អតីតសិស្សនិទ្ទេស A ថា ៣ចំណុចសាមញ្ញៗ ដែលជួយឱ្យខ្លួនទទួលបាននិទ្ទេសល្អ
Admin
ទម្លាប់ និងរបៀបសិក្សារបស់បុគ្គលម្នាក់ៗ ត្រូវបានគេមើលឃើញថា មានលក្ខណៈខុសៗគ្នាទៅអ្នកសិក្សា ចរិត ភាពច្នៃប្រឌិត ភាពឈ្លាសវៃ និងបរិយាកាសនៅជុំវិញរបស់អ្នកសិក្សាផងដែរ។
បើក្រឡេកមើលអតីតសិស្សនិទ្ទេស A លំដាប់ខ្ពស់ កាលពីសម័យប្រឡងថ្ងៃទី២១ ខែសីហា ឆ្នាំ២០១៧ កន្លងទៅ សុង សុខាវឌ្ឍិ បានឱ្យដឹងថា ៣ចំណុច ដែលជំរុញឱ្យខ្លួនទទួលបាននិទ្ទេស A និងជាអតីតសិស្សពូកែ ប្រចាំសាលារៀន អន្តរទ្វីប អាមេរិកាំង។
ក្នុងចំណោម៣ចំណុចនេះមានដូចជា ទី១ កត្តាគ្រួសារ ទី២ សាលារៀន និងទី៣ កត្តាខ្លួនឯង។
អតីតសិស្សនិទ្ទេស A រូបនេះបញ្ជាក់ថា កត្តាទី១ គឺគ្រួសារ ព្រោះថា គ្រួសារ ជាកត្តាដ៏សំខាន់បំផុតក្នុងការសិក្សារបស់ខ្លួន។ បើគ្រួសារទន់ខ្សោយ ឬគ្រួសារមិនផ្ដល់ពេលវេលាគ្រប់គ្រាន់សម្រាប់សិក្សាទេ ក៏មិនអាចសិក្សាទៅបានដោយរលូនដែរ។ បេក្ខជនរូបនេះបន្តថា ពិសេសជាងគេ គឺឪពុកម្ដាយតែម្ដង ដែលជាអ្នកលើកទឹកចិត្ត ចាំជួយជំរុញ និងផ្ដល់ពេលវេលាគ្រប់គ្រាន់សម្រាប់ការសិក្សា។
កត្តាទី២ សាលារៀន ព្រោះថាសាលារៀន ជាកត្តាដ៏សំខាន់មួយក្នុងចំណោមកត្តាទាំង៣ ក្នុងការរួមចំណែកផ្ដល់នូវចំណេះដឹង ចំណេះធ្វើ បទពិសោធ ដល់សិស្សានុសិស្ស។ សុខាវឌ្ឍិ បញ្ជាក់ថា បើសិនជ្រើសសាលាខុស ឬសាលាគ្មានគុណភាព នោះអ្នកសិក្សាក៏មិនអាចជោគជ័យ ឬទទួលបានផ្លែផ្កាល្អដែរ។
បេក្ខជនលំដាប់ពិន្ទុខ្ពស់ដដែលរូបនេះសង្កត់ធ្ងន់ថា ការទទួលបាននិទ្ទេស A នេះ ក៏ដោយសារជ្រើសសាលា ដែលប្រកបដោយគុណភាព វិន័យ និងសេវាកម្មល្អ។
សិស្សឆ្នើមរូបនេះបន្តថា កត្តាទី៣ គឺសំខាន់បំផុត ហើយមិនអាចខ្វះបានផងនោះ គឺខ្លួនឯងតែម្ដង។ ព្រោះថា អ្នកសិក្សាម្នាក់ៗ មានទម្លាប់ និងរបៀបសិក្សាមិនដូចគ្នាទាំងអស់ឡើយ។ ពោល សុទ្ធសឹងមានរបៀប និងស្ទាយរៀនខុសៗគ្នាទៅតាមភាពប៉ិនប្រសប់របស់អ្នកសិក្សា។
សុខាវឌ្ឍិ បញ្ជាក់ថា អ្នកសិក្សាខ្លះគ្រាន់តែរៀនម្ដងទេ តែចងចាំបានយូរ ហើយយល់ថែមទៀត។ តែអ្នកសិក្សាខ្លះទៀត ទោះរៀនច្រើនសារយ៉ាងណាក៏ដោយ ក៏មិនសូវយល់ ហើយចាំបានយូរទេ។ តែអ្វីដែលសំខាន់ យុវជនរូបនេះនិយាយថា ត្រូវតែព្យាយាមសិក្សាដោយយកចិត្តទុកដាក់ ស្ដាប់គ្រូពន្យល់ បង្ហាត់បង្ហាញ និងចេះសួរសំណួរទៅកាន់គ្រូ ឬអ្នកជំនាញ ដែលខ្លួនឆ្ងល់។ លើសពីនេះ អ្នកសិក្សាគ្រប់រូបត្រូវចេះកំណត់គោលដៅខ្លួនឯង ព្រោះការកំណត់គោលដៅបានច្បាស់លាស់ នោះនឹងនាំឱ្យរៀនពូកែ ទទួលបាននិទ្ទេសល្អ ហើយលទ្ធផលនឹងទទួលបានជោគជ័យ។
គួររម្លឹកថា សុង សុខាវុឌ្ឍិ ជាអតីតសិស្សថ្នាក់ទី១២ នៃសាលារៀន អន្តរទ្វីប អាមេរិកាំង និងជាអតីតសិស្សនិទ្ទេស A ដែលទទួលលំដាប់ពិន្ទុ៩៩.៩៩៣ និងជាបេក្ខជនលេខរៀងទី៨ ក្នុងចំណោមបេក្ខជនទទួលបានទន្ទេស A ចំនួន៤២៤នាក់ ទូទាំងប្រទេស៕
.jpg)
