អ្នកជំនាញអប់រំជំរុញឱ្យបណ្ដុះបណ្ដាលគ្រូបន្ថែមទាំងបរិមាណ និងគុណភាព
Admin
.jpg)
អ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន មានប្រសាសន៍ប្រាប់អ្នកសារព័ត៌មានថា បច្ចុប្បន្នមិនថារដ្ឋ និងឯកជននោះទេ គឺគ្រូបង្រៀនមានការខ្វះខាតច្រើន ហើយសព្វថ្ងៃវិស័យឯកជនរំពឹងគ្រូដែលមកពីសាលារដ្ឋមកបង្រៀននៅពេលដែលចប់ម៉ោងពីសាលារដ្ឋ។ លោកលើកឡើងថា បើទោះជាគ្រូបង្រៀនត្រូវបានក្រសួងអប់រំប្រកាសជ្រើសរើសជាបន្តបន្ទាប់ តែក៏មានគ្រូបង្រៀនមួយចំនួនបានចូលនិវត្តន៍ពីការងារទៅវិញផងដែរ ស្របពេលដែលចំនួនសិស្ស និងសាលាដែលទើបបង្កើតកាន់តែច្រើន។
ជាមួយគ្នានេះ អ្នកឧកញ៉ា បន្ថែមថា «រាល់ឆ្នាំយើងជ្រើសរើសគ្រូច្រើន ប៉ុន្តែយើងមានបញ្ហាមួយ មិនបានបណ្ដុះគរុកោសល្យគ្រូឱ្យបានច្រើន។ រាល់ថ្ងៃបណ្ដុះបណ្ដាលគ្រូគឺអនុញ្ញាតឱ្យតាមសាលារបស់រដ្ឋនោះទេ បើសាលាឯកជនគឺអត់ទាន់មានសិទ្ធិនៅឡើយទេ ដូច្នេះហើយការបណ្ដុះបណ្ដាលគ្រូគឺមានការខ្វះខាតច្រើន»។ យ៉ាងនេះក្តីលោកបញ្ជាក់ថា មិនមែនបច្ចុប្បន្នគ្រូដែលកំពុងបង្រៀនមិនល្អនោះទេ ប៉ុន្តែតម្រូវការអភិវឌ្ឍសមត្ថភាពគ្រូបង្រៀនឱ្យកាន់តែប្រសើរគឺត្រូវតែមាន ទាំងបច្ចេកទេស និងទំនើបកម្ម។
ទាក់ទងនឹងករណីនេះ អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានប្រាប់ MJQTV ថា ក្រសួងអប់រំ យុវជន និងកីឡា បែងចែកក្របខណ្ឌគ្រូតាមតម្រូវការជាក់ស្តែងតាមគ្រឹះស្ថានសិក្សានៃទីតាំងភូមិសាស្ត្រនៅ២៥ខេត្ត-រាជធានី ដោយក្នុងនោះមានដូចជា ដោះស្រាយករណីលើសនិងខ្វះគ្រូតាមរយៈកែលម្អការពង្រាយគ្រូបង្រៀនឱ្យដល់សាលារៀនស្របនឹងនិយាមប្រើប្រាស់បុគ្គលិក ជ្រើសរើសគ្រូបង្រៀនចេញពីមូលដ្ឋាន ការកាត់បន្ថយសាលាបឋមសិក្សាមិនគ្រប់កម្រិត និងការកសាងសាលាមធ្យមសិក្សាថ្មីនៅក្នុងសហគមន៍ជួបការលំបាក ផ្តល់ការឧបត្ថម្ភដល់សិស្សក្រីក្រ ដើម្បីបង្កើនការចូលរៀននិងបញ្ចប់ការសិក្សានៅមធ្យមសិក្សា។
ក្នុងឱកាសចុះពិនិត្យដំណើរការសាងសង់មន្ទីរពេទ្យជាតិ តេជោសន្តិភាព កាលពីថ្ងៃទី១៩ ខែមករា ឆ្នាំ២០២៣ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជាបានចាត់ទុក វិស័យអប់រំ និងវិស័យសុខាភិបាល ជាវិស័យដែលទទួលបានអាទិភាពខ្ពស់ជាងគេ៕
.jpg)
