វេជ្ជបណ្ឌិត គួច ម៉េងលី៖ យកក្រចកដៃខ្វេះអាចម៍ច្រមុះ អាចធ្វើឱ្យច្រមុះរលាករ៉ាំរ៉ៃ
លោកវេជ្ជបណ្ឌិត គួច ម៉េងលី ជំនាញផ្នែកសុខភាពទូទៅនិងសុខភាពសាធារណៈបានលើកឡើងថា ប្រសិនបើយកក្រចកដៃឬឧបករណ៍រឹងទៅឆ្កឹះអាចម៍ច្រមុះ ច្រមុះយើងនឹងរលាក ព្រោះភ្នាសច្រមុះមនុស្សយើងស្ដើងខ្លាំងណាស់។ នៅពេលរលាក ឱ្យតែកណ្តាស់ ឱ្យតែដកដង្ហើមធំ ឬឱ្យតែស្ងាប នោះស្បែកច្រមុះនឹងដាច់ ហើយនឹងហូរឈាមភ្លាមៗ ជួនកាលអាចនឹងរលាករ៉ាំរ៉ៃក៏មានដែរ។
លោកវេជ្ជបណ្ឌិតបន្តថា នៅពេលមានអាចម៍ច្រមុះ វានឹងធ្វើឱ្យយើងដកដង្ហើមមកឈឺ ទើស រមាស់ ឬពេលយើងប៉ះទៅលើវា វាឈឺ ព្រោះអាចម៍ច្រមុះនិងកោសិកាក្នុងច្រមុះអត់ត្រូវគ្នាទេ។ ហេតុនេះ ធ្វើឱ្យយើងត្រូវឆ្កឹះវាចេញ។ លុះដល់ឆ្កឹះយូរៗទៅ កោសិកានៅខាងក្នុងនឹងកកិត។ ការកកិតជារឿយៗ ធ្វើឱ្យច្រមុះមានដំបៅ ដែលមិនអាចព្យាបាលមួយអាទិត្យជានោះទេ ហើយថ្ងៃក្រោយក៏អត់ជាដែរ វាទៅជារ៉ាំរ៉ៃ។
លោកវេជ្ជបណ្ឌិតបានណែនាំថា បើចង់បង្ការបញ្ហាដែលកើតឡើងពីការខ្វេះអាចម៍ច្រមុះ គឺត្រូវខ្វេះឱ្យមានក្បួនត្រឹមត្រូវ។ ពោលនៅពេលងូតទឹកព្រឹករួច សូមយកក្រដាសទន់ៗឬក្រណាត់ជូតមាត់មកត្បារច្រមុះតិចៗ នោះអាចម៍ច្រមុះនឹងដោយមកទាំងដុំៗ។ ការធ្វើដូច្នេះ វានឹងលែងមានអាចម៍ច្រមុះពេញមួយថ្ងៃ៕
អត្ថបទទាក់ទង
.jpg)
