ត្រឹមថ្ងៃទី១៤ ខែកញ្ញានេះ ដំណាំស្រូវវស្សាក្នុងខេត្តបន្ទាយមានជ័យប៉ះពាល់ដោយទឹកជំនន់៨ ៥៧០ហិកតា
Admin
កាលពីថ្ងៃទី១៤ ខែកញ្ញា ឆ្នាំ២០២២ លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងសហការី បានធ្វើដំណើរទៅខេត្តបន្ទាយមានជ័យ ដើម្បីចុះពិនិត្យស្ថានភាពដាំដុះដំណាំស្រូវវស្សានៅភូមិស្រមោច ឃុំព្រះនេត្រព្រះ ស្រុកព្រះនេត្រព្រះ ជារួមនៅក្នុងឃុំនេះស្រូវមានសភាពលូតលាស់បានល្អប្រសើរជាងឆ្នាំកន្លងទៅ។
បន្ទាប់មកក្រុមការងារបានបន្តចុះពិនិត្យមើលស្ថានភាពខូចខាតដំណាំស្រូវដោយគ្រោះទឹកជំនន់នៅក្នុងភូមិក្រមុល ឃុំរហាត់ទឹក ស្រុកមង្គលបុរី ដែលបានបណ្តាលឱ្យប៉ះពាល់ដល់ដាំណាំស្រូវវស្សាប្រមាណជាង ៥ ០០០ហិកតា ខូចខាត ៣ ២២៥ហិកតា និងបានស្តារឡើងវិញបានប្រមាណ ២ ៣៨០ហិកតា។
លោកមេឃុំរហាត់ទឹក ស្រុកមង្គលបុរី ព្រមជាមួយប្រជាពលរដ្ឋបានឱ្យដឹងថា បញ្ហាប្រឈមជារួមនៃទឹកជំនន់ក្នុងឃុំរហាត់ទឹក ដោយសារការរំដោះទឹកមិនទាន់ ព្រោះទំនប់បញ្ចាល់ទឹកពោធិពីរដើមចាស់មិនអាចរំដោះទឹកបានគ្រប់ ហើយនៅពេលបច្ចុប្បន្ននេះគឺកំពុងរៀបចំស្តារឡើងវិញនៅទំនប់បញ្ចាល់ទឹកពោធិនេះ បានធ្វើឱ្យការរំដោះទឹកជំនន់មិនបានគ្រប់គ្រាន់និងទាន់ពេលវេលា ដែលបានបន្តធ្វើឱ្យទឹកចាល់ជន់លិចរយ:ពេលយូរក្នុងរដូវវស្សានេះ។
លោករដ្ឋមន្រ្តីបានណែនាំឱ្យនាយកដ្ឋានដំណាំស្រូវនៃអគ្គនាយកដ្ឋានកិសកម្ម សហការជាមួយមន្ទីរកសិកម្ម រុក្ខាប្រមាញ់ និងនេសាទ ព្រមជាមួយអាជ្ញាធរមូលដ្ឋានធ្វើការតាមដាន សិក្សា និងវាយតម្លៃលើផ្ទៃដីស្រែប៉ះពាល់ជាក់ស្តែង រួចដាក់សំណើសុំពូជស្រូវពីក្រសួងសេដ្ឋកិច្ច និងហិរញ្ញវត្ថុ ទៅតាមតម្រូវការជាក់ស្តែង។ ដោយឡែក ចំពោះដំណោះស្រាយរយ:ពេលវែង លោករដ្ឋមន្រ្តីបានណែនាំឱ្យលោកប្រធានមន្ទីរមន្ទីរកសិកម្ម រុក្ខាប្រមាញ់ និងនេសាទ ពិភាក្សាជាមួយមន្ទីរធនធានទឹកនិងឧតុនិយមខេត្តអំពីលទ្ធភាពសាងសង់ទំនប់បង្ហូររំដោះទឹក តាមសំណូមពររបស់ប្រជាពលរដ្ឋក្នុងឃុំរហាត់ទឹក៕
.jpg)
