លោកឧកញ៉ា គួច ម៉េងលី៖ ដើម្បីជោគជ័យត្រូវចេះលើកទឹកចិត្ត និងឱ្យរង្វាន់លេខ១ដល់ខ្លួនឯងជានិច្ច
Admin
ឆ្លើយតបទៅនឹងការលើកឡើងរបស់សិស្សនិស្សិត ស្តីពីការលើកទឹកចិត្តខ្លួនឯង កាលពីពេលថ្មីៗនេះ លោកឧកញ៉ា វេជ្ជបណ្ឌិតគួច ម៉េងលី ស្ថាបនិក ប្រធានក្រុមប្រឹក្សាភិបាល និងជាអគ្គនាយកប្រតិបត្តិ នៃ ក្រុមហ៊ុន ម៉េងលី ជេ. គួច អេឌ្យូខេសិន បានមានប្រសាសន៍ថា ការបរាជ័យរបស់បុគ្គលមួយចំនួន ភាគច្រើនកើតឡើងដោយសារពួកគេមិនចេះឱ្យតម្លៃខ្លួនឯង មិនចេះលើកទឹកចិត្តខ្លួនឯង ពិសេសគឺពួកគេមិនចេះឱ្យរង្វាន់លេខ១ដល់ខ្លួនឯង។
លោកឧកញ៉ា បន្តថា ការណ៍ដែលមិនចេះផ្ដល់តម្លៃ ឬលើកទឹកចិត្ត និងឱ្យលេខ១ដល់ខ្លួនឯងនេះហើយ នឹងធ្វើឱ្យជីវិតយើងពោរពេញទៅដោយភាពអស់សង្ឃឹម សោះកក្រោះ គ្មានន័យ ពេញណែនដោយទុក្ខកង្វល់ និងគ្មានកម្លាំងចិត្តក្នុងការបន្តដំណើរជីវិតទៅមុខ។ យើងត្រូវដឹងថា បើសិនជាយើងមិនចេះឱ្យរង្វាន់ខ្លួនឯង មិនចេះលើកទឹកចិត្តខ្លួនឯង មិនចេះត្រេកត្រអាលនឹងសមិទ្ធផលរបស់ខ្លួនឯង តើមាននរណានឹងមកលើកទឹកចិត្ត និងផ្ដល់តម្លៃឱ្យយើង? តើមាននរណាមកឱ្យយើងលេខ១? គឺគ្មាននោះទេ! ដូច្នេះមានតែយើងខ្លួនឯងម្នាក់គត់ដែលត្រូវតែលើកទឹកចិត្ត និងឱ្យលេខ១ដល់ខ្លួនឯង ព្រោះការលើកទឹកចិត្ត និងការដាក់ពិន្ទុឱ្យខ្លួនឯងលេខ១ជានិច្ច ពិតជាមានប្រសិទ្ធភាព និងសក្តានុពលខ្លាំងណាស់ ក្នុងការធ្វើឱ្យយើងមានថាមវន្តដ៏មហិមា ក្នុងការសម្រេចចិត្តធ្វើកិច្ចការអ្វីមួយ។
លោកឧកញ៉ា បញ្ជាក់ថា ទន្ទឹមនឹងការឱ្យតម្លៃ និងឱ្យរង្វាន់លេខ១ដល់ខ្លួនឯង យើងក៏មិនគួរមានអំនួតហួសហេតុ ឬលើកតម្លៃខ្លួនឯងកប់ពពកទាំងងងឹតងងុល រហូតដល់ថ្នាក់គិតថាខ្លួនឯងធ្វើអ្វីក៏ត្រូវ ខ្លួនឯងជាអាទិទេព ខ្លួនឯងមហាអស្ចារ្យ ធ្វើអ្វីក៏ល្អឥតខ្ចោះនោះដែរ ព្រោះបើយើងជាមនុស្សស្ថិតក្នុងជំពូកនេះ យើងច្បាស់ជាបរាជ័យមិនខានឡើយ។ ព្រោះបើយើងមានមោទនភាពលើខ្លួនឯងជ្រុល ដោយគិតថាខ្លួនឯងល្អឥតខ្ចោះគ្រប់យ៉ាង នោះយើងប្រាកដជាមិនអាចកែប្រែចំណុចខ្សោយ ឬចំណុចខ្វះខាតខ្លួនឯងបាន៕
.jpg)
