កុមារីវ័យក្មេង AIS ឈ្នះមេដាយមាសលំដាប់ថ្នាក់ពិភពលោក
Admin
ការប្រកួតគណិតវិទ្យា លំដាប់ថ្នាក់ពិភពលោក ដែលហៅកាត់ថា WMI នេះ គឺឡើងជារៀងរាល់ឆ្នាំ នៅក្នុងបណ្ដាប្រទេសនានានៅលើពិភពលោកទូទាំងទ្វីបអាស៊ី ដើម្បីលើកទឹកចិត្ត ជំរុញ ពង្រឹងសមត្ថភាព និងបង្កើនសក្តានុពលអ្នកគណិតវិទ្យាវ័យក្មេង។ នេះបើតាមគណៈកម្មការរៀបចំកម្មវិធីប្រកួត។
បើតាម កញ្ញា ឥន សូហ្វីយ៉ា ចាងហ្វាងរងក្រោមមត្តេយ្យ មត្តេយ្យ និងបឋមសិក្សា បានឱ្យដឹងថា គណៈគ្រប់គ្រងសាលា ក៏ដូចលោកគ្រូ អ្នកគ្រូ ពិតជាមានមោទកភាពជាខ្លាំង ដែលកុមារី សិរីកា ដណ្តើមបានមេដាយមាសពីការប្រកួតគណិតវិទ្យា លំដាប់ថ្នាក់ពិភពលោក។
កញ្ញាបន្តថា មេដាយមាសនេះ មិនត្រឹមតំណាងឱ្យ សាលារៀន អន្តរទ្វីប អាមេរិកាំង ប៉ុណ្ណោះទេ តែតំណាងឱ្យប្រទេសកម្ពុជាទាំងមូលផងដែរ។
ចាងហ្វាងរូបនេះបន្ថែមថា «សូមកោតសរសើរចំពោះកុមារី សម្បត្តិ សិរីកា ព្រោះជាសិស្សមនាក់ពូកែ ឆ្លាត ហើយខិតខំរៀនសូត្រ រហូតទទួលបានមេដាយមាស។ សិរីកា បានចូលរៀន នៅសាលារៀន អន្តរទ្វីប អាមេរិកាំង តាំងពីថ្នាក់ទី១ រហូតសព្វថ្ងៃនេះ»។
គួររម្លឹកថា សម្បត្តិ សិរីកា ធ្លាប់ទទួលបានមេដាយលំដាប់ថ្នាក់ជាតិ និងអន្តរជាតិជាច្រើន ជាពិសេស ការប្រកួតគណិតវិទ្យាអូឡាំពិក នៅប្រទេសសិង្ហបុរី ដែលគេហៅកាត់ថា (SASMO)និងមេដាយសំរឹទ្ធ ក្នុងការប្រកួតគណិតវិទ្យាអូឡាំពិកអន្តរជាតិ នៅប្រទេសថៃ កាលពីឆ្នាំ២០១៨ និងពានរង្វាន់ផ្សេងៗជាច្រើនទៀត៕
.jpg)
