លោក គួច ម៉េងលី៖ ដើម្បីឱ្យប្រជាជនមានជីវភាពធូរធារ រដ្ឋគួរចែកដីឱ្យពួកគាត់មួយល្មមធ្វើចម្ការ
Admin
ក្នុងឱកាសចែករំលែកចំណេះដឹងស្តីពី “និន្នាការការងារ មុខរបរ និងជំនាញនារយៈពេល៥-១០ឆ្នាំខាងមុខទៀត” អ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន មានប្រសាសន៍ថា កោះតៃវ៉ាន់ដែលចែកដីដល់ប្រជាជនឱ្យបង្កបង្កើនផលកសិកម្ម ហើយប្រមូលទិញផលពីប្រជាកសិករមកវិញ គឺបានធ្វើឱ្យជីវភាពរបស់គេមានភាពប្រសើរឡើង។ លោកបន្តថា « ចែកដីឱ្យប្រជាជនម៉ាល្មមធ្វើចម្ការ ហាមលក់ បើលក់យកវិញ លក់យកវិញ ក្នុងចំនួន៣៥ឆ្នាំអ៊ីចឹងទៅ ហើយអ្នកឯងតម្រូវឱ្យធ្វើចម្ការលើដីហ្នឹង ហើយរដ្ឋធានាលើផលប្រយោជន៍ ឬក៏ឯកជនធានាលើផលប្រយោជន៍នាំចេញ»។
លោកស្រី តុង ច័ន្ទធាង នាយការអង្គការសេដាក(CEDAC)ក៏បានបង្ហាញការគាំទ្រផងដែរចំពោះគំនិតនេះ ហើយអ្នកស្រីបានលើកឡើងថា បើបានជាចែកដីជូនប្រជាពលរដ្ឋហើយនោះ គឺត្រូវតែរៀបចំជាហេដ្ឋារចនាសម្ពន្ធ ដូចជាផ្លូវថ្នល់ មន្ទីរពេទ្យជាដើម ដើម្បីឱ្យប្រជាពលរដ្ឋអាចរស់នៅមើលថែដំណាំរបស់ខ្លួនបាន។ «អ៊ីចឹងអាការចែកដីជូនប្រជាជនដែលអត់ ដើម្បីគាត់ធ្វើកសិកម្មបាន ហើយយើងបង្រៀនបច្ចេកទេសគាត់ថែមទៀត ព្រមទាំងរកទីផ្សារឱ្យ គឺជាគំនិតល្អ ដែលការងារហ្នឹង ទាំងអង្គការ សង្គមស៊ីវិល ទាំងរាជរដ្ឋាភិបាល បានធ្វើកន្លងមកច្រើន ប៉ុន្តែយើងនៅតែមិនទាន់ឆ្លើយតបបានដល់ប្រជាជនពេលលេញនៅឡើយ។»
យោងតាមរបាយការណ៍អង្កេតចន្លោះជំរឿនកសិកម្មឆ្នាំ២០១៩ នៃវិទ្យាស្ថានសិ្ថតិ ក្រសួងផែនការឱ្យដឹងថា កម្ពុជាមានចំនួនគ្រួសារប្រកបរបរកសិកម្មសរុប ១ ៧២៦ ៣៣៧គ្រួសារ ក្នុងនោះ៩៨,១%មានដីផ្ទាល់ខ្លួន។ ក្នុងចំណោមកសិករទាំងអស់គឺមានកសិករដែលមានកសិដ្ឋានខ្នាតតូច៧៤,៦%៕
អត្ថបទ៖ រតនៈ
.jpg)
