ម៉ុក មុនីរតនៈ មិនត្រឹមតែជាសិស្សស្អាត ឆ្លាត ហើយថែមទាំងពូកែទៀត…
Admin
មិនត្រឹមតែមានសម្រស់ស្អាត និងឆ្លាតទេ យុវតី ម៉ុក មុនីរតនៈ ក៏ជាសិស្សពូកែម្នាក់របស់សាលារៀន អន្តរទ្វីប អាមេរិកាំង ផងដែរ។ យុវតីម្នាក់នេះ បានជាប់ជាសិស្សពូកែទូទាំងរាជធានី ផ្នែកគណិតវិទ្យា កាលពីឆ្នាំ២០១៨ ហើយថ្មីៗនេះ បានឈ្នះមេដាយប្រាក់មួយទៀត លើការប្រកួតសិស្សពូកែគណិតវិទ្យា ពីកម្មវិធីគណិតវិទ្យាលំដាប់ថ្នាក់ពិភពលោក (World Mathematic International) ហៅកាត់ WMI ។
ការប្រកួតគណិតវិទ្យាលំដាប់ថ្នាក់ពិភពលោកនេះ គឺធ្វើឡើងជារៀងរាល់ឆ្នាំ នៅក្នុងបណ្ដាប្រទេសនានា នៅលើពិភពលោកទូទាំងទ្វីបអាស៊ី ដើម្បីលើកទឹកចិត្ត ជំរុញ ពង្រឹងសមត្ថភាព ជាពិសេសបង្កើនសក្តានុពលអ្នកគណិតវិទ្យាវ័យក្មេង។
ជាមួយនឹងការឈ្នះមេដាយនេះ យុវតី មុនីរតនៈ បានសម្តែងអាម្មរណ៍រំភើប និងមោទកភាពលើខ្លួនឯងដែលទទួលបានលទ្ធផលដ៏ល្អនេះ។ មិនត្រឹមតែខ្លួនឯងទេ លោកគ្រូអ្នកគ្រូ រួមទាំងមិត្តភក្ដិ ក៏មានការស្ងើចសរសើរដល់សមត្ថភាព និងអបអរនឹងលទ្ធផលនេះផងដែរ។
ស្ថិតក្នុងចំណោមបងប្អូន៤នាក់ យុវតី ម៉ុក មុនីរតនៈ ជាកូនពៅក្នុងគ្រួសារ និងជាសិស្សឆ្នើមម្នាក់ដែលចេះដាក់ខ្លួន នៅសាលារៀន បើទោះបីជារូបគេនៅចំណោមសិស្សឆ្នើមដទៃក៏ដោយ ក៏មុនីរនៈយល់ថា សមត្ថភាពមិនទាន់ដល់កម្រិតមួយដែលខ្លាំងដាច់គេនោះទេ។ ដូច្នេះហើយ អ្វីដែលត្រូវធ្វើបន្ត គឺការសិក្សាបន្ថែម មិនថានៅក្នុងថ្នាក់ ឬនៅផ្ទះទេ ដើម្បីពង្រឹងចំណេះដឹងឱ្យកាន់តែខ្លាំងដើម្បីទៅប្រកួតប្រជែងក្នុងកម្មវិធីចំណេះដឹងផ្សេងទៀត។
សិស្សឆ្នើមស្រីវ័យ១៦ឆ្នាំម្នាក់នេះ បានសន្យាយ៉ាងមុតមាំថា នឹងខំប្រឹងប្រែងរៀនសូត្រ បន្ទាប់មកនឹងចូលរួមប្រឡងសិស្សពូកែផ្នែកនេះ នៅឆ្នាំក្រោយៗទៀត ទោះលទ្ធផលយ៉ាងណានោះ ក៏មិនទាន់ហ៊ានប៉ាន់ស្មានដែរ ព្រោះថា សិស្សានុសិស្សផ្សេងៗទៀតសុទ្ធតែមានសមត្ថភាពខ្ពស់ តែយុវតីម្នាក់នេះមានឆន្ទៈមុតមាំ គឺមិនបោះបង់ការខិតខំរបស់ខ្លួនចោលឡើយ។
យុវតី មុនីរតនៈ ចង់ក្លាយជាវេជ្ជបណ្ឌិតទៅថ្ងៃអនាគត ដែលគោលបំណងនេះ ខុសពីឪពុកម្ដាយជាអ្នករកស៊ី ព្រោះគេយល់ថាពេទ្យអាចជួយសង្គ្រោះជីវិតអ្នកជំងឺទាំងឡាយបាន ថ្វីដ្បិតថាមានការលំបាក ប្រើពេលយូរ និងចំណាយថវិកាច្រើន ក៏រូបគេមិនបោះបង់ក្តីស្រមៃមួយនេះដែរ។ បើតាមប្រសាសន៍របស់លោកឧកញ៉ា គួច ម៉េងលី ដែលជាម្ចាស់សាលារៀន អន្តរទ្វីប អាមេរិកាំង បានលើកឡើងថា ពេទ្យជាជំនាញមួយដែលមិនចេះអស់ម៉ូយ។ ក្រោមហេតុផលនេះហើយទើបបានជា មុនីរតនៈ ប្រឹងកសាងមូលដ្ឋានគ្រឹះជំនាញមួយនេះ និងបញ្ចេញសមត្ថភាពកម្មវិធីអប់រំផ្សេងៗ៕
.jpg)
