ឧកញ៉ា គួច ម៉េងលី៖ សូមឱ្យទិវាអន្តរជាតិនារី មិនមែនមានតែលើប្រតិទិន
Admin
លោកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន បានមានប្រសាសន៍ថា ស្រ្តីនិងបុរស គឺជាតំណាងស្មើភាពគ្នាទៅវិញទៅមក ហើយមានតួនាទីស្មើៗគ្នានៅស្ទើរគ្រប់ទិដ្ឋភាពទាំងអស់នៃជីវិត។
អ្វីដែលពិសេសនោះ អ្នកជំនាញវិស័យអប់រំរូបនេះបន្ថែមថា ស្ត្រីមានតួនាទីផ្តល់កំណើតដល់យើងគ្រប់ៗគ្នានៅលើភពផែនដី។ លោកថា ទោះបីជាស្រ្តីមានតួនាទីសំខាន់យ៉ាងនេះក្តី យើងនៅតែមើលឃើញពីវិសមភាពរវាងបុរសនិងស្រ្តីដដែល ហើយស្ត្រីតែងតែទទួលបានការគោរព តួនាទី និងបៀវត្ស ទាបជាងអ្វីដែលបុរសទទួលបាន។ បុរសមានកំណើតពីស្ត្រី ហើយជីវិតនឹងកាន់តែមានន័យ បើបុរសនិងស្ត្រីចេះរួមរស់នៅជាមួយគ្នាដោយស្មើភាព និងសន្តិវិធី។
លោកឧកញ៉ា វេជ្ជបណ្ឌិត គួច ម៉េងលី អះអាងថា បុរស និងស្ត្រី បើខ្វះនរណាម្នាក់នោះជីវិតនឹងគ្មានន័យ ហើយគ្មានភាពកក់ក្តៅ និងអាចប្រឈមបញ្ហាជីវភាពមិនខាន ប៉ុន្តែបើនៅជុំគ្នា នោះជីវិតនឹងពេញលក្ខណៈ និងប្រកបដោយសេចក្តីសុខសុភមង្គល។ បើបុរសជាស្តេច ច្បាស់ណាស់ស្រ្តីគឺជាមាតា ជាអ្នកចិញ្ចឹមបីបាច់ថែរក្សា និងជាអ្នកទំនុកបម្រុងស្តេចមិនអាចប្រកែកបានឡើយ។
វាគ្មិនឆ្នើម គួច ម៉េងលី បានអំពាវនាវដល់យុវជនដូច្នេះថា ចូរយើងទាំងអស់គ្នាចូលរួមគោរព លើកតម្កើង និងឱ្យតម្លៃម្ចាស់ក្សត្រិយ៍របស់យើងគ្រប់ពេលវេលា ដរាបណាព្រះអាទិត្យនៅតែរះ។ ការលើកតម្កើងតម្លៃស្រ្តី មិនចាំបាច់ត្រូវតែរង់ចាំឱ្យដល់ទិវាអន្តរជាតិនារីនោះទេ។
សូមជម្រាបថា សម្រាប់ខួបលើកទី១១០ នៃទិវាអន្តរជាតិនារី ថ្ងៃទី៨មីនា ឆ្នាំ២០២១ នេះក្រសួងកិច្ចការនារី បានសម្រេចជ្រើសប្រធានបទ «ស្ត្រី និងការអភិវឌ្ឍក្នុងបរិការណ៍កូវីដ-១៩ ដើម្បីបន្តរំលេចពីតម្លៃនៃយេនឌ័រ៕
.jpg)
