អាជ្ញាធរស្រុកថ្ពង ចុះបិទ និងធ្វើកិច្ចសន្យាឱ្យបញ្ឈប់ការបើកលេងល្បែងភ្នាល់តាមInternet
Admin
លោក គាវ លាងគា អភិបាលនៃគណៈអភិបាលស្រុកថ្ពងបានឲ្យដឹងថា ក្រោយពីទទួលបានបទបញ្ជាពីលោក វ៉ី សំណាងអភិបាលនៃគណៈអភិបាលខេត្តកំពង់ស្ពឺរួចមក កាលពីថ្ងៃទី២៦ ខែសីហា ឆ្នាំ២០២២ អាជ្ញាធរស្រុកថ្ពងបានដឹកនាំកងកម្លាំងទាំងបីប្រភេទ ហើយសហការជាមួយមេឃុំទាំង៧ បានរៀបចំកិច្ចប្រជុំ ពង្រឹងការងារសន្តិសុខ សណ្ដាប់ធ្នាប់ ការទប់ស្កាត់ និងបង្រ្កាបល្បែងស៊ីសងក្នុងដែនសមត្ថកិច្ចស្រុកថ្ពង ខេត្តកំពង់ស្ពឺ។
លោកបន្តថា លុះដល់ថ្ងៃទី២៧ ខែសីហា ឆ្នាំ២០២២ មេឃុំទាំង៧ បានចាត់ឲ្យកម្លាំងប៉ុស្តិ៍ចុះទប់ស្កាត់ និងបង្រ្កាបល្បែងភ្នាល់តាមInternet រួមមាន ល្បែងឆ្នោតឡូតូ និងបញ្ជល់មាន់ ដោយតម្រូវឱ្យបិទអាជីវកម្ម និងធ្វើកិច្ចសន្យា ឱ្យម្ចាស់ទីតាំងបញ្ឈប់ការផ្តល់ទីតាំងដល់អ្នកលេងល្បែងភ្នាល់តាមInternet ទាំងអស់ក្នុងស្រុកថ្ពងផងដែរ។
លោកអភិបាលស្រុកថ្ពងបានបន្ថែមថា គិតត្រឹមថ្ងៃទី២៨ ខែសីហានេះ ការចុះបង្ក្រាប និងបិទទីតាំង គឺធ្វើបានជិត៤០ទីតាំង ហើយសមត្ថកិច្ចក៏បានអប់រំ និងធ្វើកិច្ចសន្យាឱ្យម្ចាស់ទីតាំងបញ្ឈប់រាល់ការផ្តល់ទីតាំង ដល់អ្នកលេងល្បែងភ្នាល់តាមInternetនេះតទៅទៀត ព្រមទាំងព្រមានថា បើមិនគោរពតាមកិច្ចសន្យាសមត្ថកិច្ចនឹងចាត់ការតាមនីតិវិធីច្បាប់ ៕
អត្ថបទ៖ BSB
.jpg)
