ការអប់រំដើរតួនាទីយ៉ាងសំខាន់ក្នុងការបង្រៀនសិស្សានុសិស្សមិនត្រឹមតែចំណេះដឹងផ្នែកសិក្សាប៉ុណ្ណោះទេ ថែមទាំងបង្រៀនឲ្យមានអាកប្បកិរិយាប្រកបដោយក្រមសីលធម៌ទៀតផង។ ក្រមសីលធម៌​គឺ​និយាយអំពី​ការ​យល់​ដឹង​នូវ​អ្វី​ដែល​ត្រូវ និង​ខុស ហើយ​ធ្វើ​ការ​ជ្រើសរើសដ៏ល្អមួយ​។ សាលារៀនជួយសិស្សានុសិស្សឱ្យរៀនពីតម្លៃទាំងនេះតាមវិធីសំខាន់ៗមួយចំនួន។

ចំណុចទីមួយ សាលារៀនបង្រៀនសីលធម៌តាមរយៈមុខវិជ្ជាដូចជា ការសិក្សាពីសង្គម និងការពិភាក្សាក្នុងថ្នាក់រៀន។ មេរៀនទាំងនេះជួយសិស្សានុសិស្សឱ្យយល់អំពីភាពត្រឹមត្រូវ ភាពស្មោះត្រង់ និងការគោរព។ ដោយនិយាយអំពីស្ថានភាពជីវិតពិត សិស្សានុសិស្សរៀនពីរបៀបធ្វើការសម្រេចចិត្តល្អ និងគិតអំពីអារម្មណ៍របស់អ្នកដទៃផងដែរ។

ចំណុចទីពីរ គ្រូបង្រៀនគឺជាគំរូសម្រាប់ឥរិយាបថដែលមានសីលធម៌។ នៅពេលដែលគ្រូបង្រៀនមានភាពយុត្តិធម៌ សច្ចធម៌ និងសប្បុរសធម៌ សិស្សានិសិស្សនិងរៀនពីគំរូរបស់ពួកគេ។ កត្តា​នេះហើយដែលជួយ ឱ្យសិស្សានុសិស្ស មើលឃើញពីរបៀបដែលក្រមសីលធម៌ដំណើរការក្នុងជីវិតប្រចាំថ្ងៃ មិនត្រឹមតែនៅក្នុងមេរៀនប៉ុណ្ណោះទេ។

ជាងនេះទៅទៀត សកម្មភាពក្រៅថ្នាក់ ដូចជាក្រុមលេងកីឡា ឬសេវាសហគមន៍ ក៏បង្រៀនអំពីក្រមសីលធម៌ផងដែរ។ សកម្មភាពទាំងនេះបង្រៀនពីការងារជាក្រុម ទំនួលខុសត្រូវ និងរបៀបប្រព្រឹត្តចំពោះមនុស្សជុំវិញខ្លួនឱ្យបានល្អ។ ជាឧទាហរណ៍ ការធ្វើការរួមគ្នាលើគម្រោងអ្វីមួយ ឬការជួយអ្នកដទៃបង្ហាញសិស្សានុសិស្សអំពីសារៈសំខាន់នៃកិច្ចសហប្រតិបត្តិការ និងការយល់ចិត្ត។

សរុបមកការអប់រំមានសារៈសំខាន់ណាស់សម្រាប់បង្រៀនសិស្សានុសិស្សឱ្យចេះពីរបៀបមានក្រមសីលធម៌ល្អ។ តាមរយៈការរួមបញ្ចូលក្រមសីលធម៌នៅក្នុងមេរៀន ការបង្ហាញអាកប្បកិរិយាល្អតាមរយៈការរៀនពីលោកគ្រូអ្នកគ្រូ និងការផ្តល់សកម្មភាពដែលលើកកម្ពស់សប្បុរសធម៌ និងការទទួលខុសត្រូវ សាលារៀនជួយសិស្សឱ្យក្លាយជាសមាជិកនៃសង្គមដែលយកចិត្តទុកដាក់ និងគោរពគ្នាទៅវិញទៅមក។ វិធីនេះ ការអប់រំមិនត្រឹមតែជួយសិស្សានុសិស្សឱ្យជោគជ័យក្នុងការសិក្សាប៉ុណ្ណោះទេ ប៉ុន្តែថែមទាំងរៀបចំពួកគេឱ្យធ្វើការរួមចំណែកជាវិជ្ជមានដល់សហគមន៍របស់ពួកគេផងដែរ។

ដោយ: គង់ កញ្ញារតន៍ ប្រធានគ្រូនៃ មជ្ឍមណ្ឌល ភាសា អេ អាយ អាយ សាខា ច្បារអំពៅ