ព្រះគ្រូរតនមុនីឧត្តម សាម សំបូរ៖ ក្នុងបរិបទកូវីដ-១៩ ពុទ្ធបរិស័ទគួររក្សាផ្លូវខាងក្រៅ និងខាងក្នុងឱ្យបានល្អ
Admin
ចាប់តាំងពីផ្ទុះឡើងនូវជំងឺកូវីដ-១៩ ប្រជាជនកម្ពុជា ក៏ដូចប្រជាជននៅលើពិភពលោក ភាគច្រើនបានជួបនូវវិបត្តិ និងឧបសគ្គផ្សេងៗនៅក្នុងជីវភាពរស់នៅប្រចាំថ្ងៃ។ រាល់ជួបនូវវិបត្តិ និងឧបសគ្គនៅក្នុងជីវភាពរស់នៅប្រចាំថ្ងៃ បានធ្វើឱ្យមនុស្សខ្លះមានបញ្ហាផ្លូវចិត្ត ហើយខ្លះទៀតកើតស្ត្រេសរហូតឈានធ្វើអត្តឃាតខ្លួនទៀតក៏មាន។
ពាក់ព័ន្ធនឹងបញ្ហាផ្លូវចិត្ត និងកើតឡើងនូវជំងឺស្ត្រេសនៅក្នុងកំលុងផ្ទុះឡើងកូវីដ-១៩ នៅទូទាំងប្រទេសបែបនេះ បើតាមព្រះគ្រូរតនមុនីឧត្តម សាម សំបូរ ជំនួយការផ្ទាល់សម្តេចព្រះមហាសុមេធាធិបតីកិត្តិឧទ្ទេសបណ្ឌិត នន្ទ ង៉ែត សម្តេចព្រះសង្ឃនាយកនៃព្រះរាជាណាចក្រកម្ពុជា បានមានសង្ឃដីកាប្រាប់ដល់សារព័ត៌មាន The Intercon Rooster ដូច្នេះថា «ជំងឺកូវីដ-១៩ កំពុងរីករាលដាលបែបនេះ ពុទ្ធបរិស័ទគួរតែបង្កើនស្មារតីឱ្យរឹងមាំកុំភ័យស្លន់ស្លោរហូតបាត់ម្ចាស់ការលើខ្លួនឯង គឺមិនប្រសើរឡើយ។
ព្រះគ្រូរតនមុនីឧត្តម សាម សំបូរ សង្ឃដីកាបន្តថា ក្នុងបរិបទកូវីដ-១៩ ពេលនេះ ពុទ្ធបរិស័ទត្រូវតែរក្សានូវផ្លូវកាយ និងផ្លូវចិត្តឱ្យបានល្អ (ផ្លូវខាងក្រៅ និងផ្លូវខាងក្នុង)។
ចំពោះការរក្សាផ្លូវខាងក្រៅ ជំនួយការផ្ទាល់សម្តេចព្រះមហាសុមេធាធិបតីកិត្តិឧទ្ទេសបណ្ឌិត នន្ទ ង៉ែត សម្តេចព្រះសង្ឃនាយកនៃព្រះរាជាណាចក្រកម្ពុជា ដដែលពន្យល់ថា គួរកុំមើលឬស្តាប់ព័ត៌មានច្រើនពេក តែបើមើល ឬស្តាប់ព័ត៌មាន គឺត្រូវតាមដានព័ត៌មានពិតនិងច្បាស់លាស់ដែលអាចទុកចិត្តបាន ជាពិសេស ត្រូវធ្វើការងារណាដែលមានប្រយោជន៍ពាក់ព័ន្ធនឹងតួនាទីប្រចាំថ្ងៃ ឬការងារផ្ទាល់ខ្លួន ហើយនៅពេលទំនេរពីកិច្ចការគួរធ្វើលំហាត់ប្រាណ ដើម្បីសុខភាព និងបំបាត់ភាពតានតឹងក្នុងអារម្មណ៍ដែលកំពុងគិតអ្វីផ្តេសផ្តាស។
ដោយឡែកការរក្សាផ្លូវខាងក្នុង ព្រះសង្ឃអង្គដដែលបានសង្កត់ធ្ងន់ថា ត្រូវតាំងសតិឱ្យរឹងមាំកុំតក់ស្លុតជាមួយនឹងជំងឺកូវីដ-១៩ ខ្លាំងពេកដែលជាហេតុធ្វើឱ្យសម្រាន្តមិនលក់ និងគិតច្រើន។
តេជគុណអះអាងថា៖ «ប្រសិនបើអាចធ្វើសមាធិអប់រំចិត្តបានរឹតតែប្រសើរ ដើម្បីធ្វើចិត្តឱ្យស្ងប់រំងាប់អារម្មណ៍មិនល្អផ្សេងៗដែលគិតកន្លងមក។ ក្រៅពីនេះ ត្រូវពិចារណានិងចម្រើននៅមរណានុស្សតិ(សេចក្តីស្លាប់ជារឿយៗ)ដោយត្រូវគិតថា ការកើត ចាស់ ឈឺ ស្លាប់ ជាច្បាប់នៃធម្មជាតិដែលត្រូវតែទទួល»។
ព្រះគ្រូរតនមុនីឧត្តម សាម សំបូរ បន្តថា៖ «ប្រសិនបើមានពេលគួរសូត្រធម៌ថ្វាយបង្គំព្រះរតនត្រ័យយកគុណ ព្រះពុទ្ធ ព្រះធម៌ ព្រះសង្ឃ ជាទីពឹងឬក៏ពិចារណានៅបុណ្យកុសលដែលខ្លួនបានកសាងសេចក្តីល្អកន្លងមកក្នុងសង្គមជាតិ និងសាសនា ហើយត្រូវតាំងចិត្តថាអ្វីៗនឹងប្រសើឡើងវិញក្នុងពេលខាងមុខ» ។
ចំពោះការផ្ទុះឡើងនូវជំងឺកូវីដ-១៩ នៅកម្ពុជា ព្រះតេជគុណបានមានសង្ឃដីកាថា នៅក្នុងកាលៈទេសៈនេះពិតជាលំបាកទាំងបព្វជិត និងគ្រហស្ថ ហើយសូម្បីតែរាជរដ្ឋាភិបាលក៏រឹតតែលំបាក និងមានការព្រួយបារម្ភយ៉ាងខ្លាំងចំពោះសុខទុក្ខរបស់ប្រជាពលរដ្ឋ ដែលខិតខំរកមធ្យោបាយ ដើម្បីប្រយុទ្ធប្រឆាំងនឹងជំងឺកូវីដ-១៩។
ជាមួយគ្នានេះ ព្រះគ្រូរតនមុនីឧត្តម សាម សំបូរ ក៏បានអំពាវនាវដល់ពុទ្ធបរិស័ទមេត្តាយកចិត្តទុកដាក់ថែរក្សាសុខភាព ហើយរស់នៅឱ្យមានអនាម័យល្អ ជាពិសេស ត្រូវចូលរួមគោរពនូវវិធានការណ៍របស់រាជរដ្ឋាភិបាល និងក្រសួងសុខាភិបាល ដោយអនុវត្ត៣កុំ និង ៣ការពារ ឱ្យបានគ្រប់អង្គនាក់។
គិតត្រឹមថ្ងៃទី២៣ ខែកក្កដា ឆ្នាំ២០២១ កម្ពុជាមានអ្នកឆ្លងជំងឺកូវីដ-១៩ នៅទូទាំងប្រទេសសរុបកើនដល់ ៧១ ២៤៤នាក់ ខណៈជាសះស្បើយសរុបចំនួន ៦៣ ៤៧៤នាក់ និងស្លាប់កើនឡើងដល់ ១ ២២២នាក់។ នេះបើតាមក្រសួងសុខាភិបាល នៅថ្ងៃទី២៣ ខែកក្កដា ឆ្នាំ២០២១។
រដ្ឋាភិបាលកម្ពុជា បានចាត់វិធានការដើម្បីទប់ស្កាត់វីរុសបំប្លែងថ្មីដែលត្រូវបានគេរាយការណ៍ថា ងាយឆ្លង និងគ្រោះថ្នាក់ជាងវីរុសដើមផងដែរ។ ជាក់ស្តែង កាលពីថ្ងៃទី២១ ខែកក្កដា ឆ្នាំ២០២១ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានចេញសេចក្ដីសម្រេចលេខ៣៥២សខល តែងតាំងសមាសភាពនៃរចនាសម្ពន្ធចំណុះអនុគណៈកម្មការគ្រប់គ្រងច្រកទ្វារចេញចូលប្រទេស និងការធ្វើចត្តាឡីស័ក ដល់មន្ត្រីកំពូលៗជាច្រើនរូប ដើម្បីប្រយុទ្ធប្រឆាំងជាមួយនឹងជំងឺកូវីដ-១៩ នៅកម្ពុជា។
រដ្ឋមន្ត្រីក្រសួងសុខាភិបាល ក៏បានចាត់តាំងក្រុមការងារសម្របសម្រួលជាមួយខេត្តជាប់ព្រំដែនកម្ពុជា-ថៃ (ព្រះវិហារ ឧត្តរមានជ័យ បន្ទាយមានជ័យ បាត់ដំបង ប៉ៃលិន ពោធិ៍សាត់ និងកោះកុង) ចំនួន២៣រូប និងមន្ត្រីសម្របសម្រួលជាមួយខេត្តជាប់ព្រំដែនកម្ពុជា-វៀតណាម និងខេត្តជាប់ព្រំដែនកម្ពុជា-ឡាវ (កំពត កែប តាកែវ កណ្ដាល ព្រៃវែង ស្វាយរៀង ត្បូងឃ្មុំ ក្រចេះ មណ្ឌលគិរី រតនគិរី និងស្ទឹងត្រែង) ចំនួន២៣រូប ព្រមទាំងចាត់តាំងក្រុមការងារបច្ចេកទេស និងប្រឹក្សាយោបល់ ចំនួន៨រូប ៕
.jpg)
