បេក្ខជន៣រូប ជាប់ជ័យលាភីជើងឯក សរសេរពាក្យជាភាសាចិនបានលឿន
Admin
នៅវគ្គផ្ដាច់ព្រ័ត្រ នៃការប្រកួតល្បឿនសរសេរពាក្យជាភាសាចិន កាលពីថ្ងៃទី១៤ ខែកក្កដា ឆ្នាំ២០១៨ កន្លងទៅនេះ គណៈកម្មការជំនាញនៃការប្រកួតប្រចាំមជ្ឈមណ្ឌលភាសាចិន ម៉េងលី ជេ. គួច បានរកឃើញបេក្ខជនជើងឯកចំនួន៣រូប ក្នុងរដូវកាលនេះ ដែលមានសមត្ថភាពខ្ពស់ និងសរសេរពាក្យបានលឿនបំផុត ក្នុងចំណោមបេក្ខជនជាច្រើនរយនាក់។
លោក ទីវ ជុងអៀង ប្រធានផ្នែកភាសាចិន នៃមជ្ឈមណ្ឌលភាសាចិន ម៉េងលី ជេ. គួច បានឱ្យដឹងថា ការប្រកួតល្បឿនសរសេរពាក្យជាភាសាចិននេះ ធ្វើឡើងក្នុងគោលបំណងបណ្ដុះនូវជំនាញស្រាវជ្រាវ ការប្រើប្រាស់ពាក្យ និងបង្កើនសមត្ថភាពខ្ពស់ផ្នែកភាសាចិន របស់សិស្សានុសិស្សឱ្យកាន់តែប្រសើរ បន្ទាប់ពីនិយាយ ស្តាប់ និងការបញ្ចេញសំឡេង។ ព្រោះការសរសេរ គឺដើរតួនាទីយ៉ាងសំខាន់ក្នុងការសិក្សាភាសាចិនឱ្យកាន់តែមានគុណភាព និងប្រសិទ្ធភាព។ ម្យ៉ាងភាសានេះ ក៏ជាភាសាមួយ ដែលពិបាកក្នុងការសរសេរជាងភាសាដទៃផងដែរ។
លោកបន្តថា ការប្រកួតល្បឿនសរសេរពាក្យជាភាសាចិនលើកទី១នេះ ពិតជាមានអត្ថប្រយោជន៍ និងសារៈសំខាន់ខ្លាំងណាស់ ព្រោះជាការបណ្ដុះនូវភាពក្លាហាន ឈ្លាសវៃ ប្រុងប្រយ័ត្ន រហ័សរហួន ហ្មត់ចត់ និងផ្ចិតផ្ចង់របស់អ្នកសិក្សា។
ប្រធានផ្នែកភាសាចិនរូបនេះ បញ្ជាក់ថា ការប្រកួតល្បឿនពាក្យនេះ ក្នុងមួយឆ្នាំមជ្ឈមណ្ឌលភាសាចិន ម៉េងលី ជេ. គួច បានរៀបចំការប្រកួតចំនួន៤ដង ដោយមួយវគ្គៗសិក្សា ប្រកួតមួយដង ដើម្បីផ្ដល់ឱកាសដល់សិស្សានុសិស្សកម្រិតសិក្សាបានបញ្ចេញនូវសមត្ថភាព ចំណេះដឹង ចំណេះធ្វើ និងជាប្រយោជន៍យ៉ាងសម្បូរបែប នៃការប្រកួតប្រជែងជើងឯកនេះផងដែរ។
ក្នុងចំណោមបេក្ខជនជើងឯកទាំង៣រូបនេះ យុវតី ប៊ុន ស្រីពេជ្រ កម្រិត Level 9 ជ័យលាភីលេខ១ បានថ្លែងចំណាប់អារម្មណ៍ថា “ខ្ញុំពិតជារំភើប និងរីករាយយ៉ាងក្រៃលែង ដែលទទួលបានជ័យលាភីលេខ១ ក្នុងរដូវកាលនេះ”។
ស្រីពេជ្រ បន្ថែមថា មជ្ឈមណ្ឌលបង្កើតកម្មវិធីនេះឡើង ពិតជាមានអត្ថប្រយោជន៍យ៉ាងក្រៃលែង ដល់រូបគេ និងបេក្ខជនដទៃទៀត ព្រោះមានឱកាសបានសាកល្បង និងបញ្ចេញសមត្ថភាព ដើម្បីឈ្វេងយល់ពីចំណុចខ្លាំង និងចំណុចខ្សោយ ឬបន្តស្រាវជ្រាវពាក្យ និងសិក្សាភាសាចិនបន្ថែមទៀត ក្នុងការបំពេញបន្ថែមរាល់ចំណុចខ្វះខាត។
បេក្ខជនទាំង៣រូប ដែលជាកំពូលអ្នកសរសេរពាក្យបានលឿនបំផុតនៅរដូវកាលនេះ លេខ១ បានទៅលើបេក្ខជន ប៊ុន ស្រីពេជ្រ កម្រិត Level 9។ លេខ២ បានទៅលើបេក្ខជន ម៉ម សុធារី កម្រិត Level 1 និងលេខ៣ បានទៅលើបេក្ខជន គង់ សុវណ្ណពិសិដ្ឋ កម្រិត Intro 4។
សូមជម្រាបថា បេក្ខជនទាំង៣រូប ជាប់ជ័យលាភីក្នុងរដូវកាលនេះ លេខ១ ទទួលបានអាហារូបករណ៍១០០% ពានរង្វាន់១ មេដាយ១ បណ្ណសរសើរ និងវត្ថុអនុស្សាវរីយ៍។ បេក្ខលេខ២ ទទួលបានអាហារូបករណ៍៧៥% មេដាយ១ បណ្ណសរសើរ និងវត្ថុអនុស្សាវរីយ៍ និងលេខ៣ ទទួលបានអាហារូបករណ៍៥០% មេដាយ១ និងវត្ថុអនុស្សាវរីយ៍។ នេះបើតាមលោក ទីវ ជុងអៀង ប្រធានផ្នែកភាសាចិន នៃមជ្ឈមណ្ឌលភាសាចិន ម៉េងលី ជេ. គួច បញ្ជាក់បន្ថែម។
មជ្ឈមណ្ឌលភាសាចិន ម៉េងលី ជេ. គួច ជាបុត្រសម្ព័ន្ធ នៃវិទ្យាស្ថាន និងសាលារៀន អន្តរទ្វីប អាមេរិកាំង និងមជ្ឈមណ្ឌលភាសា អេ អាយ អាយ ដែលឈានមុខគេទាំងគុណភាព វិន័យ និងសេវាកម្ម ប្រកបដោយប្រសិទ្ធភាព និងមានស្ដង់ដារជាតិ និងអន្តរជាតិខ្ពស់៕
.jpg)
