សិស្ស Aii បង្កើតកម្មវិធីអាហារមិត្តភាពបញ្ចប់វគ្គសិក្សាក្រោមបរិយាកាសដ៏រីករាយ
Admin
ក្នុងបរិយាកាសដ៏សែនរីករាយ កញ្ញា ឃួន យ៉ាណែត គ្រូភាសាអង់គ្លេស នៃមជ្ឈមណ្ឌលភាសាអេ អាយ អាយ បានឱ្យដឹងថា កម្មវិធីនេះរៀបចំឡើងក្នុងគោលបំណងនិងជំរុញឱ្យសិស្សានុសិស្សកាន់តែមានភាពស្និតស្នាលនិងគ្នា ព្រមទាំងជាមួយគ្រូផងដែរ។ ជាងនេះទៅទៀតនោះ បង្ហាញពីទំនាក់ទំនងល្អជាមួយគ្នា ដោយយល់ថាទោះបីជាថ្ងៃចុងក្រោយដែលបានសិក្សាជាមួយគ្នាក៏ពិតមែន តែភាពសប្បាយរីករាយ ចំណងមិត្តភាពមិនបាត់បង់ទៅតាមនោះទេ។
ទោះបីនេះជាពេលវេលាសិក្សាជួបជុំគ្នាដ៏ខ្លី តែកញ្ញាសង្ឃឹមថា អានុស្សាវរីយ៍មួយនេះ បួករួមនិងបទពិសោធថ្មីៗ ដំបូន្មានល្អៗ ពាក្យដាស់តឿន លើកទឹកចិត្ត និងបង្ហាត់បង្រៀនដោយភាពអត់ធ្មត់ ដែលបានផ្តល់ឱ្យសិស្សកន្លងមក ពួកគនឹងមានការចងចាំក្នុងជីវិតរបស់ពួកគេ ហើយក៏បានបង្កើតចំណងមិត្តភាពដោយស្នាមញញឹមជាមួយនឹងរឿងរ៉ាវរាប់មិនអស់ទៀតផង។
អមជាមួយគ្នានេះ យុវសិស្ស អុត សុម៉ានីតា បានសម្តែងនូវក្តីសប្បាយរីករាយតាមរយៈការសិក្សាកម្មវិធីភាសាអង់គ្លេសរបស់គេថា ការសិក្សានៅទីនេះរូបគេទទួលបានចំណេះដឹងជាច្រើនដូចជាការអានបានល្អ និយាយភាសាអង់គ្លេសបានល្អ សរសេរបានល្អ និងស្គាល់មិត្តភក្តិបានច្រើនជាងមុនផងដែរ។
សុម៉ានីតា និយាយរៀបរាប់ទាំងទឹកមុខពោរពេញដោយអារម្មណ៍រំភើបថា ការបង្កើតនូវកម្មវិធីនេះឡើងពិតជាមានសារៈសំខាន់ចំពោះរូបគេផ្ទាល់ និងមិត្តភក្តិដទៃទៀត ព្រោះសកម្មភាពទាំងអស់នេះ ពួកគេនឹងចងចាំទុកនូវរាល់សកម្មភាពនៃការចែករំលែកចំណេះដឹងចំពោះគ្នាកន្លងមក។
គួរបញ្ជាក់ថា មជ្ឈមណ្ឌលភាសាអេ អាយ អាយ តែងតែរៀបចំកម្មវិធីនេះឡើង គឺជំរុញឱ្យសិស្សទទួលបាននូវអារម្មណ៍ស្រស់ស្រាយសប្បាយចិត្តនៅពេលដែលពួកគេត្រូវបែកពីមិត្តរួមថ្នាក់ លោកគ្រូអ្នកគ្រូរបស់គេ ដែលទាំងអស់នេះបានឆ្លុះបញ្ជាំងពីមនោសញ្ចេតនាដ៏ជ្រៀលជ្រៅនឹងមានតម្លៃមិនអាចកាត់ថ្លៃបាន៕
.jpg)
