បណ្ណាល័យម៉េងលី ជេ. គួច រៀបចំអំណានសិស្សក្នុងន័យអបអរទិវាអំណានជាតិ
Admin
ដើម្បីចូលរួមអបអរទិវាជាតិអំណាន លើកទី៤ ក្រោមប្រធានបទ «ការអានបណ្តុះវប្បធម៌ ការសិក្សាពេញមួយជីវិត» នាថ្ងៃទី១១ មីនា បណ្ណាល័យ ម៉េងលី ជេ. គួច បានរៀបចំកម្មវិធីអំណាន សម្រាប់សិស្សមជ្ឈមណ្ឌលភាសា Aii និងសាលា AIS ចូលរួមអានសៀវភៅដើម្បីចំណេះដឹង និងដើម្បីអបអរទិវាជាតិអំណាន។
ឋិតក្នុងបរិយាកាសដ៏សែនរីករាយនៃការអានសៀវភៅ នៅក្នុងបណ្ណាល័យ ក្រៅពីការយកចិត្តទុកដាក់អានសៀវភៅទៅតាមចំណង់ចំណូលចិត្ត ការរៀនបត់ផ្ដា និងមានការចាប់រង្វាន់ដើម្បទទួលបានសៀវភៅ ក៏មានធ្វើឡើងនៅក្នុងព្រឹត្តិការណ៍នេះផងដែរ។
យុវតី ហេង យុវិត្តី ជាសិស្សម្នាក់ក្នុងចំណោមសិស្សានុសិស្សជាច្រើន ដែលបានចូលរួមអានសៀវភៅ នៅក្នុងបណ្ណាល័យនេះ បានបង្ហាញពីអារម្មណ៍ថា ការមកអានសៀវភៅជាមួយមិត្តភក្តិទទួលបានចំណេះដឹងជាច្រើន ព្រោះការមកសិក្សារៀនសូត្រពីការអានសៀវភៅនេះ មិនស្មុគស្មាញ និងមានអារម្មណ៍ល្អ។
សម្រាប់យុវតីម្នាក់នេះ សៀវភៅដែលរូបគេនិយមអាន ភាគច្រើនជាបែបប្រលោមលោក និងសៀវភៅទាក់ទងនឹងសេដ្ឋកិច្ច។ យុវតី ហេង យុវិត្តី អះអាងថា នៅពេលអានសៀវភៅម្ដងៗ តែងតែគំនិតថ្មីផុសឡើង ចេះគិតបានច្រើនជាងមុន ស្គាល់នូវពាក្យថ្មីៗច្រើន និងមួយចំណែកទៀត ជាជំនួយជួយដល់ការសរសេរតែងសេចក្តីរបស់គេទៀតផង។
ស្រដៀងគ្នានេះ យុវសិស្ស តាន់ ហុកធាន បានឱ្យដឹងថា សកម្មភាពនៃការអានសៀវភៅបានធ្វើបានធ្វើឱ្យមានអារម្មណ៍រីករាយ និងកាន់តែពិសេសជាងនេះនោះ គឺការទទួលបានសារប្រយោជន៍ពីការអានសៀវភៅ។
ដៃកំពុងកាន់សៀវភៅ១០៨ ចក្ខុវិស័យ របស់លោកឧកញ៉ា គួច ម៉េងលី យុវសិស្ស ហុកធាន បានលើកឡើងថា ការចូលរួមអបអរទិវាអំណានជាតិ តាមរយៈការអានសៀវភៅ មិនមែនមានតែនៅក្នុងទិវាជាតិអំណានទេ គឺអានគ្រប់ពេលវេលា ដើម្បីចំណេះដឹង។ បុព្វហេតុដែលយុវសិស្សម្នាក់ជ្រើសរើសយកសៀវភៅ១០៨ ចក្ខុវិស័យ ឧកញ៉ា គួច ម៉េងលី មកអាន ក៏ព្រោះខ្លួនគេមានទំនោរទៅរកអ្នកសេដ្ឋកិច្ច និងចង់ធ្វើជាអ្នកជំនួញនៅថ្ងៃអនាគត។
ហុកធាន គឺជាយុវសិស្សមួយរូបដែលគាំទ្រស្នាដៃអ្នកនិពន្ធខ្មែរ និងបានជាវនូវសៀវភៅជាច្រើនទាក់ទិននឹងចំណង់ចំណូលចិត្តរបស់គេ។ យុវសិស្សរូបនេះថា ការបង្កើតនូវទិវាអំណានជាតិនេះឡើង គឺពិតជាបានផ្តល់នូវផលប្រយោជន៍ជាច្រើនដល់សិស្ស និស្សិត យុវជន រួមទាំងកុមារឱ្យមានទម្លាប់ក្នុងការអានសៀវភៅ។
ទាក់ទងនឹងការអានសៀវភៅនេះដែរ កញ្ញា ធុច សំអុល បណ្ណារក្ស បណ្ណាល័យ ម៉េងលី ជេ. គួច បានសូមណូមពរសិស្សានុសិស្សទាំងអស់ឱ្យខិតខំពង្រឹងនូវស្មារតីអានដោយយកចិត្តទុកដាក់ដោយព្យាយាម កុំពុះកញ្ជ្រោលតែមួយភ្លែតៗតាមគ្នា។ កាលណាមានទម្លាប់ហើយ ទោះនៅកន្លែងណា ក៏មិនអាចអត់សៀវភៅ។
កញ្ញាបញ្ជាក់ថា ការអានសៀវភៅបានច្រើននាំឱ្យមានចំណេះដឹងទូលំទូលាយ ដើម្បីជាស្ពានសម្រេចបាននូវភាពជោគជ័យក្នុងការសិក្សាសម្រាប់ខ្លួនឯង គ្រួសារ និងសង្គមជាតិ៕
.jpg)
