សិស្ស AIS ជាង៣០០នាក់ ចុះទស្សនកិច្ចសិក្សាឈ្វេងយល់ពីវត្ថុបុរាណ និងសង្គម នៅខេត្តកំពង់ស្ពឺ
Admin
កាលពីទី២៤ ខែឧសភា ឆ្នាំ២០១៨ គណៈគ្រប់គ្រងសាលារៀន អន្តរទ្វីប អាមេរិកាំង បានដឹកនាំសិស្សានុសិស្សថ្នាក់ទី៨ ទាំង៣សាខា ចុះទស្សនកិច្ចសិក្សានៅសារមន្ទីរនរបុរី និងកសិដ្ឋានចិញ្ចឹមត្រី ដែលស្ថិតនៅក្នុងភូមិចំបក់ ឃុំវល្លិ៍ស ស្រុកសំរោងទង ខេត្តកំពង់ស្ពឺ ដើម្បីឱ្យពួកគេបានសិក្សាឈ្វេងយល់ពីសង្គមខាងក្រៅ ទីតាំងភូមិសាស្រ្ត និងវត្ថុបុរាណនានា ដែលតាំងនៅ ក្នុងសារមន្ទីរ។
លោក រឿង សុភាព ចាងហ្វាង មធ្យមសិក្សាបឋមភូមិ នៃសាលារៀន អន្តរទ្វីប អាមេរិកាំង បានឱ្យដឹងថា នេះជាលើកទី១១៨ ហើយ ដែលសាលាអន្តរទ្វីប អាមេរិកាំង បានដឹកសិស្សរបស់ខ្លួនចុះទស្សនកិច្ចសិក្សាពីតំបន់នីមួយៗនៅក្នុងប្រទេសកម្ពុជា។ លោកបញ្ជាក់ថា ដំណើរទស្សនកិច្ចនេះ គឺជាឱកាសមួយ ដែលសិស្សានុសិស្សទាំងអស់បានសិក្សា និងយល់ដឹងពីការប្រកបមុខរបរប្រចាំថ្ងៃ កម្រិតជីវភាពរស់នៅ និងស្មារតីឧស្សាហ៍ព្យាយាមរបស់ប្រជាកសិករខ្មែរនៅតាមទីជនបទ ព្រមទាំងសិក្សាពីស្នាដៃចម្លាក់ វត្ថុសិល្បៈ ដែល ធ្វើអំពីឈើ និងថ្មម៉ាបជាដើម និងសម្បត្តិវប្បធម៌ខ្មែរ ដែលត្រូវបានអភិរក្សនៅក្នុងសារមន្ទីរនរបុរី ។
លោកបន្ថែមថា«យើងចង់ឱ្យគាត់ចូលរួមថែរក្សា នូវវប្បធម៌ប្រពៃណី ដែលយើងមានពីមុន។ ក្រៅពីនេះយើងក៏នាំប្អូនៗឱ្យចេះសហការគ្នា ជាក្រុម»។
ចាងហ្វាង មធ្យមសិក្សាបឋមភូមិ ដដែលនេះ បានឱ្យដឹងទៀតថា ក្រៅពីឱ្យពួកគេបានសិក្សាពីទិដ្ឋភាពទាំងនេះ សាលាក៏មានបំណងបណ្តុះឱ្យពួកចេះរួមកិច្ចការសង្គម និងការចេះចែករំលែក តាមរយៈការចែកអំណោយឱ្យសិស្សសាលានៅជនបទដែលខ្វះខាត ដែលអំណោយទាំងនោះ គឺកើតចេញទឹកចិត្តរបស់ពួកគេផ្ទាល់ តាមអ្វីដែលខ្លួនមាន។
មានវត្តមានក្នុងដំណើរទេស្សនកិច្ច ជាមួយសិស្សដទៃទៀត យុវសិស្ស សំពៅ មុន្នីរ៉ាយុទ្ធ រៀនថ្នាក់ទី៨ ក បានលើកឡើងថា ដំណើរទស្សនកិច្ចនេះ បានផ្តល់បទពិសោធថ្មីៗ និងចំណេះដឹងជាច្រើនដល់ខ្លួន។ យុវសិស្សរូបនេះបន្តថា បន្ទាប់ពីបានចូលរួម រូបគេបានដឹងពីទីតាំងភូមិសាស្រ្ត ឃើញទិដ្ឋភាពរស់នៅជាក់ស្តែងរបស់ប្រជាពលរដ្ឋ និងការសិក្សារបស់សិស្សនៅតំបន់ជនបទ ស្គាល់នូវវត្ថុបុរាណប្លែកៗ និងប្រភេទត្រីផ្សេងៗ។ អ្វីដែលធ្វើឱ្យខ្លួន កាន់តែសប្បាយចិត្តនោះ គឺបានចូលរួមផ្តល់អំណោយដល់សិស្សក្មេងនៅសាលាដែលខ្វះខាត។
គួរជម្រាបផងដែរថា ដំណើរទស្សនកិច្ចរបស់សាលារៀន អន្តរទ្វីប អាមេរិកាំង ដែលធ្វើឡើងមួយឆ្នាំម្តង សម្រាប់សិក្សានុសិស្សគ្រប់កម្រិតទាំងអស់ ក៏ចូលរួមបង្កើនភាពក្លាហាន និងបទពិសោធក្នុងការបកស្រាយ ការសហការ ការដឹកនាំ ឯករាជ្យភាព សាមគ្គីភាព ភាពម្ចាស់ការ ទំនាក់ទំនងក្នុងក្រុម និងទំនាក់ទំនងជាមួយមហាជនបានកាន់តែប្រសើរ រឹតចំណងមិត្តភាព និងសាមគ្គីភាពជាមួយមិត្តរួមថ្នាក់ និងមិត្តរួមជំនាន់របស់ពួកគេ ក៏ដូចជាបានឆ្លុះបញ្ចាំងខ្លឹមសារដែលបានសិក្សានៅក្នុងមេរៀនទៅនឹងស្ថានភាពសង្គមជាក់ស្តែងផងដែរ៕
.jpg)
