សិស្ស Aii សាខាសៀមរាប រៀបចំពិធីបុណ្យណូអ៊ែលប្រមូលថវិកាជូយសិស្សក្រីក្រក្នុងសហគមន៍
Admin
កម្មវិធីសប្បុរសធម៌នេះ បានប្រារព្ធឡើងនៅមជ្ឈមណ្ឌលភាសា អេ អាយ អាយ សាខាសៀមរាប កាលពីថ្ងៃទី២៣ ខែធ្នូ ឆ្នាំ២០២២ សម្រាប់ថ្នាក់ភាសាអង់គ្លេស កម្រិត Pre-kid 1 រហូតដល់ថ្នាក់មនុស្សធំ ប្រមាណជាង ៤០០នាក់។
កញ្ញា គង់ លក្ខិណា នាយិកា នៃមជ្ឈមណ្ឌលភាសា អេ អាយ អាយ សាខាសៀមរាប បានលើកឡើងថា គោលដៅរបស់កម្មវិធីនេះ គឺរៀបចំដើម្បីបង្កើនបរិយាកាសរីករាយក្នុងឱកាសបុណ្យណូអ៊ែល និងឆ្លងឆ្នាំសកលដែលនឹងខិតជិតមកដល់ឆាប់ៗខាងមុខនេះ។ ជាពិសេស គឺសាលា ក៏ដូចជាសិស្សានុសិស្ស បានសហការគ្នាបង្កើតកម្មវិធីសប្បាយៗ ដើម្បីរៃអង្គាសទឹកប្រាក់ជូនទៅដល់សាលារៀនដាច់ស្រយ៉ាល ក៏ដូចជាជួយដល់សិស្សដែលមានជីវភាពខ្វះខាតនៅក្នុងសហគមន៍។
កញ្ញា បញ្ជាក់ដូច្នេះ៖ «កម្មវិធីនេះរួមមានការសម្ដែងទេពកោសល្យពិសេសរបស់សិស្សានុសិស្ស កម្មវិធីប្ដូរកាដូ ការប្រកួតសម្លៀកបំពាក់ តាណូអ៊ែលដែលស្រស់ស្អាតជាងគេ ការលេងល្បែងប្រជាប្រិយ និងការសម្តែងប្លែកៗ ជាងនេះទៅទៀតសិស្សក៏អាចបរិច្ចាគសម្ភារៈប្រើប្រាស់រួចរួមមាន សម្លៀកបំពាក់ ស្បែកជើង កាតាប សៀវភៅ សម្ភារៈសិក្សាជាដើមដល់កុមារកំព្រា ជាការចូលរួមចំណែកក្នុងកម្មវិធីសប្បុរសធម៌ ហើយថវិកាដែលយើងប្រមូលបានមានជិត៦០០ ដុល្លារ នឹងគ្រោងចុះជួយដល់សហគមន៍ដូចដែលយើងបានធ្វើកន្លងមក។»
នាយិការូបនេះ កត់សម្គាល់ថា កម្មវិធីនេះប្រព្រឹត្តទៅយ៉ាងរលូន ដោយមានការចូលរួមយ៉ាងច្រើនកុះករពីសំណាក់សិស្សានុសិស្ស ក៏ដូចជាមាតាបិតា អ្នកអាណាព្យាបាលសិស្សផងដែរ។
គួរជម្រាបថា មជ្ឈមណ្ឌលភាសា អេ អាយ អាយ (Aii) គឺជាមជ្ឈមណ្ឌលដែលមានមូលដ្ឋានលើស្តង់ដារអាមេរិកខាងជើងដែលមានឯកទេសខាងភាសា។ មជ្ឈមណ្ឌលភាសា អេ អាយ អាយ ផ្តល់ជូននូវកម្មវិធីបណ្ដុះបណ្ដាលភាសាអង់គ្លេស ចិន និងថៃ និងវគ្គត្រៀម TOEFL ដើម្បីបំពេញតម្រូវការផ្សេងៗរបស់អ្នកសិក្សាគ្រប់វ័យ។
តោះ ចុះឈ្មោះចូលរៀននៅ មជ្ឈមណ្ឌលភាសា អេ អាយ អាយ វគ្គសិក្សាថ្មី ទទួលចុះឈ្មោះចាប់ពីថ្ងៃនេះតទៅ និងចូលរៀននៅថ្ងៃទី២ ខែមករា ឆ្នាំ២០២៣ខាងមុខនេះ។ សម្រាប់ព័ត៌មានបន្ថែមសូមទំនាក់ទំនងទូរសព្ទលេខ ០១១ ៣៨៨ ៨៦៨ និង០៩៣ ២១៧ ២១៧៕
