អ្នកឧកញ៉ា គួច ម៉េងលី បង្ហាញពីជោគជ័យក្នុងដំណើរទស្សនកិច្ចទៅអឺរ៉ុប
Admin
អ្នកឧកញ៉ា វេជ្ជបណ្ឌិត គួច ម៉េងលី ស្ថានិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន បានប្រាប់MJQTV បន្ទាប់ពីត្រឡប់ពីដំណើរទស្សនកិច្ចនោះថា លោកបានជួបមុនគេគឺខាងក្រសួងអន្តរសាសនានៃបុរីវ៉ាទីកង់ ក្រោយមកក៏បានចូលគាល់សម្ដេចប៉ាប ហ្វ្រង់ស៊ីស ដោយក្នុងនោះមានការទទួលរាក់ទាក់ដោយភាពស្និទស្នាល ព្រមទាំងបានផ្លាស់ប្តូរបទពិសោធន៍គ្នាទៅវិញទៅមក ដែលក្នុងនោះមន្ត្រីក្រសួងអន្តរសាសនានៃបុរីវ៉ាទីកង់ និងសម្ដេចប៉ាប បានលើកឡើងអំពីសេរីភាពនៃជំនឿនិងដូចគ្នាផងដែរ។ ជាមួយគ្នានេះអ្នកឧកញ៉ាបានលើកពីសន្តិភាពដែលកម្ពុជាកំពុងមាន ហើយក្នុងនោះក៏មានច្បាប់ស្តីពីការការពារព្រៃឈើ ។
លោកបន្តថា បន្ទាប់ពីបញ្ចប់ជំនួបជាមួយសម្ដេចប៉ាប លោកក៏បានបន្ដដំណើរទៅកាន់ព្រំដែននៃប្រទេសម៉ូណាកូ និងប្រទេសអ៊ីតាលីដោយបានជួបជាមួយថ្នាក់ដឹកនាំរបស់អង្គការមនុស្សធម៌មួយឈ្មោះការីតាសដែលជាអង្គការទទួលជនភៀសខ្លួនឆ្លងចូលប្រទេសអ៊ីតាលីដោយខុសច្បាប់ហើយមានការខ្វះខាត ដោយក្នុងនោះលោកបានឡើងថ្លែសន្ទរកថាស្តីពីបទពិសោធរបស់លោកនៅជំរំជនភៀសខ្លួនក្នុងនាមជនភៀសខ្លួនមួយរូបថាតើមានការលំបាកយ៉ាងណា និងបានបរិច្ចាគប្រាក់៥០០០អឺរ៉ូដែលធ្វើឱ្យគេមានមោទនភាពដែលអ្នកឧកញ៉ាធ្លាប់ជាជនភៀសខ្លួនក្រីក្រតែពេលនេះបានបរិច្ចាគដល់ជនជនជាតិគេនៅប្រទេសអភិវឌ្ឍន៍បាន។ លោកឱ្យដឹងថា ក្នុងជំនួបជាមួយមន្ត្រីអង្គការការីតាសនេះ គឺមានស្ថាប័នព័ត៌មានជាច្រើនបានមកយកព័ត៌មាននិងផ្សព្វផ្សាយ។ ក្រោយពីនេះលោកបន្តដំណើរទៅកាន់ប្រទេសម៉ូណាកូ និងបានជួបជាមួយប្រធានសភាគឺ លោកជំទាវ BrigititeBoccone ដែលក្នុងនោះលោកជំទាវ BrigititeBoccone បានរៀបរាប់ពីស្ថានភាពប្រជាពលរដ្ឋខ្មែរដែលរស់នៅក្នុងប្រទេសម៉ូណាកូ ហើយក៏បានផ្ដល់ឱកាសឱ្យអ្នកឧកញ៉ាថ្លែងសុន្ទរកថាផងដែរ។
បន្ទាប់ពីនោះ គឺអ្នកឧកញ៉ាគួច ម៉េងលី បានបន្ដដំណើរទៅទីក្រុងប៉ារីស ប្រទេសបារាំងដើម្បីចូលរួមសន្និសីទស្តីពីសាសនា បរិស្ថានមួយដែលមានប្រជាពលរដ្ឋខ្មែរចូលរួមរាប់រយនាក់ ក្នុងនោះអ្នកឧកញ៉ាក៏បានលើអំពីបច្ចុប្បន្នភាព សន្ដិភាព និងការអភិវឌ្ឍរបស់ប្រទេសកម្ពុជាផងដែរ ដែលធ្វើឱ្យមានកោតសរសើរ ពោលគឺខុសពីអ្វីដែលគេបានគិត។ អ្នកឧកញ៉ាបន្ថែមថា ដោយសារតែអ្នកឧកញ៉ាទៅចូលរួមក្នុងទស្សកិច្ចនេះក្នុងនាមប្រជាពលរដ្ឋខ្មែរ លោកក៏បានស្លៀកសម្លៀកបំពាក់បែបខ្មែរ ដើម្បីឱ្យគេស្គាល់អ្វីជាអត្តសញ្ញាណជាតិខ្មែរផងដែរ។
អ្នកឧកញ៉ា បានបង្ហាញអារម្មណ៍ថា មុនដំបូងកម្ពុជាត្រូវបានគេគិតថា ជាប្រទេសដែលមានសង្គ្រាមច្រើន មានទំនាស់ មិនមានសន្តិភាព ប៉ុន្តែនៅពេលដែលលោកបានបង្ហាញអ្វីដែលជាការពិតនៅកម្ពុជាបានធ្វើឱ្យជនបរទេស ជាពិសេសក្នុងប្រទេសដែលលោកបានទៅធ្វើទស្សនកិច្ច គឺធ្វើឱ្យគេភ្ញាក់ផ្អើលស្ទើរមិនគួរឱ្យជឿ និងចង់មកធ្វើទស្សនកិច្ចនៅកម្ពុជា។យ៉ាងនេះក្ដីអ្នកឧកញ៉ាក៏បានលើកផងដែរថា បើទោះជាកម្ពុជាមានការអភិវឌ្ឍជាបន្តបន្ទាប់ក្តី ប៉ុន្តែប្រជាពលរដ្ឋខ្មែរប្រមាន៧០%រស់នៅជាមួយបរិស្ថាន ធម្មជាតិ អាស្រ័យផលពីធម្មជាតិ៕
.jpg)
