«អាថ៌កំបាំងអំណាច» រឿងខ្លីបែបអប់រំ
Admin
ស្ថិតក្នុងភូមិដាច់ស្រយាលមួយឆ្ងាយដាច់ពីភូមិផ្សេងៗដទៃទៀត មានលោកតាវ័យចំណាស់ម្នាក់ដែលមានចំណេះចេះដឹងជាងគេនៅក្នុងភូមិ។ អ្នកភូមិគោរពស្រឡាញ់គាត់គ្រប់ៗគ្នា។ រាល់កិច្ចការណាដែលមិនយល់ឬឆ្ងល់ គេតែងតែមកសួរសុំយោបល់ពីគាត់មិនដែលខាន។ ជារៀងរាល់ថ្ងៃអាទិត្យ លោកតាតែងតែចំណាយពេលបន្ដិចបន្ដួចនិទានរឿងខ្លីៗបែបអប់រំដល់ក្មេងៗស្ដាប់។ អាទិត្យនេះ ក្មេងៗទាំងតូចទាំងជំទង់មកជួបជុំគ្នានៅលើមុខខ្ទមរបស់គាត់។ ក្មេងខ្លះអង្គុយលើគល់ឈើងាប់ ក្មេងខ្លះអង្គុយលើកៅអី និងក្មេងខ្លះទៀតអង្គុយលើកន្ទេលស្លឹកត្នោត។ លោកតាដើរចេញពីខ្ទមដៃម្ខាងកាន់កែវ ដៃម្ខាងកាន់ប៉ាន់តែ ហើយមកអង្គុយលើគ្រែក្បែរខ្ទម។
លោកតា៖ អើ! ថ្ងៃនេះ តានឹងនិទានរឿងពិសេសមួយឱ្យចៅៗស្ដាប់! មើលមានចៅណាចង់ស្ដាប់រឿងខ្លះ?
ក្មេងៗ៖ ខ្ញុំៗៗៗៗ
លោកតា៖ អើ! បើចង់ស្ដាប់រឿង អ៊ីចឹងនាំគ្នាស្ងាត់ទៅ!
ក្មេងៗ៖ បាទៗៗៗតា
លោកតា៖ ថ្ងៃនេះលោកតានឹងនិទានរឿងមួយដែលមានចំណងជើងថា “អាថ៌កំបាំងអំណាច”! កាលពីព្រេងនាយ មានមេទ័ពម្នាក់ពូកែនិងល្បីល្បាញខ្លាំងខាងធ្វើសឹកសង្គ្រាម។ ការធ្វើសង្រ្គាមរបស់គាត់មិនដែលស្គាល់ពាក្យបរាជ័យម្ដងណាឡើយ។ នៅក្នុងនគរទាំងមូលតែងតែកោតសរសើរនឹងភាពប៉ិនប្រសប់នៃការធ្វើ
សង្គ្រាមរបស់មេទ័ពម្នាក់ហ្នឹងណាស់។ ថ្ងៃមួយមានមេទ័ពម្នាក់ទៀតត្រូវជាមិត្ដសម្លាញ់នឹងគ្នាបានមកសួរនាំពីការធ្វើសឹកសង្រ្គាមជោគជ័យរហូត និងមិនដែលស្គាល់ពាក្យថាបរាជ័យឡើយ។ សម្លាញ់មេទ័ព តើគ្នាអាចសួរឯងបន្ដិចបានទេ? គឺអំពីការធ្វើសង្រ្គាមមិនដែលបរាជ័យឯង តើសម្លាញ់បានរៀនក្បួនសិល្ប៍សាស្រ្ដអ្វីបានជាមិនដែលបរាជ័យសោះ?
មិនលាក់បាំងសម្លាញ់ឯងទេ ការធ្វើសឹកទទួលជោគជ័យរបស់គ្នាទាំងប៉ុន្មាន គឺបានមកពីអំណាចនៃស្រ្ដីដែលស្មោះត្រង់នឹងគ្នា ហើយហ៊ានធ្វើគ្រប់យ៉ាងទាំងអស់ដើម្បីគ្នា។ (មេទ័ពមិនដែលស្គាល់បរាជ័យនិយាយ)
ស្រី! (មេទ័ពជាសម្លាញ់លន់មាត់) ស្រីម្នាក់ណាទៅសម្លាញ់? ហេតុម្ដេចបានជាគាត់ស្ម័គ្រចិត្ដជួយឯង?
មែនហើយសម្លាញ់! ស្រ្ដីម្នាក់ដែលគ្នានិយាយនោះ គឺម្នាក់ដែលលើកទឹកសម្លាញ់ឯងមិញហ្នឹង។ គាត់ជាស្ដ្រីម្នាក់ដ៏មានរូបសម្រស់ស្រស់ស្អាត ឫកពារថ្លៃថ្នូរ មានចំណេះដឹងខ្ពស់ខ្ពង់ ហើយក៏ប្រពន្ធរបស់គ្នាហ្នឹងឯង។
ហេតុដូចម្ដេចបានជាសម្លាញ់ឯងថា ការធ្វើសឹកទទួលជោគជ័យរហូតមកពីគាត់ទៅវិញ? (ល្បះមេទ័ពជាសម្លាញ់ឈ្លេចសួរចង់ដឹងច្បាស់)។
មេទ័ពមិនដែលស្គាល់ពាក្យបរាជ័យនិយាយថា មិនមានលាក់បាំងអ្វីពីសម្លាញ់ឯងទេ ការធ្វើសឹកសង្រ្គាមទាមទារខ្លាំងបំផុត គឺកម្លាំងចិត្ដ ទោះដឹងខ្លួនបរាជ័យតែមិនចុះចាញ់ តស៊ូច្បាំងរហូត មិនបាក់ទឹកចិត្ដ មានការជំរុញ លើកទឹកចិត្ដ ផ្ដល់កម្លាំងចិត្ដ ផ្ដល់ភាពកក់ក្ដៅ នោះហើយជាចរន្ដថាមវ័ន្តមួយដែលរុញឱ្យទទួលជោគជ័យរហូត។ ប្រពន្ធរបស់ខ្ញុំដែលគ្នានិយាយ គឺជាអំណាចស្រមោលនៃជោគជ័យរបស់ខ្ញុំតែម្ដង។ ពេលខ្ញុំបាក់ទឹកចិត្ដ ពិបាកចិត្ដ គិតមិនចេញ ស្មុគស្មាញ គឺមានតែគាត់ម្នាក់គត់ដែលនៅកៀកខ្ញុំជាងគេ។ គាត់ចាំជួយខ្ញុំគ្រប់ពេលវេលាទាំងអស់។ គាត់ព្រមទទួលស្ដាប់នូវទុក្ខវេទនា និងសេចក្ដីឈឺចាប់របស់ខ្ញុំដោយគ្មានលក្ខខណ្ឌ។ ខ្ញុំចង់ប្រាប់សម្លាញ់ថា ជោគជ័យអាចកើតទៅបាន គឺអាស្រ័យភាពមោះមុត ការព្យាយាម ការតស៊ូ ការជម្នះ ការមិនព្រមចុះចាញ់នឹងឧបសគ្គជាដើម។ ពិសេសសម្រាប់រូបខ្ញុំផ្ទាល់ ជោគជ័យរបស់ខ្ញុំអាចកើតមានឡើងទៅបាន គឺដោយសារអំណាចនៃការគោរពស្រឡាញ់ពីប្រពន្ធរបស់ខ្ញុំ។ ទីមួយ គាត់ជាអ្នកធ្វើឱ្យគ្រួសារមានភាពកក់ក្ដៅ មានសុភមង្គល មានភាពត្រជាក់ត្រជំ ធ្វើឱ្យខ្ញុំសប្បាយចិត្ដគ្រប់ពេលដែលបាននៅជាមួយនឹងគាត់។ ទីពីរ គាត់មានមនោសញ្ចេតនាស្មោះត្រង់ចំពោះខ្ញុំ។ ទីបី គាត់មានសេចក្ដីអត់ធ្មត់ ស៊ូទ្រាំគ្រប់បែបយ៉ាង គាត់ចេះទប់កំហឹងខ្ញុំ គាត់មិនចេះខឹងច្រឡោតផ្ដេសផ្ដាសនៅពេលដែលខ្ញុំមានសម្ដីមិនល្អដាក់គាត់ ខណៈខ្ញុំមួមៅពីកិច្ចការធ្វើសង្រ្គាម។ ផ្ទុយទៅវិញគាត់បែរជាយកចិត្ដទុកដាក់ជាមួយនឹងខ្ញុំ ផ្ដល់ជាគំនិត វិធីសាស្រ្ដ យុទ្ធសាស្រ្ដល្អៗឱ្យមកខ្ញុំដោយទឹកមុខញញឹមទៅវិញ។ ទីបួន គាត់ក្លាហាន អង់អាច មិនថាក្នុងកាលៈទេសៈណាទេ គាត់ព្រមស្លាប់រស់ជាមួយនឹងខ្ញុំ។ ចំណុចទាំងនេះហើយ ដែលខ្ញុំឈ្នះៗមិនដែលស្គាល់ពាក្យថាចាញ់។
គ្នាយល់អស់ហើយសម្លាញ់! នេះគឺមកពីសម្លាញ់ឯងមានទីប្រឹក្សាដ៏ល្អម្នាក់ ដូច្នេះទើបបានជាសម្លាញ់ឯងធ្វើសឹកសង្រ្គាមមិនដែលបរាជ័យសោះ គឺមកពីកម្លាំងដ៏ខ្លាំងក្លាដែលនៅពីក្រោយខ្នងសម្លាញ់មិនចេះស្រុត។ គ្នាសូមកោតសរសើរនូវវីរៈភាពរបស់ភរិយាសម្លាញ់ឯងដែលស្មោះត្រង់ អង់អាច និងរួមស្លាប់រស់ជាមួយនឹងសម្លាញ់ឯងជាដរាប។
ត្រឹមត្រូវណាស់សម្លាញ់ នេះគឺជាអំណាចអាថ៌កំបាំងរបស់ខ្ញុំ។
ក្រោយពីស្ដាប់រឿងនេះចប់ តើចៅៗយល់យ៉ាងណាដែរចំពោះរឿងនេះ? (លោកតាសួរ)៕
និពន្ធដោយ៖ អឿ ស៊ីណា
ថ្ងៃទី១៧ ខែកុម្ភៈ ឆ្នាំ២០២១
.jpg)
