អាជ្ញាធរខេត្តកំពង់ឆ្នាំង ដឹកនាំក្រុមការងារចុះពិនិត្យទីតាំងដីតាមការស្នើសុំរបស់ប្រជាពលរដ្ឋ៤គ្រួសារ
Admin
លោក សាន់ យូ អភិបាលរងខេត្តកំពង់ឆ្នាំងមានប្រសាសន៍ក្នុងឱកាសនោះថា ប្រជាពលរដ្ឋ៤គ្រួសារនេះ បើពិនិត្យជាក់ស្តែងគឺស្ថិតនៅក្រៅប្លង់បង្ហាញផែនទីរបស់ដីបន្ទាយ៥ជាន់ ដែលបានកំណត់ដោយលោកឧត្តមសេនីយ៍ឯក ព្រហ្ម ឌិន ក្នុងឆ្នាំ ២០០៨ឡើយ។ ម្យ៉ាងទៀតកន្លងមកមន្ទីរសុរិយោដីក៏ធ្លាប់បានចេញប័ណ្ណសម្គាល់សិទ្ធិមួយច្បាប់ជូនប្រជាពលរដ្ឋមួយគ្រួសារក្នុងចំណោម៤គ្រួសារនេះដែរ ដូច្នេះសូមមន្ទីរជំនាញនិងអាជ្ញាធរពាក់ព័ន្ធពិនិត្យករណីនេះ និងធ្វើរបាយការណ៍ជូនទៅរដ្ឋបាលខេត្តដើម្បីពិនិត្យ។ លោកក៏បានជម្រាបជូនទៅអាជ្ញាធរ និងជំនាញដែលពាក់ព័ន្ធទាំងអស់ ត្រូវសហការគ្នាឱ្យបានល្អប្រសើរដើម្បីជួយសម្រួលការងារជូនប្រជាពលរដ្ឋ៤គ្រួសារទៅតាមការស្នើសុំ ។
យោងតាមលិខិតស្នើសុំរបស់ប្រជាពលរដ្ឋទាំង៤គ្រួសារដែលចុះថ្ងៃទី ០១ ខែវិច្ឆិកា ឆ្នាំ២០២១ បានឱ្យដឹងថា ទីតាំងដែលប្រជាពលរដ្ឋទាំង៤គ្រួសារបានស្នើសុំ គឺ ឪពុកម្ដាយខ្លួនបានរស់នៅចាប់ពីឆ្នាំ១៩៧៩មក ប៉ុន្តែនៅពេលដែលមន្ត្រីសុរិយោដី និងអាជ្ញាធរចុះវាស់វែងធ្វើប័ណ្ណកម្មសិទ្ធនោះ គឺមិនបានធ្វើឱ្យពួកគាត់នោះទេ ដោយអះអាងថាដីនោះស្ថិតនៅក្នុងបញ្ជីសារពើភ័ណ្ឌរបស់មន្ទីរទេសចរណ៍ខេត្ត។ ក្នុងលិខិតស្នើសុំដដែលនេះក៏មានចំណាររបស់អភិបាលខេត្តកំពង់ឆ្នាំងឱ្យលោក សាន់ យូ ចុះពិនិត្យ និងឱ្យយោបល់ផងដែរ៕
អត្ថបទ៖ ភ្នាក់ងារខេត្តកំពង់ឆ្នាំង
