ក្រសួងអំពាវនាវឱ្យឈប់ទិញ «ឱសថ និងផលិតផលបំប៉នសុខភាព» តាមប្រព័ន្ធអនឡាញ
ក្នុងបច្ចុប្បន្ននេះ ឱសថក្លែងក្លាយ និងអន់គុណភាព កំពុងបង្កជាបញ្ហាសុខភាពសាធារណៈ ទាំងនៅក្នុងតំបន់ និង ទូទាំងពិភពលោក។ ទន្ទឹមនឹងនេះ ក្រសួងសុខាភិបាលកម្ពុជាសង្កេតឃើញមានការផ្សព្វផ្សាយលក់ឱសថតាមប្រព័ន្ធអនឡាញ ដែលជាបញ្ហាមួយគួរឱ្យព្រួយបារម្ភចំពោះផលប៉ះពាល់ធ្ងន់ធ្ងរដល់សុខភាព។ ក្នុងចំណោមឱសថទាំងនោះ មានមួយចំនួនជាឱសថគ្មានប្រភពច្បាស់លាស់ និងមិនមានចុះបញ្ជិកាត្រឹមត្រូវពីក្រសួងសុខាភិបាល ហើយអាចជាឱសថក្លែងក្លាយ ឬអន់គុណភាពផងដែរ។
ក្នុងសិក្ខាសាលាស្តីពីការអនុវត្តច្បាប់ពាក់ព័ន្ធនឹងការប្រយុទ្ធប្រឆាំងឱសថក្លែងក្លាយ និងអន់គុណភាព នៅខេត្តកែបថ្ងៃនេះ លោកស្រី ឱ វណ្ណឌីន បានលើកឡើងថា ឱសថ គឺជាផ្នែកមួយចាំបាច់មិនអាចខ្វះបានសម្រាប់វិស័យសុខាភិបាល ដើម្បីបង្ការ ថែទាំ និងព្យាបាលសុខភាពមនុស្សគ្រប់រូប។ ប៉ុន្តែឱសថក្លែងក្លាយ និងអន់គុណភាព គឺជាអាវុធដ៏ស្ងៀមស្ងាត់ដែលអាចសម្លាប់មនុស្សបាន។
លោកស្រីបន្តថា គុណភាពឱសថមានទំនាក់ទំនងគ្នាយ៉ាងជិតស្និទ្ធនឹងគុណភាពព្យាបាល ប្រសិនបើឱសថមានគុណភាពមិនត្រឹមត្រូវតាមបទដ្ឋានបច្ចេកទេសទេនោះ គុណភាពព្យាបាលមិនអាចទទួលជោគជ័យឡើយ ទោះបីជាគ្រូពេទ្យនោះមានជំនាញយ៉ាងណាក៏ដោយ ហើយវាអាចបង្កឱ្យមានគ្រោះថ្នាក់ខ្ពស់ដល់សុខភាព សុវត្ថិភាពសង្គម និងធ្វើឱ្យរាំងស្ទះដល់កំណើនសេដ្ឋកិច្ចជាតិផងដែរ។
ទោះយ៉ាងណាក្រសួងសុខាភិបាល បានសង្កត់ធ្ងន់ថា ក្រសួងបានដាក់ចេញយន្តការគ្រប់គ្រង និងត្រួតពិនិត្យឱសថ នៅក្នុងប្រទេស ដើម្បីប្រយុទ្ធប្រឆាំងឱសថក្លែងក្លាយ និងអន់គុណភាព តាមរយៈតម្រូវឱ្យចុះទិដ្ឋាការបញ្ជិកាផលិតផលឱសថ មុនអនុញ្ញាតឱ្យដាក់លក់លើទីផ្សារ និងមិនឱ្យប្រើប្រាស់ឱសថដែលគ្មានលេខទិដ្ឋាការ ឬបញ្ជិកាពីក្រសួងសុខាភិបាល។
ជាងនេះទៅទៀត គឺត្រូវត្រួតពិនិត្យ តាមដាន និងស្រាវជ្រាវជាប្រចាំនូវឱសថដែលបានចែកចាយ និងលក់នៅលើទីផ្សារ ព្រមទាំងចាត់វិធានការតាមផ្លូវច្បាប់នានាពាក់ព័ន្ធនឹងបទល្មើសផ្នែកឱសថ និងគ្រឿសម្អាង។
ពាក់ព័ន្ធនឹងបញ្ហានេះ ក្រសួងសុខាភិបាលបានអំពាវនាវឱ្យគ្រឹះស្ថានលក់ឱសថទាំងអស់ ត្រូវលក់តែឱសថណាដែលមានលេខទិដ្ឋាការ ឬបញ្ជិកាពីក្រសួងសុខាភិបាល និងណែនាំឱ្យណែនាំពលរដ្ឋទិញឱសថ និងផលិតផលបំប៉នសុខភាពតែពីឱសថស្ថានស្របច្បាប់ ដោយត្រូវពិនិត្យមើលនូវលតាប័ត្រទិដ្ឋាការ ឬបញ្ជិកានៅលើសម្បកវេចខ្ចប់ឱសថ និងអំពាវនាវឱ្យឈប់ទិញឱសថ និងផលិតផលបំប៉នសុខភាព តាមប្រព័ន្ធអនឡាញ។
ដោយឡែកសម្រាប់ពលរដ្ឋដែលមានជំងឺ ឬបញ្ហាសុខភាពផ្សេងៗវិញ ត្រូវបានក្រសួងសុខាភិបាលណែនាំឱ្យត្រូវទៅពិគ្រោះជាមួយគ្រូពេទ្យជំនាញ ដើម្បីទទួលបានវេជ្ជបញ្ជាសម្រាប់តម្រូវការទិញឱសថប្រើប្រាស់ និងមិនត្រូវប្រើប្រាស់ឱសថដោយគ្មានវេជ្ជបញ្ជាឡើយ។ បើពុំដូច្នោះទេ មេរោគមានភាពស៊ាំនឹងឱសថ ជាពិសេសបង្កគ្រោះថ្នាក់នានា ដែលកើតឡើងដោយការប្រើប្រាស់ឱសថមិនត្រឹមត្រូវ។
ជាមួយនឹងគ្នានេះដែរ អ្នកឯកទេសផ្នែកសុខភាពសាធារណៈ គឺវេជ្ជបណ្ឌិត គួច ម៉េងលី បានលើកឡើងពីផលប៉ះពាល់ជាច្រើនដែលបណ្តាលមកពីការប្រើប្រាស់ឱសថក្លែងក្លាយចំពោះរាជរដ្ឋាភិបាល ស្ថាប័នសុខាភិបាល និងអ្នកជំងឺ។
លោកបញ្ជាក់ច្បាស់ៗថា ចំពោះអ្នកជំងឺដែលបានប្រើប្រាស់នូវឱសថក្លែងក្លាយនេះ គឺវាមិនមែនប្រសិទ្ធិភាព ឬមានប្រសិទ្ធិភាពតិចតួចសម្រាប់ការព្យាបាល និងអាចបន្តគ្រោះថ្នាក់។ ចំណែកស្ថាប័នសុខាភិបាល និងរាជរដ្ឋាភិបាល ក៏ទទួលរងផលប៉ះពាល់ផងដែរ។ ជាពិសេសពលរដ្ឋអាចបាត់បង់ទំនុកចិត្តលើកម្មវិធី និងប្រព័ន្ធសុខាភិបាលទៅលើការព្យាបាល ខណៈរាជរដ្ឋាភិបាលត្រូវខាតបង់ថវិកាច្រើនក្នុងការរៀបចំប្រព័ន្ធសុខាភិបាល។
តាមមាត្រា១០នៃច្បាប់ស្តីពីការគ្រប់គ្រងឱសថ បុគ្គលណាដែលលក់ឱសថគ្មានទិដ្ឋាការ ឬបញ្ជីការ ឬឱសថដែលក្រសួងសុខាភិបាលបានហាមឃាត់ត្រូវផ្តន្ទាទោសពិន័យជាប្រាក់ពី ១ ០០០០០០ (មួយលានរៀល) ដល់ ១០ ០០០ ០០០ (ដប់លានរៀល) និងផ្អាកផលិតកម្ម អាហរ័ណនីហរ័ណកម្ម និងពាណិជ្ជកម្មឱសថពី ១ខែ ដល់៣ខែ ឬទោសណាមួយក្នុងចំណោមទោសទាំងពីរខាងលើដោយពុំទាន់គិតដល់ការផ្តន្ទាទោសពីបទល្មើសផ្សេងៗទៀត។
មាត្រា១០នៃច្បាប់ដដែល បញ្ជាក់ថា ក្រសួងសុខាភិបាលមានសិទ្ធិផ្អាកជាបណ្ដោះអាសន្នភ្លាមៗនូវ ការផ្សព្វផ្សាយឱសថ អាហរ័ណនីហរ័ណកម្ម និងពាណិជ្ជកម្មឱសថដែលល្មើស រួចរៀបចំសំណុំរឿងបញ្ជូនទៅតុលាការ៕
អត្ថបទទាក់ទង
.jpg)
