អគ្គនាយកដ្ឋាន ក.ប.ប.៖ រាល់ផលិតផលដែលចរាចរលើទីផ្សារត្រូវមានស្លាកសញ្ញានិងការណែនាំឱ្យបានត្រឹមត្រូវ
Admin
អគ្គនាយកដ្ឋាន ក.ប.ប. បានធ្វើការណែនាំដូចខាងក្រោម៖
១- ចំពោះស្លាកសញ្ញាផលិតផល រាល់ផលិតផលដែលចរាចរលើទីផ្សារ ត្រូវមានស្លាកសញ្ញាឬភ្ជាប់នូវបរិយាយបណ្ណបញ្ជាក់អំពីព័ត៌មានផលិតផលជាភាសាខ្មែរ, ចំពោះផលិតផលនាំចូល ដែលនៅលើសំបកវេចខ្ចប់ឬបរិយាយបណ្ណ ពុំបានបោះពុម្ភជាភាសាខ្មែរត្រូវធ្វើទម្រង់សេចក្ដីបរិយាយព័ត៌មានជាភាសាខ្មែរ ហើយបិទភ្ជាប់នៅលើសំបកវេចខ្ចប់របស់ផលិតផលទំនិញ, ម៉ាកនិងពាណិជ្ជនាម អាចប្រើជាភាសាបរទេស និងទៅតាមទម្រង់ដែលបានចុះបញ្ជីនៅក្រសួងពាណិជ្ជកម្ម និងស្លាកសញ្ញាផ្សេងទៀតដែលត្រូវបានអនុញ្ញាតដោយបញ្ញត្តិករមានសមត្ថកិច្ច, សេចក្ដីបរិយាយព័ត៌មាន ត្រូវមានទំហំអក្សរសមស្របទៅតាមស្ថានភាពនៃសំបកវេចខ្ចប់របស់ផលិតផល ដែលអាចមើលឃើញច្បាស់ ងាយអាន និងស្របទៅតាមបទដ្ឋានស្តង់ដា លក្ខខណ្ឌត្រូវនៃបទប្បញ្ញត្តិបច្ចេកទេសជាធរមាននៃកម្ពុជានិងអន្តរជាតិ, សេចក្ដីបរិយាយព័ត៌មានត្រូវមានលក្ខណ:ពិតនៃផលិតផលទំនិញនិងសេវា ដែលយ៉ាងហោចណាស់ត្រូវមានព័ត៌មាន វិធីប្រើ សមាសធាតុផ្សំ កាលបរិច្ឆេទប្រើប្រាស់ ឡូតិ៍ទំនិញ អាសយដ្ឋានផលិតផលឬអ្នកនាំចូល មុខងារនិងរបៀបប្រើប្រាស់ ប្រសិទ្ធភាព ផលប៉ះពាល់និងរបៀបរក្សាទុក, សេចក្ដីបរិយាយព័ត៌មាន មិនត្រូវភូតកុហុក បំភាន់ ឬធ្វើឱ្យអ្នកប្រើប្រាស់ភាន់ច្រឡំឡើយ។
២- ចំពោះបរិយាយបណ្ណ រាល់ផលិតផលដែលមានទំហំត្រឹម២០សមឬតូចជាងនេះ ត្រូវមានបរិយាយបណ្ណដែលមានខ្លឹមសារដូចបានជម្រាបជូនខាងលើភ្ជាប់មកជាមួយផលិតផល។
៣- វិធានការ អគ្គនាយកដ្ឋាន ក.ប.ប. ទុករយ:ពេលដើម្បីធ្វើការកែប្រែនិងបំពេញទៅតាមលក្ខខណ្ឌតម្រូវ ដូចមានចែងនៅក្នុងចំណុចទី១ខាងលើរហូតដល់ថ្ងៃទី១ ខែធ្នូ ឆ្នាំ២០២២, ចាប់ពីថ្ងៃទី១ ខែមករា ឆ្នាំ២០២៣តទៅ មន្ត្រីស៊ើបអង្កេតដែលទទួលបាននីតិសម្បទាជានគបាលយុត្តិធម៌នៃអគ្គនាយកដ្ឋាន ក.ប.ប. នឹងចាត់វិធានការតាមផ្លូវច្បាប់និងបទប្បញ្ញត្តិជាធរមាន៕
.jpg)
