គ្រួច ឈីម ទោះប្រឡូកការងារជួយសង្គមច្រើន តែការសិក្សាមិនធ្លាក់ចុះ
Admin
ស្ថិតក្នុងទឹកមុខរីករាយដែលបង្ហាញពីភាពរួសរាយរាក់ យុវសិស្ស គ្រួច ឈីម វ័យ១៦ឆ្នាំ ដែលបច្ចុប្បន្នកំពុងរៀននៅថ្នាក់ទី១១ ក្នុងសាលារៀន អន្តរទ្វីប អាមេរិកាំង បានរៀបរាប់ពីដំណើរសិក្សារបស់ខ្លួនថា ទីនេះគឺជាសាលារៀនទី២ហើយ ដែលខ្លួនបានឆ្លងកាត់ការសិក្សារ។ រយៈពេលសិក្សានៅទីនេះ គឺជារយៈពេលមួយពោរពេញដោយការអភិវឌ្ឍសមត្ថភាពសម្រាប់ជីវិត រួមទាំងការសិក្សា និងការងារសង្គម។
មានដើមកំណើតនៅក្នុងរាជធានីភ្នំពេញ គ្រួច ឈីម គឺជាកូនពៅក្នុងចំណោមបងប្អូន៤នាក់ ក្នុងគ្រួសារដែលមានជីវភាពធូរធារផងនោះ អ្វីដែលខ្លួនទទួលបានពីសាលាដ៏មានប្រជាប្រិយមួយនេះ គឺមានការខុសប្លែកគ្នាច្រើនពីសាលារៀនដែលខ្លួនធ្លាប់បានប្រឡូកមុនៗ។
សិស្សម្នាក់នេះ លើកឡើងដូច្នេះថា «ពីមុខខ្ញុំហាក់និយាយអ្វីមួយប្រៀបដូចជាអណ្ដើកនៅក្នុងអណ្ដូង ដែលអត់បានដឹងពីប្រភពខាងក្រៅថាវាមានទិដ្ឋភាពយ៉ាងម៉េចនោះទេ។ មកដល់ទីនេះខ្ញុំទទួលបានបទពិសោធជីវិតបានច្រើនណាស់។ ខ្ញុំមិនដែលឃើញសាលារៀនណាលើកទឹកចិត្តសិស្សធ្វើសកម្មភាពសប្បុរធម៌ និងការងារស្ម័គ្រចិត្តទេ គឺកម្រមានណាស់។ ទាំងនេះហើយ គឺជាប្រយោជន៍នៃសង្គមជាតិ។»
ឋិតក្នុងចំណោមសិស្សកូនអ្នកមានជីវភាពធូរធារ យុវសិស្ស ដដែលនេះ បាននិយាយមកកាន់អ្នកសារព័ត៌មានទៀតថា៖ «បើសាលាសម្លឹងឃើញសិស្សណាម្នាក់មានសមត្ថភាព។ សាលានឹងជំរុញអ្នកនោះឱ្យទៅធ្វើជំនាញនោះ។ បើសិស្សមានចំណង់ចំណូលចិត្តលើការងារស្ម័គ្រចិត្ត សាលាជំរុញឱ្យទៅធ្វើការងារស្ម័គ្រ។ បើសិស្សពូកែខាងកំណាព្យរុញទៅខាងការប្រឡងកំណាព្យ សិស្សពូកែគណិតរុញទៅខាងគណិត រហូតមានការប្រកួតទៅប្រឡងនៅក្រៅស្រុកទៀតផងក៏មាន គឺសាលាផ្ដល់ឱកាសឱ្យសិស្សជានិច្ច។»
នៅក្នុងចក្ខុវិស័យអប់រំរបស់សាលារៀននីមួយៗមិនត្រឹមតែកសាង និងបណ្តុះបណ្តាលធនធានមនុស្សឱ្យមានសមត្ថភាពតែមួយមុខប៉ុណ្ណោះទេ។ ម្យ៉ាងសាលារៀនក៏បានបណ្ដុះគ្រាប់ពូជវប្បធម៌ចែករំលែក និងសីលធម៌ វិន័យ ដល់ក្មេង និងគ្មានអំពើពុករលួយ។
យុវសិស្ស គ្រួច ឈីមបានលើកឡើងថា៖ «សាលាមានវ័យតឹងបែបនេះ ល្អសម្រាប់សិស្សានុសិស្សរាប់ចាប់តាំងពីក្មេងតូចឡើងទៅ ព្រោះកុមារប្រៀបដូចក្រដាសសមួយសន្លឹក បើបណ្ដោយ ឬចេះតែដាក់ថ្នាំពណ៌នេះពណ៌នោះ ក្មេងនឹងប្រឡាក់ដិតស្នាមដូចពណ៌ទាំងនោះដែរ។ មនុស្សសំខាន់លើវិន័យ បើគ្មានវិន័យគឺ……។ ម្យ៉ាងវិញទៀត ពេលប្រឡងមិនមែនចេះតែធ្វើឱ្យរួចផុតតែពីដៃនោះទេ។ ចំពោះសាលានេះ មានភាពតឹងរ៉ឹង ពេលសិស្សប្រឡង គឺចេញពីសមត្ថភាពពិត ចេះជាប់ បើមិនចេះគឺធ្លាក់ ហើយចំពោះពិន្ទុក៏ដូចគ្នាដែរ គឺមានភាពសុក្រិតបំផុតប៉ុនណាគឺប៉ុណ្ណឹង កុំមកតវ៉ា។ គ្មានអំពើក្រោមតុលើតុ សុក្រិតយុត្តិធម៌។»
ទាក់ទងនឹងការងារសង្គមវិញ គ្រួច ឈីម គឺជាសិស្សម្នាក់ដែលមានភាពលេចធ្លោរខ្លាំងខាងសកម្មភាពការងារស្ម័គ្រចិត្ត នៅក្នុងចំណោមសិស្សសាលារៀន អន្តរទ្វីប អាមេរិកាំង ដែលស្រឡាញ់ការងារជួយសង្គមផងដែរ។ យុវសិស្សមានស្រុកកំណើតណើតក្នុងក្រុងភ្នំពេញរូបនេះ បានធ្វើសកម្មភាពការងារស្ម័គ្រចិត្តច្រើនទៅលើវិស័យវប្បធម៌ខ្មែរ។
ពិតមែនតែខ្លួនស្រឡាញ់ចូលចិត្តខាងវិស័យវប្បធម៌ខ្មែរ តែយុវសិស្សរៀននៅសាលាល្បីខាងវិន័យតឹងម្នាក់នេះ មិនបានប្រាថ្នាចាប់យកជំនាញនេះឡើយ។ អ្វីដែលខ្លួនសម្លឹងឃើញនោះ គឺជំនាញអាកាសចរណ៍ទៅវិញទេ។ ចំណែកការងារស្ម័គ្រចិត្តនេះ គឺដោយសារតែមានចិត្ដស្រឡាញ់ និងអាណិតដល់វប្បធម៌ខ្មែរ ដែលយុវជនមួយចំនួនមិនសូវឱ្យតម្លៃ និងមើលរំលងវប្បធម៌របស់ខ្លួន។
យ៉ាងណាក៏ដោយ នេះមិនមែនជារឿងងាយទេ សម្រាប់សិស្សដែលបានបែងចែកពេលវេលារៀនផង និងធ្វើការងារស្ម័គ្រទាំងខ្លួននៅក្មេងខ្ចីផងនោះ។ តែសម្រាប់ គ្រួច ឈីម ការងារស្ម័គ្រចិត្ត គឺជាការងារដែលធ្វើចេញពីចិត្តដោយគ្មានការបង្ខិតបង្ខំ ហើយអត់ទទួលបានកម្រៃអ្វីទាំងអស់។ ការងារនេះ គឺជាទង្វើសប្បុរធម៌ដែលសង្គមត្រូវការ និងឱ្យតម្លៃបំផុត ហើយអ្វីទាំងនេះសាលាបានជំរុញលើកទឹកចិត្តយ៉ាងពេញដៃពេញជើង ដែលនេះគឺជាឱកាសអាចធ្វើឱ្យខ្លួនមានការអភិវឌ្ឍច្រើន គឺទាំងការងារស្ម័គ្រចិត្ត ដូចជាការសិក្សាជាដើម៕
.jpg)
