អភិបាលខេត្តមណ្ឌលគិរី ជំរុញប្រជាពលរដ្ឋដាំបន្លែផ្លែឈើ ប្រសើរជាងទុកដីទំនេរចោល
Admin
លោក ថង សាវុន អភិបាលខេត្តមណ្ឌលគិរី ជំរុញបែបនេះក្នុងពិធីចែកពូជដំណាំហូបផ្លែ ដល់ប្រជាកសិករអតីតយុទ្ឋជន នារសៀលថ្ងៃទី២៩ សីហា ២០២២ នៅមន្ទីរកសិកម្មខេត្ត។
លោក ថង សាវុធ មានប្រសាសន៍ថា ដើម្បីកាត់បន្ថយការចំណាយប្រចាំថ្ងៃក្នុងជីវភាពគ្រួសារ ប្រជាពលរដ្ឋគួរកែច្នៃដីជុំវិញផ្ទះ ដាំបន្លែបន្តិចបន្តួចដូចជា ដាំម្ទេស ស្លឹកគ្រៃ រំដេង ខ្ជាយ ជី ជាដើម ចៀសវាងសុំអ្នកជិតខាង ឬទិញពីផ្សារ។
លោកបន្តថា ទឹកដីខេត្តមណ្ឌលគិរីហាក់មានអំណោយផលខុសពីបណ្តាខេត្តមួយចំនួន ពោលគឺកសិករអាចដាំដុះ ដំណាំស្ទើរគ្រប់ប្រភេទ ទាំងកសិកម្ម និងកសិឧស្សាហកម្ម។ មិនត្រឹមតែប៉ុណ្ណោះខេត្តនេះក៏មានដំណាំសម្គាល់ភូមិសាស្ត្រដូចជា ផ្លែប័រ កាហ្វេ និងក្រូចវល្លិ៍ ហើយបច្ចុប្បន្នក៏មានកសិករដាំដើមទុរេនជាច្រើនផងដែរ។
លោក សុង ឃាង ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តមណ្ឌលគិរី បានឱ្យដឹងថា តបតាមប្រសាសន៍របស់លោកអភិបាលខេត្តដែលបានផ្តល់អនុសាសន៍ឱ្យមន្ទីរកសិកម្មពិនិត្យលទ្ឋភាពក្នុងការចែកកូនឈើហូបផ្លែ ដល់កសិករដែលជាអតីតយុទ្ឋជន សម្រាប់ដាំដុះបង្កបង្កើនផលដើម្បីធ្វើឱ្យជីវភាពល្អប្រសើឡើងមួយកម្រិតទៀត មន្ទីរបានរៀបចំចែកពូជកូនឈើហូបផ្លែ មានកូនប័រ កូនទុរេន សរុបចំនួន៧០០ដើម ជូនដល់គ្រួសារកសិករអតីតយុទ្ធជនចំនួន១០០គ្រួសារ ដាំឱ្យទាន់រដូវធ្លាក់ភ្លៀង៕
អត្ថបទ៖ភ្នាក់ងារខេត្តមណ្ឌលគិរី
.jpg)
