បន្ទាប់ពី​​ប្រកួត​អាន​ ​និង​តែង​អត្ថបទ​​យ៉ាង​​ស្វិតស្វាញ​​ពេញ​​មួយ​​ព្រឹក​​ ​ក្នុង​ចំណោម​បេក្ខជន​​ឆ្នើម​ទាំង​២២​រូប​នោះ​ ​គណៈកម្មការ​​ជំនាញ​​បាន​​ស្វ័យ​​សម្រេច​​ជ្រើស​បេក្ខជន​​ចំនួន​៣​​ រូប ​ដើម្បី​ជាប់​​ជ័យ​លាភី​ ​និង​ឡើង​​ទទួល​​ពានរង្វាន់​ ​ម៉េ​ង​លី​ ​ជេ​.​ ​គួច​ ​ក្នុង​​រដូវ​កាល​​ថ្មីនេះ​។​ ​ក្នុងចំណោម​បេក្ខជន​ជាប់ជើង​ឯក​ទាំង៣រូប​នេះ​ ​រួមមាន​លេខ១​ ​បាន​ទៅលើ​យុវតី​ ​ហុង​ ​សៀក​លីវ​ ​សិស្ស​ថ្នាក់​ទី៩​ ​លេខ២​ ​បាន​ទៅលើ​យុវតី​ ​អ៊ុង​ ​ខេ​រា​បូណ៌មី​ច័ន្ទ​ ​សិស្ស​ថ្នាក់​ទី១០​ ​និង​លេខ៣​ ​បាន​ទៅលើ​យុវ​សិស្ស​ ​វណ្ណៈ​ ​ណូបលហ្ស៊ូ​លី​ ​សិស្ស​ថ្នាក់​ទី១០​ ​នៃ​សាលារៀន​ ​អន្តរទ្វីប​ ​អាមេរិកាំង​។​
​
​បេក្ខជន​ជ័យលាភី​ជាប់​ពានរង្វាន់​ ​ម៉េ​ង​លី​ ​ជេ​.​ ​គួច​ ​លើក​ទី៦​ ​នេះ​ ​គឺ​លេខ១​ ​ទទួល​បាន​អាហារូបករណ៍១០០​%​ ​ពានរង្វាន់​ ​មេដាយមាស​ ​បណ្ណ​សរសើរ​ ​និង​វត្ថុ​អនុស្សាវរីយ៍​ ​លេខ២​ ​ទទួល​បាន​អាហារូបករណ៍៧៥​%​ ​មេដាយ​ប្រាក់​ ​បណ្ណ​សរសើរ​ ​និង​វត្ថុ​អនុស្សាវរីយ៍​ ​និង​លេខ៣​ ​ទទួល​បាន​អាហារូបករណ៍៥០​%​ ​មេដាយ​សំរឹទ្ធ​ ​បណ្ណ​សរសើរ​ ​និង​វត្ថុ​អនុស្សាវរីយ៍​។​ ​នេះ​បើ​តាម​លោកស្រី​ ​ប៉ែន​ ​មាលតី​ ​អ្នក​រៀបចំ​កម្មវិធី​នៃ​ការប្រកួត​ ​និង​ជា​ចាងហ្វាង​រង​មធ្យមសិក្សា​បឋមភូមិ​ ​នៃ​សាលារៀន​ ​អន្តរទ្វីប​ ​អាមេរិកាំង​ ​សាខា​ម៉ៅសេទុង​។​ ​លោកស្រី​ ​ប៉ែន​ ​មាលតី​ ​បន្ត​ឱ្យ​ដឹង​ថា​ ​នេះ​ជា​លើក​ទី៦​ ​ហើយ​ ​ដែល​សាលារៀន​ ​អន្តរទ្វីប​ ​អាមេរិកាំង​ ​ផ្ដល់​ឱកាស​ដល់​សិស្សានុសិស្ស​បាន​បញ្ចេញ​នូវ​សមត្ថភាព​ ​ចំណេះដឹង​ ​ចំណេះធ្វើ​ ​បទ​ពិសោធ​ ​និង​ទេពកោសល្យ​របស់​ខ្លួន​ ​នៅ​លើ​វេទិកាសាធារណៈ​ ​ដែល​មាន​មនុស្ស​ចូលរួម​យ៉ាងច្រើន​កុះករ​។​
​
​លោកស្រី​បញ្ជាក់​ថា​ ​កម្មវិធី​នេះ​ផ្ដួចផ្ដើម​ឡើង​ដោយ​លោក​ឧកញ៉ា​ ​វេជ្ជបណ្ឌិត​ ​គួច​ ​ម៉េ​ង​លី​ ​ស្ថាបនិក​ ​ប្រធាន​ក្រុមប្រឹក្សា​ភិបាល​ ​និង​អគ្គនាយក​ប្រតិបត្តិ​ ​នៃ​សាលារៀន​ ​អន្តរទ្វីប​ ​អាមេរិកាំង​ ​ដើម្បី​បណ្ដុះ​នូវ​វប្បធម៌​អាន​ ​លើកស្ទួយ​វិស័យ​តែង​និពន្ធ​ ​រួម​អភិរក្ស​វិស័យ​អក្សរសាស្ត្រ​ ​ការប្រើ​ប្រាស់​ពាក្យ​ ​និង​អក្ខរា​វិរុទ្ធ​ ​ប្រកបដោយ​ត្រូវ​ត្រឹម​។​ ​ជាពិសេស​ ​បណ្ដុះ​នូវ​ទឹកចិត្ត​ស្រឡាញ់​ ​វប្បធម៌​ ​អារ្យធម៌​ ​ជាតិ​ ​សាសនា​ ​និង​ប្រវត្តិសាស្ត្រ​ជាដើម​។​

​បេក្ខជន​ជ័យលាភី​លេខ១​ ​យុវតី​ ​ហុង​ ​សៀក​លីវ​ ​បានឱ្យ​ដឹង​ថា​ ​កម្មវិធី​នេះ​ ​ពិតជា​មាន​សារៈសំខាន់​បំផុត​ ​សម្រាប់​សិស្សានុសិស្ស​ ​និង​បេក្ខជន​ចូលរួម​ប្រកួត​ ​ព្រោះ​ឆ្លងតាម​ការប្រកួត​នេះ​ ​គឺ​ទទួល​បាន​ចំណេះដឹង​ ​បទ​ពិសោធ​ ​បណ្ដុះ​នូវ​ភាព​ក្លាហាន​ ​បង្កើន​ភាព​ឈ្លាសវៃ​ ​ចេះ​ស្វ័យ​សិក្សា​ស្រាវជ្រាវ​ ​និង​មាន​នូវ​ទម្លាប់​អាន​។​ ​

​ជាចុងក្រោយ​ ​បេក្ខជន​ជើងឯក​ពានរង្វាន់​ ​ម៉េ​ង​លី​ ​ជេ​.​ ​គួច​ ​សៀក​លីវ​ ​បាន​ថ្លែង​អរគុណ​ដល់​លោកគ្រូ​ ​អ្នកគ្រូ​ ​ជាពិសេស​គណៈ​គ្រប់គ្រង​សាលារៀន​ ​អន្តរទ្វីប​ ​អាមេរិកាំង​ ​ដែល​បាន​បង្កើត​កម្មវិធី​ប្រកួត​ចំណេះដឹង​យ៉ាង​សម្បូរ​បែប​ ​ដើម្បី​ជា​ប្រយោជន៍​ដល់​សិស្សានុសិស្ស​។​

​សូមជម្រាប​ថា​ ​ការប្រកួត​នេះ​ ​ធ្វើឡើង​នៅ​សាលារៀន​ ​អន្តរទ្វីប​ ​អាមេរិកាំង​ ​សាខា​ទួលគោក​ ​ក្រោម​វត្តមាន​លោកស្រី​ ​រស់​ ​យ៉ា​ណា​ ​ប្រធាន​សាលារៀន​,​ ​ចាងហ្វាង​ ​លោកគ្រូ​ ​អ្នកគ្រូ​ ​និង​សិស្សានុសិស្ស​រាប់​រយ​នាក់​។​