ក្រៅពីត្រៀមខ្លួនប្រឡងបាក់ឌុប សិស្ស AIS ក៏បានរៀបចំគម្រោងសម្រាប់អនាគត
Admin
កំលុងពេលនេះ សិស្សានុសិស្សថ្នាក់ទី១២គ្រប់រូបបានខិតខំរៀនសូត្រ ហើយខ្លះទៀតបានឆ្លៀតរៀបចំគម្រោង ដើម្បីអនាគជីវិតបណ្ដើរៗហើយដែរ។ ស្ថិតក្នុងចំណោមសិស្សានុសិស្សថ្នាក់ទី១២ នៃសាលារៀន អន្តរទ្វីប អមេរិកាំង ក្រៅពីត្រៀមខ្លួនក្នុងការប្រឡង យុវតី ឡ ម៉ី មានវ័យ១៩ឆ្នាំ ក៏បានរៀបចំគម្រោងទំព័រសិក្សាច្បាស់លាស់ថ្មីមួយ គឺបន្តសិក្សានៅស្រុកក្រៅ ដោយចាប់ជំនាញសណ្ឋាគារ និងបដិសណ្ឋាកិច្ច។
សម្រាប់យុវតីវ័យ១៩ឆ្នាំរូបនេះ យល់ថា ការចាប់ជំនាញនេះ ព្រោះខ្លួនស្រឡាញ់ចូលចិត្ត ហើយជាជំនាញមួយដែលទីផ្សារការងារក្នុងសង្គមខ្មែរកំពុងត្រូវការ។ មិនតែប៉ុណ្ណោះ ជំនាញនេះក៏ជាផ្នែកមួយជួយសម្រួលឱ្យប្រជាជនតាមមូលដ្ឋានមានការងារធ្វើ ដើម្បីកាត់បន្ថយចំណាក់ស្រុកចេញទៅធ្វើការនៅក្រៅស្រុកផងដែរ។
យុវតី ឡ ម៉ី បាននិយាយមកកាន់អ្នកសារព័ត៌មានដោយរួសររាយថា «នាងខ្ញុំស្រឡាញ់ជំនាញបដិសណ្ឋាកិច្ច ដោយសារតែខ្ញុំពេញចិត្តទំនាក់ទំនងពីបុគ្គលម្នាក់ទៅបុគ្គលម្នាក់ ចូលចិត្តធ្វើការជាក្រុម ចូលចិត្តធ្វើការបម្រើអតិថិជន…។ ចំពោះជំនាញរបស់យើងមិនអាចចេះតែទៅស្ដាប់ តាមការអូសទាញទេ។»
បន្ថែមលើសពីនេះ សិស្សានុសិស្សដែលត្រៀមប្រឡងបញ្ចប់ការសិក្សាថ្នាក់មធ្យមសិក្សាទុតិយភូមិ និងបន្តសិក្សានៅថ្នាក់ឧត្តមសិក្សា។ ក្នុងជាអ្នកសិក្សាត្រូវច្បាស់ខ្លួនឯង ថាតើខ្លួនឯងមានចំណង់ចំណូលចិត្ត និងស្រឡាញ់ជំនាញផ្នែកអ្វី? ហើយហេតុអ្វីទើបបានជាជ្រើសរើសយកជំនាញមួយហ្នឹង? តើវាបានផ្ដល់គុណសម្បត្តិអ្វីដល់គ្រួសាររបស់យើង?
ស្រដៀងគ្នានេះដែរ យុវសិស្ស ស៊ាង ម៉េងហុង ក៏មានគម្រោងសម្រាប់ជីវិតដែរ។ សិស្សថ្នាក់ទី១២ម្នាក់នេះ ថែមទាំងជឿជាក់លើសមត្ថភាពខ្លួនថា នឹងប្រឡងជាប់ ព្រោះអ្វីៗសុទ្ធតែកើតឡើងដោយក្ដីសង្ឃឹម ហើយក្រោយជាប់បាក់ឌុបនឹងបន្តសិក្សានៅសាកលវិទ្យាល័យភូមិន្ទភ្នំពេញ ផ្នែកគ្រប់គ្រងពាណិជ្ជកម្មអន្តរជាតិ។
ដើម្បីកុំឱ្យខាតពេល បង់ប្រយោជន៍ និងខូចអនាគត យុវសិស្ស ស៊ាង ម៉េងហុង បានលើកឡើងថា «សម្រាប់ខ្ញុំ ខ្ញុំចង់ធ្វើការងារអ្វីដែលខ្ញុំចូលចិត្ត ព្រោះខ្ញុំរីករាយជាមួយនឹងការងារហ្នឹង។ ទោះបីការងារហ្នឹងមិនសូវទទួលបានប្រាក់កម្រៃច្រើនយ៉ាងណាក៏ដោយ តែបើយើងរីករាយជាមួយនឹងការងារដែលយើងស្រឡាញ់ ពេលយើងធ្វើទៅយើងមានសេចក្ដីសុខ។»
ក្នុងនាមជាសិស្សដែលមានបំណងបន្តសិក្សាថ្នាក់ឧត្តមសិក្សាគួររើសជំនាញសិក្សាតាមចំណូលចិត្តពីធម្មជាតិ និងទេពកោសល្យរបស់ខ្លួនទៅលើការងារ ឬមុខរបរប្រភេទណាដែលខ្លួនប្រាថ្នា ឬអាចនិយាយមួយបែបទៀតថា ការងារប្រភេទណាដែលមានឥទ្ធិពលនៅលើទីផ្សារ រួមទាំងមានឱកាសក្លាយជាអ្នកជំនួញ នាពេលអនាគត។
ដូច្នេះដើម្បីទទួលបានអ្វីដែលខ្លួនប្រាថ្នានេះ យុវសិស្ស ស៊ាង ម៉េងហុង បញ្ជាក់ថា ដំបូងត្រូវប្រឡងបាក់ឌុបឱ្យជាប់ជាមុនសិន គឺប្រឹងរៀន។ សម្រាប់សិស្សឆ្លាតគឺគេបានចាប់ផ្ដើមសិក្សាតាំងពីដើមឆ្នាំទៅ ហើយត្រូវយកឱ្យបាននិទ្ទេសល្អ ទើបអាចស្វែងរកអាហារូបករណ៍រៀនដោយមិនអស់ប្រាក់។
ទាក់ទងនឹងការរើសជំនាញសិក្សានេះដែរ លោកឧកញ៉ា វេជ្ជបណ្ឌិត គួច ម៉េងលី ស្ថាបនិក និងប្រធានសាលារៀន អន្តរទ្វីប អាមេរិកាំង បានបង្កើតឱ្យមានកម្មវិធីទម្រង់ទិសការសិក្សាឡើង ដើម្បីសម្រួចគោលដៅសិស្សឱ្យចំនូវអ្វីដែលសិស្សចង់បាននៅក្នុងជីវិត។
លោកធ្លាប់លើកឡើងថា ក្នុងបរិបទទីផ្សារការងារ ឬជំនួញក្នុងសង្គមខ្មែរបច្ចុប្បន្ន គឺទាមទារណាស់នូវចំណេះ ជំនាញ និងពិសោធន៍ខ្ពស់។ ដូច្នេះសិស្សនុសិស្សទាំងអស់គួររៀនបន្តនៅថ្នាក់មហាវិទ្យាល័យ ដោយរើសជំនាញតាមចំណង់ចំណូលចិត្ត តាមភាពប៉ិនប្រសប់ និងគ្រឹះសមស្របនឹងសមត្ថភាពខ្លួន គឺជាជម្រើសដ៏ល្អបំផុតហើយ៕
.jpg)
