ទស្សនៈអប់រំល្អៗ៩ឃ្លា របស់បណ្ឌិតដ៏មានប្រជាប្រិយ ៣ រូប
Admin
ថ្ងៃនេះយើងបានបន្តដកស្រង់នូវទស្សនៈអប់រំទាំងបុគ្គលនៅក្នុងពុទ្ធចក្រ និងអាណាចក្រ របស់ព្រះភិក្ខុវជិរប្បញ្ញោ សាន សុជា, បណ្ឌិតសភាចារ្យ ហង់ ជួនណារ៉ុន និងលោកឧកញ៉ា វេជ្ជបណ្ឌិត គួច ម៉េងលី ចំនួន៩ឃ្លា ដើម្បីជាការឈ្វេងយល់ និងត្រិះរិះពិចារណាជាប្រយោជន៍។
សម្រាប់សង្ឃដីការបស់ព្រះចៅអធិការវត្តមណីរត្ន ខេត្តពោធិ៍សាត់ ភិក្ខុវជិរប្បញ្ញោ សាន សុជា បានមានសង្ឃដីកាដូច្នេះថា៖
១. បើសិនថ្ងៃនេះអ្នកមិនបានរៀន មានន័យថា អ្នកល្ងង់ជាងម្សិលមិញ។
២. បុគ្គលដែលឆាប់ជឿនូវពាក្យញុះញង់របស់អ្នកដទៃ សមមានឈ្មោះជាមាន់។
៣. ដើមឈើដែលផ្ដល់នូវម្លប់ដល់អ្នកដទៃ ខ្លួនឯងតែងតែឈរនៅហាលក្ដៅ។
ទស្សនៈរបស់ ឯកឧត្តម បណ្ឌិតសភាចារ្យ ហង់ ជួនណារ៉ុន រដ្ឋមន្ត្រីនៃក្រសួងអប់រំ យុវជន និងកីឡា បានលើកឡើងថា៖
១. ឪពុកម្ដាយគួរអានសៀវភៅឱ្យកូនស្ដាប់មុនចូលគេង។
២. កម្ពុជា អាចប្រែក្លាយពីវិបត្តិកូវីដ១៩ ទៅជាកាលានុវត្តភាពក្នុងការបង្កើតការអប់រំតាមឌីជីថល។
៣. នៅពេលសិស្សប្រើប្រាស់បច្ចេកទេសអនឡាញ គឺអាចប្រឈមការគំរាមកំហែងការឆបោក ការបៀតបៀនផ្លូវភេទ និងបញ្ហាមិនសមរម្យ។ សូមសិស្សានុសិស្សត្រូវប្រុងប្រយ័ត្ន និងប្រាប់ឪពុកម្ដាយបើសិនជួបបញ្ហាខាងលើនេះ។
សម្រាប់លោកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន បានមានទស្សនៈថា៖
១. ទោះមិនបានចំណូល ខ្ញុំនៅតែសប្បាយចិត្តក្នុងការចែករំលែកដល់យុវជន។
២. ចូរវិនិយោគចំពោះយុវជនរបស់យើងក្នុងពេលបច្ចុប្បន្ននេះ ដើម្បីភាពថ្កុំថ្កើងនៃសង្គមនាថ្ងៃអនាគត។
៣. ឈើបើវាពុកហើយ សូមកុំព្យាយាមធ្វើឱ្យវាក្លាយទៅជាឈើខ្លឹម។
គួររម្លឹកជូនថា ព្រះចៅអធិការវត្តមណីរត្ន ខេត្តពោធិ៍សាត់ ភិក្ខុវជិរប្បញ្ញោ សាន សុជា ត្រូវបានគេមើលឃើញថា ព្រះអង្គមាននូវចំណេះដឹងទូលំទូលាយទាំងផ្នែកពុទ្ធចក្រ និងអាណាចក្រ ព្រមទាំងជាអង្គសកម្មក្នុងការចែករំលែកនូវព្រះធម្មទេសនា និងចំណេះដឹងទូទៅដល់ប្រជាជនទាំងក្នុងប្រទេស និងក្រៅប្រទេសយ៉ាងច្រើនផុសផុល។
លោកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន ត្រូវបានគេមើលឃើញថា ជាអ្នកជំនាញផ្នែកសុខភាពសាធារណៈ និងវិស័យអប់រំ ដែលបានរួមចំណែកយ៉ាងសកម្មក្នុងការចែករំលែកនូវចំណេះដឹង ចំណេះធ្វើ និងបទពិសោធជីវិតផ្ទាល់ខ្លួន ដល់យុវជនកម្ពុជាទាំងក្នុង និងក្រៅស្រុក។
ឯកឧត្តម បណ្ឌិតសភាចារ្យ ហង់ ជួនណារ៉ុន រដ្ឋមន្ត្រីនៃក្រសួងអប់រំ យុវជន និងកីឡា ត្រូវបានគេមើលឃើញថា ជាអ្នកបានធ្វើកំណែកទម្រង់ប្រព័ន្ធអប់រំ និងជាអ្នកបណ្ដុះនូវធនធានមនុស្សប្រកបដោយគុណភាព និងសក្ដានុពលនៅកម្ពុជា ៕
.jpg)
