មានអតីតភាពការងាររយៈពេល១៧ឆ្នាំនៅក្នុងក្រុមហ៊ុន ម៉េងលី ជេ. គួច អេឌ្យូខេសិន លោកស្រី សាឯម កម្រង អនុប្រធាននៃសាលារៀន អន្តរទ្វីប អាមេរិកាំង ទទួលបន្ទុកសិក្សាធិការ និងតំណាងឱ្យបុគ្គលិកដែលមានអតីតភាព១០ឆ្នាំនិង១៥ឆ្នាំទាំងអស់ បានថ្លែងអំណរគុណយ៉ាងជ្រាលជ្រៅចំពោះអ្នកឧកញ៉ា វេជ្ជបណ្ឌិត គួច ម៉េងលី ដែលបានផ្តល់ភាពកក់ក្តៅដល់បុគ្គលិកគ្រប់ជាន់ថ្នាក់ និងបានផ្តល់ឱកាសការងារដែលមាននិរន្តរភាព ហើយអាចអភិវឌ្ឍខ្លួនឱ្យក្លាយជាធនធានមនុស្សដ៏មានតម្លៃនៅក្នុងក្រុមហ៊ុន ក្នុងគ្រួសារ និងក្នុងសង្គមជាតិ។
លោកស្រីបានបញ្ជាក់ថា រយៈពេល១៧ឆ្នាំមកនេះ ដំបូងឡើយលោកស្រីគ្រាន់តែជាគ្រូបង្រៀនធម្មតា ពុំចេះសូម្បីប្រើកុំព្យូទ័រ តែទីនេះបានបង្រៀនលោកស្រីឱ្យចេះនូវកិច្ចការជាច្រើន ពូកែក្នុងការធ្វើទំនាក់ទំនង ក្លាហាន រហូតក្លាយជាពិធីករដែលមានវោហាសព្ទប្រចាំសាលារៀន អន្តរទ្វីប អាមេរិកាំង ជាង១០ឆ្នាំមកនេះ។ ចំពោះមូលហេតុសំខាន់ដែលលោកស្រីបន្តការងារមកដល់ពេលបច្ចុប្បន្ន ក៏ព្រោះ MJQE គឺជាស្ថាប័នដែលប្រកបដោយយុត្តិធម៌ មានតម្លាភាព និងជួយលើកស្ទួយដល់វិស័យអប់រំនៅកម្ពុជា និងប្រជាជនកម្ពុជា តាមរយៈការផ្តល់ការងារនិងកម្មវិធីសប្បុរសធម៌ផ្សេងៗ។ លោកស្រីប្តេជ្ញាខិតខំប្រឹងប្រែងធ្វើការ ចូលរួមសហការ និងបំពេញតួនាទីឱ្យបានល្អក្នុងការអភិវឌ្ឍវិស័យអប់រំនៅកម្ពុជាជាមួយក្រុមហ៊ុននិងសម្រេចគោលដៅពង្រីកវិសាលភាពសាខារបស់សាលាឱ្យបានច្រើនតាមការគ្រោងទុក។
ក្នុងនាមជាប្រធានក្រុមហ៊ុន MJQE អ្នកឧកញ៉ា វេជ្ជបណ្ឌិត គួច ម៉េងលី បានសម្តែងនូវក្តីរំភើបចំពោះវត្តមានជួបជុំរបស់បុគ្គលិកដែលមានអតីតភាព១០ឆ្នាំដល់១៥ឆ្នាំជាថ្មីម្តងទៀត បន្តាប់ពីខកខានប្រារព្ធពិធីនេះ ដោយសារការរីករាលដាលនៃជំងឺកូវីដ-១៩។
អ្នកឧកញ៉ាក៏បានលើកឡើងថា ភាពរីកចម្រើនរបស់ក្រុមហ៊ុននៅថ្ងៃនេះអាចកើតមានទៅបាន ដោយសារវត្តមានរបស់បុគ្គលិកគ្រប់លំដាប់ថ្នាក់ បើមានតែលោកនិងក្រុមគ្រួសារ ក៏មិនអាចទៅរួចដែរ។ ដូច្នេះ ភាពជោគជ័យនៅថ្ងៃនេះ មិនមែនសម្រាប់លោកតែម្នាក់ឯងនោះទេ តែជាភាពជោជ័យរបស់បុគ្គលិកទាំងអស់គ្នាផងដែរ។
ឆ្លៀតក្នុងឱកាសនេះដែរ អ្នកឧកញ៉ា វេជ្ជបណ្ឌិត គួច ម៉េងលី ក៏បានអបអរសាទរដល់ក្រុមហ៊ុន MJQE ដែលទទួលបានជោគជ័យក្នុងការចុះបញ្ជីលក់ក្នុងផ្សារមូលបត្រកម្ពុជា។ អ្នកឧកញ៉ាសង្ឃឹមថា ការឡើងទីផ្សារនេះ នឹងនាំឱ្យក្រុមហ៊ុនកាន់តែរីកចម្រើនរុងរឿង ដើម្បីសម្រេចគោលដៅក្នុងការពង្រីកសាលារៀន អន្តរទ្វីប អាមេរិកាំង និងមជ្ឈមណ្ឌលភាសា អេ អាយ អាយ ឱ្យបានគ្រប់ខេត្តក្រុងតាមការគ្រោងទុក ដើម្បីបំពេញតាមតម្រូវការរបស់អាណាព្យាបាលសិស្សលើវិស័យអប់រំដែលប្រកបដោយគុណភាព វិន័យ សេវាកម្មល្អ និងតម្លៃសិក្សាសមរម្យ។
សូមបញ្ជាក់ថា ក្នុងឱកាសជប់លៀងកាលពីយប់ថ្ងៃទី២៨នេះដែរ អ្នកឧកញ៉ា វេជ្ជបណ្ឌិត គួច ម៉េងលី ក៏បានផ្តល់សញ្ញាបណ្ណភាគហ៊ុនចំនួន១លានដុល្លារដល់បុគ្គលិកដែលមានអតីតភាពការងារ១០ឆ្នាំដល់១៥ឆ្នាំទាំងអស់ ដើម្បីជាការថ្លែងអំណរគុណដល់ការលះបង់ និងទឹកចិត្តស្រឡាញ់ក្រុមហ៊ុនដោយស្មោះស្ម័គ្រ សក្តិសមនឹងទទួលបានការតបស្នងមួយនេះពីអ្នកឧកញ៉ា។
បន្ថែមលើនេះ លោកក៏បានផ្តល់ថវិកាក្នុងម្នាក់ចំនួន១០០ដុល្លារដល់បុគ្គលិកដែលមានអតីតភាពការងារ១០ឆ្នាំទៅ១៥ឆ្នាំផងដែរ។ មិនតែប៉ុណ្ណោះ អ្នកឧកញ៉ាក៏មានផ្តល់រង្វាន់តាមរយៈការចាប់ឆ្នោតផ្សងសំណាងនូវម៉ូតូម៉ាក Scoopy ៤គ្រឿង ទូរសព្ទដៃម៉ាក Samsung A54 ៥គ្រឿង និងម៉ាក iPhone 14 Pro Max ៣គ្រឿង ទូរទស្សន៍ LG 55 inch ចំនួន៥គ្រឿង និងថវិកា២ម៉ឺនដុល្លារជូនបុគ្គលិកដែលចូលរួមក្នុងពិធីជប់លៀងនេះក្នុងម្នាក់៥០ដុល្លារ ព្រមទាំងមានការផ្ដល់រង្វាន់ជាច្រើនដល់បុគ្គលិកដែលទទួលជ័យលាភីពីការប្រឡងចម្រៀង និងការសម្ដែងរឿងខ្លីក្នុងពិធីជប់លៀងនេះដែរ៕
អត្ថបទដោយ៖ ហ៊ីង ស្រីរ័ត្ន