងប្រែក្លាយពីអក្សរមិនស្អាត ទៅជាអក្សរស្អាត តែនៅពេលអក្សរស្អាតហើយ នោះយើងអាចសរសេរឱ្យលឿនដូចមុនៗវិញបាន ហើយស្អាត គួរឱ្យទាក់ទាញ និងចង់ឱ្យអានថែមទៀត។
សូមជម្រាបថា នូវ ប៊ុណ្ណារក្សសត្យា សព្វថ្ងៃនេះ ជាសិស្សថ្នាក់ទី១២ នៃសាលារៀន អន្តរទ្វីប អាមេរិកាំង សាខាម៉ៅសេទុង។ យុវសិស្សរូបនេះ ក៏ជាសិស្សពូកែគ្រប់មុខវិជ្ជា និងជាសិស្សឆ្នើម ប្រចាំសាលារៀន អន្តរទ្វីប អាមេរិកាំង ផងដែរ។ ពោលដើមឆ្នាំសិក្សា រហូតបច្ចុប្បន្ននេះ ប៊ុណ្ណារក្សសត្យា តែងទទួលបាននិទ្ទេស A មិនដែលខានម្ដងណាឡើយ៕
.jpg)
