សឹងពុត្រ បញ្ញា ត្រៀមនាំភាពយន្តខ្លីរបស់ខ្លួន ទៅប្រកួតនៅជប៉ុន ជាមួយសិស្សជាង១០ប្រទេស
Admin
យុវសិស្ស សឹងពុត្រ បញ្ញា ដែលសិស្សនៃសាលារៀន អន្តរទ្វីប អាមេរិកាំង (AIS) បានរួមគ្នាជាមួយយុវសិស្សពីររូបទៀត បានផលិតភាពយន្តខ្លីបែបអប់រំនេះឡើង។ យុវសិស្សវ័យ១៧ឆ្នាំរូបនេះនឹងយកស្នាដៃខ្លួនទៅកាន់ក្រុងគីតាមិ ខេត្តហុកកៃដូ ប្រទេសជប៉ុន ក្រោមកម្មវិធី JENESYS 2018 នៅថ្ងៃទី២៤ ខែវិច្ឆិកា ឆ្នាំ២០១៨ ខាងមុខនេះ ដើម្បីប្រកួតជាមួយស្នាដៃសិស្សមកពីបណ្តាប្រទេសអាស៊ានទាំង១០ ព្រមទាំងទីម័រខាងកើត ចិន តៃវ៉ាន់ ម៉ុងហ្គោលី កូរ៉េខាងត្បូង និងជប៉ុន។
ភាពយន្តខ្លី «កូនប្រុសគ្មានទំនួលខុសត្រូវ» ដែលបានជាប់នៅវគ្គពាក់កណ្តាលផ្តាចព្រ័ត្រនេះ និយាយពីក្មេងប្រុសម្នាក់មិនឱ្យតម្លៃម្ដាយរបស់ខ្លួន។ រូបគេជាមនុស្សគ្មានទំនួលខុសត្រូវលើខ្លួនឯង រួមទាំងការសិក្សាផង។ នៅទីបំផុត គេបានក្លាយជាមនុស្សវង្វេងសតិ ក្រោយពីម្ដាយរបស់គេជួបឧបទ្ទវហេតុស្លាប់ ដែលកើតឡើងដោយសាររូបគេ។
យុវសិស្សវ័យក្មេងដែលមានចំណូលចិត្តលើការផលិតភាពយន្តរូបនេះនិយាយថា «ចំពោះការថត ការរៀបប្លង់ ការសរសេររឿង គឺក្រុមខ្ញុំ ជាអ្នករៀបចំធ្វើទាំងអស់ តែមានការសហការជំនួយពីមិត្តភក្ដិក្នុងការធ្វើ Background។ ដោយសារតែខ្វះសម្ភារៈបច្ចេកទេសច្រើន ទើបភាពយន្តខ្លីនេះនៅមានការកម្រិត។ តាមពិតទៅរឿងនេះ ជាជម្រើសទី២របស់ក្រុមខ្ញុំទេ ព្រោះរឿងទី១មិនសូវស៊ីជម្រៅនឹងប្រធានបទដែលគេបានកំណត់មក»។
មហោស្រពភាពយន្តកុមារអន្តរជាតិ អាស៊ី ឆ្នាំ២០១៨ បានរៀបចំដោយស្ថានទូតជប៉ុននៅកម្ពុជា ក្រសួងអប់រំ យុវជន និងកីឡា និងមជ្ឈមណ្ឌលសហប្រតិបត្តិការកម្ពុជា ជប៉ុន (CJCC)។ ការប្រកួតប្រជែងផ្នែកខ្សែភាពយន្តខ្លីឆ្នាំ២០១៨នេះ ផ្តោតលើប្រធានបទ «ការទទួលខុសត្រូវដោយខ្លួនឯង» ដោយមានគោលបំណងលើកទឹកចិត្តសិស្សវិទ្យាល័យ ដែលមានឆន្ទៈក្នុងការផលិតខ្សែភាពយន្តបង្ហាញសក្តានុពលគំនិត និងភាពច្នៃប្រឌិតរបស់ពួកគេ។
នេះជាលើកទី១ហើយសម្រាប់ យុវសិស្ស សឹងពុត្រ បញ្ញា ដែលបានបង្ហាញសា្នដៃផលិតភាពយន្តរបស់ខ្លួនលើឆាកអន្តរជាតិ តែនេះមិនជាស្នាដៃដំបូងឡើយ ព្រោះកន្លងមកយុវសិស្សរូបនេះបាននិពន្ធ ផលិតភាពយន្តខ្លី និងនិពន្ធបទចម្រៀងផងដែរ។ បើទោះបីជាបញ្ញាស្រឡាញ់ និងមានជំនក់ចិត្តខ្លាំងនឹងការតែងនិពន្ធ រួមទាំងការផលិតភាពយន្តក្តី ប៉ុន្តែរូបគេគ្មានបំណងចាប់យកជំនាញនេះជាអាជីពជីវិតទេ គ្រាន់តែរូបគេធ្វើឡើងដើម្បីគេចចេញពីការស្មុគស្មាញប៉ុណ្ណោះ។
យុវសិស្សវ័យ១៧ឆ្នាំរូបនេះបន្តយ៉ាងដូច្នេះថា «មិនត្រឹមតែសរសេររឿងទេ ពេលខ្លះខ្ញុំក៏អាចតែងចម្រៀងបានដែរ ព្រោះថាជាផ្លូវមួយ ដើម្បីអារម្មណ៍ស្រស់ស្រាយពីភាពតឹងតែង។ កាលពីក្មេង ខ្ញុំក៏មានបំណងចង់ចាប់ជំនាញនេះដែរ តែធំឡើងខ្ញុំចង់ចាប់ជំនាញស្ថាបត្យកម្មវិញ ព្រោះខ្ញុំក៏ចូលចិត្តជំនាញហ្នឹងពីក្មេងមកដែរ»។
សឹងពុត្រ បញ្ហា គឺជាសិស្សម្នាក់ដែលរៀនពូកែ តែមិនឆ្នាស់ឆ្នើមលើសគេឯងនោះដែរ។ ប៉ុន្តែរូបគេជាមនុស្សមានជំនក់ចិត្តនឹងការអានសៀវភៅ។ បច្ចុប្បន្នយុវសិស្សកូនអ្នកក្រុងភ្នំពេញរូបនេះ រៀននៅថ្នាក់ទី១១ និងត្រៀមចូលរៀនថ្នាក់ទី១២នៅឆ្នាំសិក្សាថ្មីនេះ។ បញ្ញា គឺជាសិស្សរៀនសាលារៀន អន្តរទ្វីប អាមេរិកាំង ចាប់ពីថ្នាក់បឋមមកម្ល៉េះ រហូតមកដល់ពេលនេះមានរយៈពេល១២ឆ្នាំហើយ។
ចំពោះការសរសេរ និងការផលិតភាពយន្តខ្លី រូបគេបញ្ជាក់ថា មិនបានរៀនពីគ្រូណាទេ តែវាកើតចេញចំណង់ចំណូលចិត្ត និងឆ្លងកាត់ការអានសៀវភៅល្អៗពីអ្នកនិពន្ធជាច្រើន ទាំងសៀវភៅនិពន្ធដោយជនបរទេស និងជនជាតិខ្មែរ គឺយុវសិស្សរូបនេះបានអានច្រើន៕
.jpg)
