គន្លឹះ៨យ៉ាងដើម្បីក្លាយជាសិស្សធ្វើបទបង្ហាញដ៏ល្អមួយរូបពីមជ្ឈមណ្ឌលភាសា អេ អាយ អាយ
Admin
មជ្ឈមណ្ឌលភាសា អេ អាយ អាយ តែងផ្តោតយកចិត្តទុកដាក់ខ្ពស់ក្នុងការជំរុញសិស្សចេះរៀបចំខ្លួន ដើម្បីធ្វើបទបង្ហាញឱ្យមានប្រសិទ្ធភាព និងសមត្ថភាព ជាពិសេសដើម្បីភាពក្លាហាន ម្ចាស់ការ និងគ្មានភាពភ័យខ្លាចក្នុងការនិយាយលើវេទិកានានា នៅខណៈពេលដែលសិស្សខ្លះស្អប់ការធ្វើបទបង្ហាញ ព្រោះតែគ្មានភាពជឿជាក់លើខ្លួនឯង ភ័យខ្លាចមានកំហុសនៅចំពោះមុខមហាជន។
នៅក្នុងសិក្ខាសាលាស្ដីពីជំនាញធ្វើបទបង្ហាញដស់សិស្សកម្រិត AEP1 ដែលរៀបចំដោយមជ្ឈមណ្ឌលភាសា អេ អាយ អាយ កាលពីកន្លងទៅ លោក ចាន់ ធា ប្រធានគ្រូភាសាបរទេសនៅមជ្ឈមណ្ឌលអប់រំនេះ បានផ្គល់គន្លឹះសំខាន់ៗចំនួន៨យ៉ាងដើម្បីក្លាយជាសិស្សធ្វើបទបង្ហាញដ៏ល្អមួយរូប។ គន្លឺះទាំង៨នោះរួមមាន៖
១. ស្រាវជ្រាវលើប្រធានបទ៖ ការស្រាវជ្រាវ គឺជាចំណុចមួយដ៏សំខាន់ ហើយរាល់ការនិយាយត្រូវមានឯកសារយោង។
២. ការធ្វើស្លាយ៖ ការរៀបចំស្លាយតម្រូវឱ្យយើងចេះយ៉ាងហោចណាស់ក៏កម្មវិធី PowerPoint ដែរ ហើយត្រូវច្បិចយកចំណុចសំខាន់ៗមករំលេចក្នុងស្លាយ។
៣. ប្រើរូបភាពឱ្យត្រូវនឹងប្រធានបទ៖ ចំណុចនេះក៏សំខាន់ ព្រោះវាជាចំណុចទាក់ទាញមួយដែរ។
៤. ការរៀបចំខ្លួន៖ ការរៀបចំខ្លួន ក៏ជាចំណុចសំខាន់ដែលយើងមិនគួរមើលរំលងដែរ។ ជាពិសេសការស្លៀកពាក់ឱ្យបានសមសួន។ អ្នកមានធ្លាប់ឮ សម្លៀកបំពាក់កំណត់ពីភាពជោគជ័យរបស់អ្នកពីវេជ្ជបណ្ឌិក គួច ម៉េងលី ទេ។ ដូច្នេះសម្លៀកបំពាក់ក៏ជាចំណែកមួយធ្វើឱ្យយើងជោគជ័យដែរ។
៥. គ្រប់គ្រងពេលវេលា៖ ត្រូវចេះគ្រប់គ្រងវេលាឱ្យបានច្បាស់លាស់ក្នុងកំលុងពេលធ្វើបទបង្ហាញ។
៦. និយាយចំគន្លឹះច្បាស់ៗ៖ ភាសា និងសំឡេងត្រូវប្រាកដនៅក្នុងចិត្តថា មានភាពច្បាស់សមល្មមអាចទទួលយកបាន ឬធ្វើឱ្យគេអាចទទួល និងជ្រាបច្បាស់ពីអ្វីដែលយើងនិយាយ។ មានន័យថា អ្នកដែលធ្វើបទបង្ហាញបានល្អពោរពេញដោយភាពទាក់ទាញ គឺស៊ីជម្រៅលើប្រធានបទហើយនៅពេលធ្វើបទបង្ហាញត្រូវចេះប្រើសម្តីទន់ភ្លន់ តែនិយាយលះច្បាស់លាស់ល្អ។
៧. ទាញចំណាប់អារម្មណ៍៖ វាគ្មិនធ្វើបទបង្ហាញល្អ គឺជាអ្នកចេះប្រើវិធីសាស្រ្តក្នុងការនិយាយទាក់ទាញចំណាប់អារម្មណ៍អ្នកស្តាប់ និងធ្វើឱ្យអ្នកស្តាប់បានយល់ច្បាស់ពីគោលបំណងដែលវាគ្មិនលើកឡើងមកបង្ហាញនោះ។
៨. ក្លាហាន៖ យុទ្ធសាស្រ្តធ្វើបទបង្ហាញត្រូវពឹងផ្អែកលើភាពក្លាហានក្នុងការនិយាយពន្យល់ពីអត្ថន័យទៅកាន់មនុស្សកំពុងស្ដាប់ដោយភាពជឿជាក់ផងដែរ។ ទាំងអស់នេះ គឺសុទ្ធសឹងជាទំនុកចិត្តនិងគន្លឹះក្នុងការធ្វើបទបង្ហាញដែលមិនអាចខ្វះបានឡើយ៕
.jpg)
