ម្ចាស់ពានរង្វាន់តែងនិពន្ធលេខ១៖ ការអានច្រើន បង្កើតស្នាដៃនិពន្ធឱ្យបានល្អ និងតម្រូវចិត្តអ្នកអាន
Admin
អ្នកជោគជ័យ តែងកើតចេញពីការអាន ហើយការអានច្រើន កើតចេញពីទម្លាប់ ឧស្សាហ៍ និងចូលចិត្តទៅនឹងការអាន។ ដោយឡែកចំពោះអ្នកនិពន្ធ ដែលមានស្នាដៃល្អ និងមានការគាំទ្រច្រើន ក៏កើតចេញពីការអានច្រើនផងដែរ ទោះពេលខ្លះអ្នកទាំងនោះរកពេលអានឯកសារ ឬសៀវភៅស្ទើរពុំបាន តែនៅតែព្យាយាមឆ្លៀតអាន ដើម្បីបន្តអភិវឌ្ឍសមត្ថភាព និងវិនិយោគទៅលើចំណេះដឹងរបស់ខ្លួនជាប្រចាំ។
សម្រាប់ការអានច្រើន តើមានសារៈសំខាន់អ្វីខ្លះដល់ការតែងនិពន្ធស្នាដៃឱ្យបានល្អ?
ឆ្លើយតបទៅនឹងសំណួររបស់អ្នកសារព័ត៌មាន The Intercon Rooster ម្ចាស់ជយលាភីពានរង្វាន់ឥន្ទ្រទេវីលេខ១ប្រចាំឆ្នាំ២០២០ លោក កែវ សេងរដ្ឋា បានចែករំលែកបទពិសោធដូច្នេះថា ការអានច្រើន មានសារៈសំខាន់ណាស់ចំពោះការតែងនិពន្ធឱ្យបានល្អ។
សារៈសំខាន់ៗទាំងនោះ អ្នកនិពន្ធមកពីខេត្តកំពង់ឆ្នាំងរូបនេះ បានចែករំលែកបទពិសោធចំណុចទីមួយថា ការអានច្រើន ធ្វើឱ្យអ្នកនិពន្ធមានចំណេះដឹងទូលំទូលាយ ព្រោះរាល់ការសរសេរស្នាដៃមួយឱ្យមានអត្ថន័យល្អ ខ្លឹមសារមានទម្ងន់ គឺទាមទារឱ្យអ្នកនិពន្ធមានការយល់ដឹងច្រើន ជាពិសេស ចំណេះដឹងដែលពាក់ព័ន្ធទៅនឹងអ្វីដែលខ្លួនត្រៀមនឹងសរសេរ។
ម្ចាស់ពានរង្វាន់ឥន្ទ្រទេវី២០២០ដដែលពន្យល់ថា ការអាន ជាមធ្យោបាយមួយនៃការស្រាវជ្រាវ ហើយមុននឹងសរសេរអ្វីដែលយើងមិនដែលដឹង ឬមិនសូវដឹងច្បាស់ អ្នកនិពន្ធត្រូវតែធ្វើការស្រាវជ្រាវ ដើម្បីទទួលបានចំណេះដឹងបន្ថែម។
ទាក់ទិននឹងវប្បធម៌នៃការអាននេះ លោក កែវ សេងរដ្ឋា បានសង្កត់ធ្ងន់នូវចំណុចទីពីរបន្តដូច្នេះថា ការអានស្នាដៃរបស់អ្នកនិពន្ធដទៃឱ្យបានច្រើន ក៏អាចជួយឱ្យយើងដែលជាអ្នកនិពន្ធម្នាក់ មានឱកាសរៀនសូត្រពីរបៀបសរសេររបស់អ្នកនិពន្ធផ្សេងៗដោយប្រយោលផងដែរ។ លោកអះអាងថា អ្នកអានជាច្រើនបានវិវត្តខ្លួនក្លាយជាអ្នកនិពន្ធតាមរយៈការអានស្នាដៃរបស់អ្នកនិពន្ធជាច្រើន។
អ្នកនិពន្ធឆ្នើមរូបនេះបញ្ជាក់ថា នៅពេលយើងអានស្នាដៃរបស់គេ យើងនឹងដឹងថាក្នុងនាមជាអ្នកអានម្នាក់ តើស្នាដៃបែបណាគួរឱ្យចង់អាន? ដូច្នេះក្នុងនាមជាអ្នកនិពន្ធម្នាក់ តើយើងនឹងសរសេរស្នាដៃបែបណាសម្រាប់អ្នកអាន?
សូមជម្រាបថា បច្ចុប្បន្ន លោក កែវ សេងរដ្ឋា ជាអ្នកនិពន្ធ និងជាវេជ្ជបណ្ឌិតផ្នែកវះកាត់ទូទៅមួយរូបផងដែរ។ លោកបានបញ្ចប់ការសិក្សាថ្នាក់វេជ្ជបណ្ឌិតឯកទេសវះកាត់ទូទៅ និងប្រព័ន្ធរំលាយអាហារ ពីសាកលវិទ្យាល័យវិទ្យាសាស្ត្រសុខាភិបាល កាលពីឆ្នាំ២០១៩ និងបានបញ្ចប់ថ្នាក់បរិញ្ញាបត្រអក្សរសាស្ត្រអង់គ្លេស ពីសាកលវិទ្យាល័យពុទ្ធិសាស្ត្រ នៅឆ្នាំ២០១៥។
លោក កែវ សេងរដ្ឋា មានស្រុកកំណើតនៅខេត្តកំពង់ឆ្នាំង ដែលមានឪពុកម្ដាយជាមន្ត្រីរាជការ។ ចំពោះស្នាដៃដែលធ្លាប់បោះពុម្ពចេញផ្សាយកាលពីកន្លងទៅរួមមាន ទី១. «សំឡេងខ្សឹប» ទី២. «ហឫទ័យ» ទី៣. «បែបណាទើបល្អ» ទី៤. ស្នាដៃសហនិពន្ធរួមមាន«មន្តទឹកខ្មៅ» «ព្រៃរំដួល» និង «ខ្មាសខ្លួនឯង»។
ក្រៅពីមានស្នាដៃចេញផ្សាយជាច្រើន អ្នកនិពន្ធរូបនេះ បានទទួលពានរង្វាន់ជាច្រើនផងដែរ។ ក្នុងនោះមានដូចជា ជយលាភីលេខ១ ពានរង្វាន់ព្រះនាងឥន្ទ្រទេវីឆ្នាំ២០២០ ផ្នែកប្រលោមលោករឿង “ឧត្តមគតិ”, ជាម្ចាស់ជយលាភីលេខ៤ ពានរង្វាន់លោក លី ធាមតេង ឆ្នាំ២០១៨ ផ្នែកប្រលោមលោករឿង “បេសកកម្មបេះដូង” និងជយលាភីលេខ ៣ ពានរង្វាន់មហោស្រពអក្សរសិល្ប៍ឆ្នាំ២០១៨ ផ្នែកកំណាព្យទំនើបនិយម «សុរិយា»។
គួររម្លឹកថា ទិវាអំណានជាតិលើកទី៦ នៅថ្ងៃទី១១ ខែមីនា ឆ្នាំ២០២១ ខាងមុខនេះ ក្រសួងអប់រំ យុវជន និងកីឡា បានសម្រេចជ្រើសប្រធានបទ “អំណានក្នុងបរិបទកូវីដ-១៩” ដែលធ្វើឡើងទៅតាមប្រព័ន្ធអនឡាញ ទំព័រហ្វេសប៊ុកផ្លូវការរបស់ក្រសួងអប់រំ យុវជន និងកីឡា (MoEYS Cambodia)៕
.jpg)
