អ្នកស្រាវជ្រាវវ័យក្មេង AIS ២រូប ឈ្នះមេដាយមាស ក្នុងតំបន់អាស៊ាន និងសហរដ្ឋអាមេរិក
Admin
អ្នកស្រាវជ្រាវវ័យក្មេងតំណាងឱ្យកម្ពុជា៩រូប ឈ្នះមេដាយមាស នៅលើទឹកដីវៀតណាម លើការប្រកួតស្រាវជ្រាវផ្នែកបរិស្ថាន ក្នុងកម្មវិធី 2018 Global Learning Across Boarders (LAB) ដែលមានបណ្ដាប្រទេសក្នុងតំបន់អាស៊ាន និងសហរដ្ឋអាមេរិកចូលរួមប្រកួត។
ក្នុងចំណោមជ័យលាភីមេដាយ៩នាក់នេះ ក៏មានបេក្ខជនឆ្នើម២រូប មកពីសាលារៀន អន្ដរទ្វីប អាមេរិកាំង ដ៏ល្បីឈ្មោះមួយនៅកម្ពុជា។ ក្នុងចំណោមបេក្ខជនឆ្នើមទាំង២រូបនេះ ទី១ បេក្ខជនឈ្មោះ ចាន់ ធា ថ្នាក់ទី១០ និងទី២ បេក្ខជនឈ្មោះ លឹម ហុកអៀង សិស្សថ្នាក់ទី១១។
នាយករងវិទ្យាល័យព្រះស៊ីសុវត្ថិ ទទួលបន្ទុកសាលាជំនាន់ថ្មី និងជាអ្នកដឹកនាំបេក្ខជន លោក សម្យ កំសាន្ត បានឱ្យដឹងថា នេះជាមោទនភាពដ៏ធំធេងមួយ ដែលអ្នកស្រាវជ្រាវវ័យក្មេងទាំងអស់ខិតខំ ប្រឹងប្រែង ស្រាវជ្រាវ និងស្វ័យសិក្សា រហូតឈ្នះមេដាយ សម្រាប់ជាតិមាតុភូមិកម្ពុជាទាំងមូល។ ការជោគជ័យនេះ បានធ្វើឱ្យអន្តរជាតិនៅលើពិភពលោក កាន់តែស្គាល់កម្ពុជាច្បាស់ តាមរយៈវិស័យអប់រំ និងការប្រឹងប្រែងរបស់កូនខ្មែរយើង។
ចាងហ្វាងរងមធ្យមសិក្សាទុតិយភូមិ នៃសាលារៀន អន្តរទ្វីប អាមេរិកាំង លោក ប៉ាំង លាងស៊ីម បានលើកឡើងថា លទ្ធផលដ៏ធំធេងនេះ ជាសញ្ញាល្អមួយសម្រាប់អ្នកស្រាវជ្រាវវ័យក្មេងរបស់កម្ពុជា។ លោកបន្តថា សម័យមុនៗ ធ្លាប់តែឃើញប្រទេសដ៏ទៃទទួលបានមេដាយមាស តែសព្វថ្ងៃនេះ ប្រទេសកម្ពុជាយើង ក៏អាចធ្វើបានដែរ។
ចាងហ្វាងរងរូបនេះ បញ្ជាក់បន្ថែមថា សាលារៀន អន្តរទ្វីប អាមេរិកាំង ហៅកាត់ AIS ដែលពោរពេញទៅដោយសិស្សានុសិស្សមានសក្តានុពល ប្រកបដោយធនធានមនុស្ស ដែលមានលោកគ្រូ អ្នកគ្រូ សុទ្ធសឹងមាននូវបទពិសោធ ទេពកោសល្យ និងគរុកោសល្យខ្ពស់ ក្នុងការបណ្តុះបណ្តាល និងមានគណៈគ្រប់គ្រងប្រកបដោយភាពច្នៃប្រឌិត ព្រមទាំងមានចក្ខុវិស័យច្បាស់លាស់។ លោកបន្តថា សាលា AIS ជាសាលាឯកជនមួយ ផ្ដោតសំខាន់ទៅលើគុណភាព វិន័យ និងសេវាកម្មខ្ពស់ ដល់សិស្សានុសិស្ស។
អ្នកស្រាវជ្រាវវ័យក្មេង និងជាម្ចាស់មេដាយមាស១រូប ក្នុងចំណោម៩នាក់ បេក្ខជន ចាន់ ធា បានឱ្យដឹងថា «ខ្ញុំពិតជារំភើប និងរីករាយខ្លាំងណាស់ ដែលឈ្នះមេដាយមាសនេះ។ ព្រោះលទ្ធផលដ៏ល្អអស្ចារ្យទាំងនេះ ខ្ញុំនឹកស្មានមិនដល់សោះថា ខ្ញុំ និងកូនខ្មែរដទៃទៀតធ្វើបានទេ តែតាមរយៈការប្រកួតនេះ បាននាំមកនូវបទពិសោធ ចំណេះដឹង ចំណេះធ្វើ និងឃើញពិភពលោកកាន់តែធំធេងផងដែរ»។
ចាន់ ធា បន្តថា អ្វីដែលពិសេសនោះ ឆ្លងតាមរយៈជោគជ័យនេះ បានធ្វើឱ្យពិភពលោកស្គាល់ប្រទេសកម្ពុជា ស្គាល់ពីស្នាដៃកូនខ្មែរ និងវប្បធម៌ អារ្យធម៌ខ្មែរ កាន់តែច្បាស់។ បេក្ខជនឆ្នើមរូបនេះ បញ្ជាក់បន្តថា ប្រទេសមួយចំនួនពុំស្គាល់កម្ពុជាទេ តែលទ្ធផលល្អនេះ បានធ្វើឱ្យបរទេសទាំងនោះ ស្គាល់កម្ពុជាកាន់តែច្បាស់ និងមានភាពស្ងប់ស្ងែងផងដែរ។
បេក្ខជនជ័យលាភីមេដាយមាស លឹម ហុកអៀង បានលើកឡើងដែរថា ការជោគជ័យនេះ មិនមែនបានដោយងាយៗនោះទេ គឺបានដោយការតស៊ូ អត់ធ្មត់ និងប្រឹងប្រែងស្វ័យសិក្សាជានិច្ច។ ហុកអៀង បន្តថា “ចំពោះការស្រាវជ្រាវនេះ គឺមិនបោះបង់ចោលទេ ខ្ញុំនឹងប្រឹងប្រែងបន្តទៀត ដើម្បីកាន់តែមានចំណេះដឹង ចំណេះធ្វើ និងបទពិសោធ ក្នុងការស្រាវជ្រាវនេះ”។
យុវសិស្សថ្នាក់ទី១១រូបនេះបញ្ជាក់ថា “ឆ្លងតាមការប្រកួតប្រជែងនៅវៀតណាមនេះ ខ្ញុំទទួលបានបទពិសោធច្រើនជាមួយនឹងមិត្តភក្ដិខ្មែរ និងបរទេស ដែលជាបេក្ខជនប្រកួត”។ តែអ្វីដែលខ្ញុំមិនអាចភ្លេចបាននោះ គឺយើងបេក្ខជនជាជនជាតិខ្មែរ នៅពេលទៅដល់វៀតណាម ពួកយើងពិតជាមានសាមគ្គីភាព សហការ និងរួបរួមគ្នាបានយ៉ាងល្អ។
ខណៈពួកយើងមានឱកាសស្នាក់នៅជាមួយគ្នា យើងតែងពិភាក្សាគ្នា ធ្វើបទបង្ហាញ និងសួរគ្នាទៅវិញទៅមក។ ពួកយើងទោះមិនមែនជាក្រុមជាមួយគ្នា ឬមានភេទផ្ទុយពិតមែន តែពួកយើងពិតជាសហការគ្នាបានល្អខ្លាំងណាស់។ ដូចជានៅថ្ងៃស្អែក ជាថ្ងៃប្រកួតប្រជែងផ្ដាច់ព្រ័ត្រ ខ្ញុំ និងសិស្សខ្មែរយើងដទៃទៀត ភ័យខ្លាំងណាស់ តែការភ័យនេះ ពួកយើងកាន់តែប្រឹងប្រែង គឺនាំគ្នាធ្វើបទបង្ហាញទៅវិញទៅមក រហូតដល់ម៉ោង៣ទាបភ្លឺទៀតផង។ កត្តាទាំងនេះហើយ គឺធ្វើឱ្យសិស្សកម្ពុជាយើង ទទួលបានជោគជ័យដ៏ធំធេង ត្រឡប់ជូនជាតិមាតុភូមិវិញ។ នេះជាការបញ្ជាក់បន្ថែមដោយសិស្សឆ្នើម លឹម ហុកអៀង។
ការប្រកួតនេះ មានជាង៧០ក្រុម ដោយក្រុមនីមួយៗធ្វើបទបង្ហាញទៅលើប្រធានបទផ្សេងៗគ្នា ដែលមានពាក់ព័ន្ធទៅនឹងបញ្ហាប្រឈម ផលបះពាល់បរិស្ថាន និងការបម្រែបម្រួលអាកាសធាតុ នៅកម្ពុជា។ ក្នុងនោះមានប្រធានបទសំខាន់ៗដូចជា ការកែច្នៃធនធានធម្មជាតិ ការស្រាវជ្រាវលើដើមពោធិ៍ និងផលប៉ះពាល់ពីភ្លៀងអាស៊ីតជាដើម។
សូមជម្រាបថា សិស្សានុសិស្ស នៃសាលារៀន អន្តរទ្វីប អាមេរិកាំង តែងទទួលបានមេដាយមាស សំរឹទ្ធ និងមេដាយប្រាក់ ក្នុងការប្រកួតចំណេះដឹងទូទៅផ្សេងៗ ទាំងថ្នាក់ជាតិ និងលើឆាកអន្តរជាតិ នៅលើពិភពលោក។
ការប្រកួតនៅសាធារណរដ្ឋសង្គមនិយមវៀតណាមនេះ បានប្រព្រឹត្តទៅកាលពីថ្ងៃទី១៨ រហូតដល់ថ្ងៃទី២៧ ខែកក្កដា ឆ្នាំ២០១៨ កន្លងទៅ៕
.jpg)
