ជាមិត្តសំឡាញ់រៀនថ្នាក់ជាមួយគ្នា ស្អាតដូចគ្នា ហើយទទួលបាននិទ្ទេស A ដូចគ្នាទៀត
Admin
អ្នកទាំងបីគឺជាមិត្តភក្តិជិតស្និទ្ធដែលតែងដើរទៅណាមកណាជាមួយគ្នា។ តែអ្វីដែលគួរឱ្យកត់សម្គាល់នោះ យុវតីទាំងបីនាក់ មិនត្រឹមតែមានសម្រស់ស្អាតដូចគ្នានោះទេ ថែមទាំងជាសិស្សឆ្នើមទទួលបាននិទ្ទេសA ដូចគ្នា ក្នុងការប្រឡងសញ្ញាបត្រមធ្យមសិក្សាទុតិយភូមិនៅឆ្នាំ២០១៨ទៀតផង។ តែអ្វីដែលខុសគ្នានោះ យុវតី ជា ស្រីនា និងសេដ្ឋាវិន មានឈ្មោះជាប់និទ្ទេសA តាំងពីក្រសួងប្រកាសលទ្ធផលលើកដំបូង ខណៈយុវតី ប៉ែន លីសា បានត្រឹមនិទ្ទេស D ប៉ុណ្ណោះ។ ប៉ុន្តែក្រោយពីក្រសួងសើរើលទ្ធផល រកឃើញខុសបញ្ហាបច្ចេកទេសកុំព្យូទ័រ មិនបានស្រង់ពិន្ទុគណិតវិទ្យា ធ្វើឱ្យយុវតី ប៉ែន លីសា ទទួលបាននិទ្ទេស Aវិញ។
លទ្ធផលប្រកាសចុងក្រោយ ស្រីនា ទទួលនិទ្ទេសA លំដាប់ពិន្ទុ ៩៩.៩៥១ លីសា លំដាប់ពិន្ទុ ៩៩.៨៣៦ និង សេដ្ឋាវិន សិស្សនិទ្ទេសA លំដាប់ពិន្ទុ៩៩.៦៧៧។ លទ្ធផលរបស់ពួកគេ ក៏ធ្វើឱ្យមិត្តរួមថ្នាក់ ១២ ង ទាំងអស់អបអរសាទរផងដែរ។
យុវតី ស៊ីថុន សេដ្ឋាវិន បានប្រាប់ថា ពួកគេគឺជាមនុស្សដែលចូលចិត្តលេងសើចដូចគ្នា ហើយនាំគ្នាខំរៀននៅផ្ទះដូចគ្នា។
សេដ្ឋាវិន និយាយបន្តថា «នៅពេលដែលយើងដើរជាមួយគ្នា យើងចង់ឱ្យបាននិទ្ទេស A ដូចគ្នា ហើយនៅពេលដែលយើងបាន A ដូចគ្នាសប្បាយចិត្តមែនទែន ហើយថ្នាក់ខ្ញុំថ្នាក់ E គ្រូប្រាប់ថាតាំងពីកំណែទម្រង់មកមិនដែលមាន Aទេ។»
យុវតីដែលជាកូនស្រីពៅ ក្នុងគ្រួសារអ្នករាជការរូបនេះ បានបន្ថែមថា មួយចំណែកដែលធ្វើឱ្យនាងទទួលបាននិទ្ទេសAក្នុងសម័យប្រឡងដ៏តឹងរឹងនេះក៏មានការជួយពីស្រីនាផងដែរ។
សេដ្ឋាវិន ៖«និយាយទៅគាត់ពូកែតាំងពីតូចមក ខ្ញុំមានទំនុកចិត្តលើគាត់ គាត់ក៏ជាអ្នកMotivation ខ្ញុំមួយដែរ ដូចថាយើងរៀនមួយគ្នា ហើយពេលខ្ញុំធ្វើលំហាត់អីអត់ចេះមានគាត់មួយសួរ ជួយប្រាប់ នៅពេលដែលខ្ញុំអត់ចេះខ្ញុំរត់រកគាត់ហើយ ឱ្យគាត់ជួយពន្យល់»។
រីឯ យុវតី ជា ស្រីនា ដែលជាប្រធានថ្នាក់ ១២ ង បាននិយាយថា នាងរីករាយខ្លាំងមែន ដែលឆ្នាំនេះ ថ្នាក់ ១២ ង ជាប់និទ្ទេសនិទ្ទេស A រហូតដល់៣នាក់ ខណៈដែលថ្នាក់នេះ ក៏មិនមែនជាថ្នាក់លេចធ្លោ មានឈ្មោះល្បីនៅក្នុងសាលាឡើយ។ ហើយអ្វីដែលកាន់តែសប្បាយចិត្តនោះ គឺមិត្តសំឡាញ់របស់នាងបានជាប់និទ្ទេសAដូចគ្នា។
ស្រីនា និងលីសា ដោយស្គាល់ និងរៀនជាមួយគ្នាតាំងពីថ្នាក់ទី១មក ភាគច្រើនពួកគេតែងតែទៅរៀនគួរជាមួយគ្នា។ តែសេដ្ឋាវិនវិញ មិនបានរៀនគួរបន្ថែមជាមួយគ្នាទេ តែយ៉ាងណាពួកគេ តែងចែករំលែកចំណេះដឹងគ្នាទៅវិញទៅមកច្រើននៅក្នុងថ្នាក់៕
.jpg)
