សិស្សឆ្នើមបីរូបរបស់សាលារៀន AIS បានត្រៀមចូលរួមប្រឡងសិស្សពូកែទូទាំងប្រទេស
Admin
សិស្សឆ្នើមថ្នាក់ទី១២ បីរូប មកពីសាលារៀន អន្តរទ្វីប អាមេរិកាំង បានត្រៀមខ្លួនចូលរួមប្រឡងជ្រើសរើសសិស្សពូកែទូទាំងប្រទេស បន្ទាប់ពីពួកគេប្រឡងជាប់ជាពូកែទូទាំងរាជធានី កាលពីកន្លងទៅថ្មីៗនេះ។ ក្នុងនោះយុវជន យ៉ាង ស៊ុនម៉េង សិស្សពូកែអក្សរសាស្ដ្រខ្មែរ ជាប់ចំណាត់ថ្នាក់លេខ៣ យុវជន គីម ហេង សិស្សពូកែរូបវិទ្យា ជាប់ចំណាត់ថ្នាក់លេខ៥ និងយុវតី ទ្រី ម៉ូនីកា សិស្សពូកែគណិតវិទ្យា ជាប់ចំណាត់ថ្នាក់លេខ៤។
សិស្សឆ្នើមទាំង៣រូបនេះ បានសម្តែងអាម្មរណ៍រំភើប និងមោទនភាពលើខ្លួនឯង ដែលទទួលបានលទ្ធផលដ៏ល្អនេះ ហើយពួកគេនឹងខំប្រឹងបំប៉នបន្ថែមនូវចំណេះដឹង ដើម្បីចូលរួមប្រឡងជ្រើសរើសសិស្សពូកែទូទាំងប្រទេស ដែលប្រព្រឹត្តទៅថ្ងៃទី២២ ខែមេសា នៅវិទ្យាល័យ១០មករា១៩៧៩ ខេត្តសៀមរាប នាពេលខាងមុខ។
និយាយដោយទឹកមុខម៉ឹងម៉ាត់ពោរពេញដោយភាពជឿជាក់លើសមត្ថភាពរបស់ខ្លួនឯង យុវជន យ៉ាង ស៊ុនម៉េង សិស្សពូកែអក្សរសាស្រ្តខ្មែរ បានលើកឡើងថា ពួកគេព្យាយាមរក្សាការសិក្សានេះ ដើម្បីចូលរួមប្រឡងប្រជែងជ្រើសរើសសិស្សពូកែទូទាំងប្រទេស នឹងខំប្រឹងឱ្យអស់ពីសមត្ថភាព។
សិស្សពូកែអក្សរសាស្រ្តខ្មែរម្នាក់នេះ បន្តថា និយាយនេះ មិនមែនមានន័យថា ពេលទទួលបានលទ្ធផលប៉ុណ្ណឹង យើងមានអំនួតនោះទេ តែត្រូវខិតខំប្រឹងប្រែង និងស្វែងរកចំណុចដែលខ្លួនខ្វះខាត ហើយបំពេញបន្ថែម។ ជាពិសេស មិនបោះបង់ការព្យាយាមខ្លួនឯងចោលទៅទទេៗនោះទេ គឺត្រូវតែប្រឹងឱ្យអស់ពីសមត្ថភាព ទើបមើលឃើញជោគជ័យ។
ជាមួយគ្នានេះ យុវតី ទ្រី ម៉ូនីកា សិស្សពូកែគណិតវិទ្យា បានលើកឡើងដែរថា មិនមែនជារឿងស្រួលទេក្នុងការដណ្ដើមយកជ័យលាភីទូទាំងរាជធានី។ តែលទ្ធផលដែលបង្ហាញនេះ គឺកើតចេញពីទម្លាប់នៃការខិតខំប្រឹងប្រែង និងព្យាយាមសិក្សារៀនសូត្រដោយខ្លួនឯងយ៉ាងលំបាក។ នេះជាកម្លាំងចិត្តធ្វើឱ្យរូបគេខិតខំព្យាយាមបន្ថែមទៀត។
ចំណែកយុវជន គីម ហេង សិស្សពូកែរូបវិទ្យា ជឿជាក់លើសមត្ថភាពខ្លួននៅមានកម្រិត ដូច្នេះក៏ត្រូវផ្អែកលើសំណាងខ្លះៗដែរ។ សិស្សពូកែរូបនេះ បញ្ជាក់ថា ការប្រឡងនេះមានការពិបាកលើសមធ្យម ត្រង់ថាវិញ្ញាសាប្រឡងមានវិសាលភាពទូលំទូលាយមែនទែន។ សម្រាប់យុវជន គីម ហេង ការរៀនសូត្រពូកែ ឬមិនពូកែមកពីកត្តាចម្បងមួយ នោះគឺកត្តាខ្លួនឯង។
គួរជម្រាបជូនថា នេះមិនមែនជាលើកទីមួយនោះទេ ដែលសាលារៀន អន្តរទ្វីប អាមេរិកាំង បានបញ្ចូលសិស្សឱ្យចូលប្រឡងសិស្សពូកែលំដាប់រាជធានី និងទូទាំងប្រទេស។ តាមការកត់សម្គាល់ សាលារៀនដែលល្បីខាងវិន័យតឹងរ៉ឹងមួយនេះ តែងតែបញ្ចូនសិស្សឱ្យចូលប្រឡងជារៀងរាល់ឆ្នាំ៕
.jpg)
