សិស្សពីររូបដែលត្រៀមទៅប្រឡងគណិតវិទ្យានៅសិង្ហបុរីបង្ហាញឆន្ទៈយកឱ្យបានមេដាយមាស
Admin
មានវ័យ១០ឆ្នាំ កុមារី សម្បត្តិ សិរីកា ធ្លាប់ឆ្លងកាត់ការប្រកួតជាលក្ខណៈអន្តរជាតិនេះ មិនតិចជាងបីដងនោះទេ និងធ្លាប់ទទួលបានមេដាយ៤លើករួចមកហើយ។ បន្ទាប់ពីទទួលបានមេដាយប្រាក់ ក្នុងការប្រកួតគណិតវិទ្យាអូឡាំពិក ដែលបានរៀបចំឡើង នៅប្រទេសកម្ពុជាកាលពីខែមេសា ឆ្នាំ២០១៨ និងត្រូវបានជ្រើសរើសឱ្យទៅប្រកួតនៅប្រទេសសឹង្ហបុរី កុមារី ដែលកូនរបស់អ្នកជំនួញរូបនេះ តាំងចិត្តថា នឹងយកឱ្យមេដាយមាសត្រឡប់មកវិញ ខណៈលើកទី១ដែលចូលរួមប្រកួតកាលពីឆ្នាំមុន នាងទទួលបានមេដាយសំរិទ្ធ។
សិរីកា បានប្រាប់ថា ការណ៍ដែលនាងតាំងចិត្តឱ្យយកបានមេដាយមាសនេះ ព្រោះចង់ឱ្យប៉ាម៉ាករបស់នាងសប្បាយចិត្ត។ នាងបានត្រៀមខ្លួនរួចហើយក្នុងការទៅប្រកួតជាមួយសិស្សដទៃនាពេលខាងមុខនេះ។ សិរីកា បញ្ជាក់ថា ដើម្បីទទួលបានមេដាយមាសតាមបំណង នាងនឹងបង្កើនការខិតខំរៀនជាងមុន និងត្រងត្រាប់ស្តាប់គ្រូឱ្យបានច្រើន ក៏ដូចជាការបង្រៀន ពីប៉ារបស់នាងនៅផ្ទះ។
អ្នកស្រី ងន គីមមួយ ដែលជាម្តាយរបស់កុមារី សិរិកា ជឿជាក់ថា កូនរបស់អ្នកស្រី នឹងទទួលបានមេដាយមួយត្រឡប់មកវិញ មិនថាមេដាយមាស ឬមេដាយប្រាក់នោះទេ។ ការណ៍អ្នកស្រីរំពឹងបែបនេះ ព្រោះអ្នកស្រី ជឿជាក់លើសមត្ថភាពសិរីកា ដោយសារនាងពូកែគណិតវិទ្យាតាំងតូចមក។
គួររម្លឹកថា កុមារី សម្បិត្ត សិរិកា ធ្លាប់ទទួលបានមេដាយចំនួន៣លើក ក្នុងការប្រកួតលក្ខណៈអន្តរជាតិ ក្នុងនោះរួមមាន មេដាយសំរឹទ្ធ លើការប្រកួត Singapore International Math Olympiad Challenge 2017 នៅប្រទេសសិង្ហបុរី ។ ទទួលបានមេដាយប្រាក់ ក្នុងការប្រកួត International Junior Math Olympiad ជាមួយបណ្តាប្រទេសនៅតំបន់អាស៊ី និងលើកទី៣ ទទួលបានមេដាយមាស ក្នុងការប្រកួត American Mathematics Olympiad Cambodia កាលពីឆ្នាំ២០១៧។ ដោយឡែក ការប្រកួតក្នុងឆ្នាំ២០១៨ ក្នុងកម្មវិធី ប្រកួតប្រជែងគណិតវិទ្យាអូឡាំពិករបស់ប្រទេសសិង្ហបុរី និងសាលាផ្សេងៗក្នុងតំបន់អាស៊ាន ឆ្នាំ២០១៨ ដែលគេហៅកាត់ថា SASMO ទទួលបានមេដាយប្រាក់។
ចំណែកកុមារ ចាន់ វិទូ ក៏នឹងត្រូវទៅចូលរួមប្រកួតគណិតវិទ្យា ជាមួយកុមារីសិរិកា នាពេលខាងមុខនេះផងដែរ។ ទោះជាលើកទី១ ដែលខ្លួនទៅចូលរួមប្រកួតនៅប្រទេសសឹង្ហបុរី តែកុមារារូបនេះ រំពឹង ៨០% ថាខ្លួននឹងយកឱ្យបានមេដាយមាស ត្រឡប់មកវិញ។ វិទូ បានបញ្ជាក់ថា តាំងដើមមក មុខវិជ្ជាដែលខ្លួនរៀនពូកែជាង គឺមុខវិទ្យាគណិតវិទ្យា ហើយខ្លួននឹងខំរៀនលើមុខវិជ្ជាមួយនេះបន្ថែមទៀត ដើម្បីទៅចូលរួមប្រកួតនៅប្រទេសល្បីល្បាញខាងវិស័យអប់រំមួយនេះ។
លោកចាន់ ចម្រើន ដែលជាឪពុករបស់កុមារ ចាន់ វិទូ បានប្រាប់ថា មុខវិជ្ជាគណិត គឺជាមុខវិជ្ជាមួយដែល វិទូ មានភាពលេចធ្លោជាងគេ។ លោកសង្កេតឃើញ ពីការខិតខំប្រឹងប្រែង និងការចង់ចូលរួមរបស់ ហើយលោកសង្ឃឹមថា នឹងទទួលបានមេដាយមាស ដូចការរំពឹងទុករបស់វិទូ។
គួរបញ្ជាក់ថា កម្មវិធីប្រកួត គណិតវិទ្យានៅប្រទេស សិង្ហបុរី នឹងប្រព្រឹត្តទៅ ចាប់ថ្ងៃទី៦ ដល់ថ្ងៃទី០៩ ខែកក្កដា ឆ្នាំ២០១៨៕
.jpg)
