នាយករដ្ឋមន្ត្រីកម្ពុជា ឯកភាពជាមួយសមាជិកសភាអាមេរិកពង្រឹងទំនាក់ទំនងពិសេសលើវិស័យពាណិជ្ជកម្ម និងវិនិយោគ
Admin
ការឯកភាពនេះខណៈសម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យលោកស្រី អេលីហ្សាបេត វេន ដាញ (Elizabeth Van Duyne) តំណាងរាស្ត្រគណបក្សសាធារណរដ្ឋ មកពីរដ្ឋតិចសាស់ និងគណៈប្រតិភូសមាជិក សភាអាមេរិក និងមានតំណាងរាស្ត្រគណបក្សប្រជាធិបតេយ្យ មកពីរដ្ឋថេនណេសស៊ី ចូលជួបសម្តែងការគួរសម និងពិភាក្សាលើការងារមួយចំនួន ដើម្បីពង្រឹងពង្រីកទំនាក់ទំនង និងកិច្ចសហប្រតិបត្តិការរវាងកម្ពុជា និងសហរដ្ឋអាមេរិក។
ក្នុងជំនួបលោកស្រី អេលីហ្សាបេត បានសម្ដែងនូវការគោរពជូនចំពោះសម្ដេច ចំពោះការតស៊ូ និងប្រឹងប្រែងរបស់សម្ដេចនាំជូនប្រជាពលរដ្ឋកម្ពុជានូវសុខសន្តិភាព ស្ថេរភាព និងការអភិវឌ្ឍ។ លោកស្រី ក៏បានគោរពជម្រាបជូនសម្ដេចផងដែរថា ដំណើរទស្សនកិច្ចរបស់ លោកស្រី និងប្រតិភូនាពេលនេះ គឺដើម្បីពង្រឹងទំនាក់ទំនងរវាងប្រទេសទាំងពីរ ឱ្យកាន់តែខ្លាំងឡើងតាមរយៈសក្ដានុពលដែលកំពុងមាន និងតាមរយៈកិច្ច សហប្រតិបត្តិការលើវិស័យពាណិជ្ជកម្ម និងវិនិយោគ។
ជាការឆ្លើយតប សម្ដេច ហ៊ុន សែន បានជម្រាបជូនលោកស្រី អេលីហ្សាបេត ព្រមទាំងប្រតិភូទាំងមូល អំពីប្រវត្តិរបស់កម្ពុជា ក៏ដូចជាប្រវត្តិនៃទំនាក់ទំនង រវាងកម្ពុជាជាមួយ សហរដ្ឋអាមេរិក។ សម្ដេច ហ៊ុន សែន បានឯកភាពជាមួយលោកជំទាវ អេលីហ្សាបេត ដែលថា «យើងនាំគ្នាសម្លឹងទៅមុខ និងក្ដាប់ឱកាសដែលកំពុងមាននាពេលបច្ចុប្បន្ន ជាពិសេស លើវិស័យពាណិជ្ជកម្ម វិនិយោគ និងអប់រំ ធ្វើជាមូលដ្ឋាន ដើម្បីពង្រឹងទំនាក់ទំ នងរវាងប្រទេសទាំងពីរ ឱ្យកាន់តែខ្លាំងឡើង»៕ ដោយ៖ឡាងឡាង
.jpg)
