សិស្ស AIS ពីររូប ទទួលបានមេដាយប្រាក់ និងសំរិទ្ធ ក្នុងការប្រឡង គណិតវិទ្យាអូឡាំពិក
Admin
សិស្សទាំងពីរ ដែលបានចូលរួមប្រកួតជាមួយសិស្សដទៃទៀត នៅទូទាំងប្រទេស កាលពីថ្ងៃទី២១ ខែ មេសា ឆ្នាំ២០១៨ នៅវិឡាស័យស៊ីសុវត្តិ មាន កុមារី សម្បត្តិ សិរីកា ទទួលបានមេដាយប្រាក់ និង កុមារា ចាន់ វិទូ ទទួលបានមេដាយ សំរិទ្ធ ។
ពិធីប្រគល់មេដាយ និងវិញ្ញាបនបត្រនេះ បានធ្វើឡើងនៅព្រឹកថ្ងៃទី២៦ ខែឧសភា នាវិទ្យាល័យស៊ីសុវត្តិ។ ពួកគេ នឹងត្រូវបានអនុញ្ញាត ឱ្យចូលរួមប្រកួត នៅប្រទេសសិង្ហបុរី នៅថ្ងៃទី០៦ ដល់ថ្ងៃទី០៩ ខែកក្កដា ឆ្នាំ ២០១៨ ខាងមុខ។
ខណៈពេលដែលសិស្សទាំង២បានទទួលមេដាយនេះ លោក ឡេង សុខអេង ចាងហ្វាងក្រោមមត្តេយ្យ មត្តេយ្យ និងបឋមសិក្សា នៃសាលារៀន អន្តរទ្វីប អាមេរិកាំង សាខាម៉ៅសេទុង បានលើកឡើងថា លោកសប្បាយចិត្ត និងមានមោទនភាពដែលសិស្ស AIS ដណ្តើមបានមេដាយទាំងពីរនេះ។ លោករំពឹងថា ពួកគេនឹងដណ្តើមមេដាយបន្តទៀតត្រលប់មកវិញ ពេលទៅចូលប្រកួតនៅប្រទេសសិង្ហបុរីនាពេលខាងមុខ ខណៈកាលពីឆ្នាំមុន កុមារី សម្បត្តិ សិរីកា ដែលបានទៅចូលរួមប្រកួតនៅប្រទេសសិង្ហបុរី ទទួលបានមេដាយសំរិទ្ធិ។
គួរបញ្ជាក់ថា SASMO គឺជាការប្រលងគណិតវិទ្យាអូឡាំពិកដែលមិនត្រឹមតែពង្រីកចំណេះដឹងដល់សិស្សដែលពូកែតែប៉ុណ្ណោះទេ តែថែមទាំងមានបំណងជំរុញនឹងផ្តល់ទំនុកចិត្តដល់សិស្សទាំងអស់គ្នា។ ការប្រលងនេះត្រូវបានរៀបចំឡើងតាមរបៀបមួយដើម្បីធ្វើឱ្យសិស្សទាំងអស់ចូលចិត្តគណិតវិទ្យា។ ការប្រលង SASMO គឺស្របទៅនឹងកម្មវិធីសិក្សារបស់សាលាដោយផ្តោតការយកចិត្តទុកដាក់ខ្ពស់ទៅលើការបូកសរុបបញ្ហាមិនប្រក្រតី។ ការរៀបចំសម្រាប់ការប្រលង SASMO ជួយនិស្សិតត្រៀមលក្ខណៈសម្រាប់ការប្រឡង PSLE និង O-Level ។
បន្ទាប់ពីឡើងទទួលមេដាយ កុមារី សម្បត្តិ សិរីកា អាយុ១០ឆ្នាំ រៀននៅថ្នាក់ទី ៤ ក នៃសាលារៀន អន្តរទ្វីប អាមេរិកាំង បានឱ្យដឹងថា នេះជាលើកទី២ ដែលនាងទទួលបានមេដាយប្រាក់ ក្នុងការប្រកួត SASMOនេះ។ ហើយនាងត្រៀមខ្លួនរួចហើយ ដើម្បីទៅចូលរួមប្រកួតនៅប្រទេស សិង្ហបុរី។
ចំណែក កុមារា ចាន់ វិទូ បានប្រាប់ដែរថា ទោះនេះជាលើកទី១ តែខ្លួនសប្បាយចិត្ត ដែលដណ្តើមបានមេដាយសំរិទ្ធ ហើយក្នុងការប្រកួតលើកក្រោយនៅប្រទេស សិង្ហបុរី ខ្លួននឹងយកឱ្យបានមេដាយមាស៕
.jpg)
