អ្នកតាមដានវប្បធម៌អះអាងថា ការស្លៀកពាក់មិនសមរមទៅវត្តបានធ្វើប៉ះពាល់ដល់តម្លៃ និងប្រពៃណីខ្មែរ
លោក សំបូរ ម៉ាណារ៉ា សាស្ត្រចារ្យផ្នែកវប្បធម៌ និងប្រវត្តិសាស្ត្រមួយរូប បានប្រាប់ The Intercon Rooster ថា ចំពោះពុទ្ធបរិស័ទវ័យកណ្ដាលដែលមានអាយុចាប់ពី៣០ឆ្នាំឡើងទៅ គឺការស្លៀកពាក់របស់ពួកគាត់ហាក់បានសមរម្យពេលទៅកាន់វត្តអារាមប្រតិបត្តិតាមប្រពៃណីខ្មែរ ប៉ុន្តែមានយុវវ័យមួយចំនួនមិនបានគិតដល់បញ្ហានេះទេ គឺស្លៀកពាក់មិនបានសមរម្យ និងមានអ្នកខ្លះពាក់មួកក្នុងវត្តទៀតផង ដោយក្រុមទាំងនោះអះអាងថាជាសិទ្ធិក្នុងការស្លៀកពាក់របស់ពួកគេ។ លោក សំបូរ ម៉ាណារ៉ា បន្តថា « យើងនៅឃើញយុវវ័យខ្លះៗ ដែលមិនបានគិតដល់បញ្ហានេះ ស្លៀកពាក់មិនត្រឹមត្រូវ ខោរហែកគូទ ខោរហែកក្រលៀន ឬក៏សំពត់ខ្លី ឬក៏ពាក់អាវហ្នឹងវៀលពេក។ល។ ជួនកាលពាក់នៅក្នុងវត្តដើរក្នុងវត្តក៏អ៊ីចឹងដែរ ជួនកាលតែងខ្លួនដូចយើងទៅផ្សារ ផ្សារទំនើបអ៊ីចឹងទៅ»។
លោក សំបូរ ម៉ាណារ៉ា បន្ថែមថា បញ្ហានេះមិនមែនត្រឹមតែអ្នកប្រវត្តិសាស្ត្រ អ្នកឃ្លាំមើលវប្បធម៌អ្នកប្រាប់ទៅយុវជននោះទេ គឺយុវជនត្រូវតែយល់ដឹងដោយខ្លួនឯង ជាពិសេសគឺអាណាព្យាបាលដែលត្រូវណែនាំអំពីទំនៀមទម្លាប់ប្រពៃណីដល់កូនចៅ។
បើតាមលោកសាស្ត្រាចារ្យ សំបូរ ម៉ាណារ៉ា សម្លៀកបំពាក់ដែលសមរម្យសម្រាប់ស្លៀកពាក់ទៅវត្តក្នុងឱកាសបុណ្យទាន បែបសាសនានេះ មិនសំដៅតែលើសម្លៀកបំពាក់ដែលមានតម្លៃថ្លៃនោះទេ ពោលគឺជាប្រភេទសម្លៀកបំពាក់ដែលបិទជិតត្រឹមត្រូវ ការស្លៀកឱ្យមានសណ្ដាប់ធ្នាប់៕
អត្ថបទ៖ រតនៈ
អត្ថបទទាក់ទង
.jpg)
